ఉద్యోగుల సమస్యలు పరిష్కరిస్తాం: డిప్యూటీ సీఎం భట్టి విక్రమార్క

ఉద్యోగుల సమస్యల పరిష్కారానికి ప్రజా ప్రభుత్వం పూర్తిగా కట్టుబడి ఉందని ఉప ముఖ్యమంత్రి భట్టి విక్రమార్క స్పష్టం చేశారు. హైదరాబాద్‌లోని ప్రజాభవన్‌లో వివిధ ఉద్యోగ సంఘాల నాయకులతో జరిగిన సమావేశంలో ఆయన సమస్యలను ఓపికగా విని, సానుకూలంగా స్పందించారు.

ప్రభుత్వం మరియు ప్రజల మధ్య ఉద్యోగులు కీలక వారధిగా వ్యవహరిస్తున్నారని, సంక్షేమ పథకాలు ప్రజలకు చేరడంలో వారి పాత్ర అత్యంత ముఖ్యమని ఆయన ప్రశంసించారు. గతంతో పోలిస్తే ప్రస్తుతం ఆర్థిక క్రమశిక్షణతో పాటు ఉద్యోగుల సంక్షేమానికి ఎక్కువ ప్రాధాన్యం ఇస్తున్నామని తెలిపారు.

రాష్ట్రంలో ప్రభుత్వం అధికారంలోకి వచ్చిన తర్వాత ఉద్యోగులకు ప్రతి నెలా ఒకటో తేదీన జీతాలు అందుతున్నాయని, దీనివల్ల వేలాది కుటుంబాలకు ఉపశమనం లభించిందని సంఘాల నాయకులు పేర్కొన్నారు. అలాగే విశ్రాంత ఉద్యోగుల పెండింగ్ బిల్లుల చెల్లింపులకు ప్రతి నెలా రూ.1000 కోట్లు కేటాయించడం పట్ల వారు కృతజ్ఞతలు తెలిపారు. సమావేశంలో ఉద్యోగ సంఘాల ప్రతినిధులు పీఆర్సీ, డీఏ, హెల్త్ కార్డులు వంటి దీర్ఘకాలిక సమస్యలను భట్టి దృష్టికి తీసుకువచ్చారు. దీనిపై స్పందించిన ఆయన, ఈ అంశాలన్నింటినీ ముఖ్యమంత్రి రేవంత్ రెడ్డి దృష్టికి తీసుకెళ్లి, మంత్రివర్గ ఉపసంఘంలో చర్చించి త్వరలోనే నిర్ణయం తీసుకుంటామని భరోసా ఇచ్చారు.

ఇక రెవెన్యూ శాఖ ఉద్యోగుల బదిలీలపై నిషేధాన్ని ఎత్తివేయాలని ట్రెసా ప్రతినిధులు డిప్యూటీ సీఎంను కోరారు. అలాగే ఎన్నికల గౌరవ వేతనం విడుదల, టైపిస్ట్ మరియు కంప్యూటర్ ఆపరేటర్ల సేవల కొనసాగింపు వంటి అంశాలను కూడా ఆయన దృష్టికి తీసుకువచ్చారు. ఈ సమావేశంలో ఉద్యోగ సంఘాల ఐకాస నాయకులు మరియు పలువురు ఉన్నతాధికారులు పాల్గొన్నారు. ప్రభుత్వం ఉద్యోగుల సంక్షేమం కోసం సానుకూల నిర్ణయాలు తీసుకుంటుందని వారు ఆశాభావం వ్యక్తం చేశారు.