స్వర్ణాంధ్ర-2047 లక్ష్యం: ఆర్థిక అసమానతలు లేని రాష్ట్రంగా ఏపీని తీర్చిదిద్దుతాం!

తిరుపతిలో నిర్వహించిన పీ-4 తొలి వార్షికోత్సవ కార్యక్రమం రాష్ట్రంలో సామాజిక మార్పుకు నాంది పలికే వేదికగా నిలిచింది. ముఖ్యమంత్రి చంద్రబాబు మాట్లాడుతూ, పేదరికం లేని సమాజ నిర్మాణమే ప్రభుత్వ ప్రధాన లక్ష్యమని స్పష్టం చేశారు. పబ్లిక్, ప్రైవేట్, పీపుల్స్‌ పార్ట్‌నర్‌షిప్‌ (P4) మోడల్‌ను ఒక సామాజిక విప్లవంగా అభివర్ణిస్తూ, ఇది దేశానికే ఆదర్శంగా నిలవాలని ఆకాంక్షించారు.

స్వర్ణాంధ్ర-2047 దిశగా రాష్ట్రంలో ఆర్థిక అసమానతలను తగ్గించి, ప్రతి కుటుంబానికి మెరుగైన జీవన ప్రమాణాలు అందించడమే లక్ష్యమని ఆయన తెలిపారు. పీ-4 ప్రారంభించిన కేవలం ఏడాది కాలంలోనే 10.39 లక్షల పేద కుటుంబాలను దత్తత తీసుకోవడం ఈ కార్యక్రమం ప్రభావాన్ని చాటుతుందని పేర్కొన్నారు.

సుమారు లక్షా ఆరు వేల మంది మార్గదర్శకులు ముందుకు వచ్చి పేద కుటుంబాలకు అండగా నిలవడం విశేషమని, ఈ కాలంలోనే 2.1 లక్షల కుటుంబాల్లో స్పష్టమైన మార్పు తీసుకురాగలిగామని సీఎం వెల్లడించారు. ఈ కార్యక్రమం తనకు ప్రత్యేకమైన సంతృప్తిని ఇచ్చిందని, ఇది ఒక సామాజిక ఉద్యమంగా మారాలని పిలుపునిచ్చారు.

సమాజంలో పెరుగుతున్న ఆర్థిక అసమానతలను తగ్గించడానికి కార్పొరేట్ సంస్థలు, ప్రైవేట్ వ్యక్తులు సామాజిక బాధ్యతగా ముందుకు రావాలని సీఎం కోరారు. ఇప్పటికే కొన్ని సంస్థలు సీఎస్‌ఆర్‌ నిధులతో వేలాది కుటుంబాలను దత్తత తీసుకుని వారికి జీవనోపాధి కల్పించిన విషయాన్ని గుర్తు చేశారు.

ఈ సందర్భంగా సేవా భావంతో పనిచేస్తున్న మార్గదర్శకులను రాష్ట్ర, జిల్లా, నియోజకవర్గ స్థాయిల్లో పురస్కారాలతో సత్కరించనున్నట్లు ప్రకటించారు. సమాజ నిర్మాణంలో వారి పాత్ర ఎంతో కీలకమని కొనియాడారు.

ప్రపంచవ్యాప్తంగా ఉన్న తెలుగువారందరికీ ఒక్క కుటుంబాన్నైనా దత్తత తీసుకుని ఆదుకోవాలని సీఎం పిలుపునిచ్చారు. హెల్తీ, వెల్తీ, హ్యాపీ సొసైటీ నిర్మాణమే తన లక్ష్యమని పేర్కొన్నారు.

కార్యక్రమంలో పీ-4 ద్వారా లబ్ధి పొందిన కుటుంబాల విజయగాథలను ప్రదర్శించగా, ఈ కార్యక్రమం గ్రామీణ స్థాయిలో తీసుకొచ్చిన మార్పులను ప్రతిబింబించాయి. పథక పురోగతిని ప్రతి నెలా స్వయంగా సమీక్షిస్తానని సీఎం స్పష్టం చేశారు.