గ్యాస్‌ కొరత ప్రభావం.. ఐటీ కంపెనీల్లో వర్క్‌ ఫ్రమ్‌ హోమ్‌!

గ్యాస్‌ కొరత దేశవ్యాప్తంగా ప్రభావం చూపుతున్న నేపథ్యంలో ఐటీ సంస్థలు తమ కార్యాలయాల్లో కొత్త చర్యలు చేపడుతున్నాయి. క్యాంటీన్‌లలో వంట గ్యాస్‌ లభించకపోవడంతో ఆహార సరఫరా అంతరాయం కలగడం వల్ల ఉద్యోగులకు ఇంటి నుంచి భోజనం తీసుకురావాలని సూచిస్తున్నాయి. కొన్నిచోట్ల పరిస్థితులను దృష్టిలో పెట్టుకుని వర్క్‌ ఫ్రమ్‌ హోమ్‌ (WFH) సౌకర్యం కూడా కల్పిస్తున్నారు.

క్యాంటీన్ సేవలపై ప్రభావం
వాణిజ్య గ్యాస్‌ కొరత కారణంగా పలువురు క్యాంటీన్‌ వెండర్లు సేవలను నిలిపివేయాల్సి వచ్చింది. దీంతో చెన్నైలోని కార్యాలయాల్లో హెచ్‌సీఎల్‌ టెక్‌ ఈ నెల 12, 13 తేదీల్లో ఉద్యోగులకు ఇంటి నుంచే పని చేసే అవకాశం ఇచ్చింది. కంపెనీ వర్గాల ప్రకారం, క్యాంటీన్ సేవలు తగ్గడంతో ఉద్యోగుల సౌలభ్యం కోసం ఈ నిర్ణయం తీసుకున్నారు.

ఇన్ఫోసిస్‌ సూచనలు
దేశంలో రెండో అతిపెద్ద ఐటీ సంస్థ ఇన్ఫోసిస్‌ కూడా బెంగళూరు, చెన్నై కార్యాలయాల్లో ఉద్యోగులకు సూచనలు జారీ చేసింది. క్యాంటీన్‌లలో పరిమితమైన ఆహారం మాత్రమే అందుబాటులో ఉంటుందని, అందువల్ల ఉద్యోగులు ఇంటి నుంచే భోజనం తీసుకురావాలని సూచించింది. కొన్ని కార్యాలయాల్లో లైవ్‌ ఫుడ్‌ కౌంటర్‌లను తాత్కాలికంగా నిలిపివేశారు.

గత ఏడాది చివరి నాటికి ఇన్ఫోసిస్‌లో సుమారు 3,37,034 మంది, హెచ్‌సీఎల్‌ టెక్‌లో 2,26,379 మంది ఉద్యోగులు పనిచేస్తున్నారు.

ప్రపంచవ్యాప్తంగా వ్యాపారాలపై ప్రభావం
పశ్చిమాసియా ప్రాంతాల్లో పెరుగుతున్న ఉద్రిక్తతల కారణంగా ఇంధన రంగం, నిర్మాణం, స్థిరాస్తి, లాజిస్టిక్స్‌ వంటి రంగాలపై కూడా ప్రభావం పడుతోంది. దీంతో అక్కడ వ్యాపారాలు నిర్వహిస్తున్న లేదా కొత్తగా ప్రవేశించాలని భావిస్తున్న కంపెనీలు సీనియర్‌ స్థాయి నియామకాలను తాత్కాలికంగా నిలిపివేస్తున్నట్లు గ్లోబల్‌ సెర్చ్‌ సంస్థలు చెబుతున్నాయి.

వర్క్‌ ఫ్రమ్‌ హోమ్‌కు ప్రాధాన్యం
అమెరికాకు చెందిన ఆర్థిక సేవల సంస్థ వెల్స్‌ఫార్గో ఉపాధ్యక్షుడు చంద్రశేఖర్‌ కట్టకం కంపెనీలకు ఒక సూచన చేశారు. ఇంధన సంక్షోభ సమయంలో కంపెనీలు సాధ్యమైనంతవరకు ఉద్యోగులకు ఇంటి నుంచే పని చేసే అవకాశాలు కల్పించాలని ఆయన అభిప్రాయపడ్డారు.

ప్రతి రోజు వేలాది మంది ఉద్యోగులు కార్యాలయాలకు ప్రయాణించేందుకు భారీగా ఇంధనం వినియోగిస్తున్నారని, ఆ ప్రయాణాలు తగ్గితే ఆ ఇంధనాన్ని ఆరోగ్య సేవలు, అత్యవసర సేవలు, ప్రజా రవాణా, లాజిస్టిక్స్‌ వంటి ముఖ్య రంగాలకు మళ్లించవచ్చని సూచించారు.