ఇస్లామాబాద్ వేదికగా అమెరికా–ఇరాన్ మధ్య కీలక చర్చలు

పశ్చిమాసియాలో కొనసాగుతున్న ఉద్రిక్తతలను తగ్గించేందుకు మరో కీలక దౌత్య ప్రయత్నం ప్రారంభమైంది. అమెరికా–ఇరాన్ మధ్య దీర్ఘకాలంగా కొనసాగుతున్న సంఘర్షణకు ముగింపు పలకడమే లక్ష్యంగా ఇరుదేశాలు మళ్లీ చర్చల బాట పట్టినట్లు సమాచారం. పాకిస్థాన్ రాజధాని ఇస్లామాబాద్‌లో వచ్చే వారం ఇరుదేశాల ప్రతినిధులు సమావేశమయ్యే అవకాశం ఉందని అంతర్జాతీయ మీడియాలో కథనాలు వెలువడుతున్నాయి.

ఈ చర్చల్లో 14 పాయింట్ల అవగాహన ఒప్పందంపై ముందడుగు పడే అవకాశం ఉందని తెలుస్తోంది. ఇందులో ఇరాన్ అణు కార్యక్రమం, యురేనియం నిల్వల బదిలీ, అలాగే హర్మూజ్ జలసంధిలో నెలకొన్న ఉద్రిక్తతలను తగ్గించడం వంటి కీలక అంశాలు ప్రధానంగా ఉండనున్నాయి. తమపై విధించిన ఆర్థిక ఆంక్షలను ఎత్తివేయాలన్న డిమాండ్‌ను ఇరాన్ (టెహ్రాన్) గత కొంతకాలంగా కొనసాగిస్తోంది. ఇదే అంశం చర్చల్లో ప్రధాన అడ్డంకిగా మారినట్లు విశ్లేషకులు భావిస్తున్నారు. చర్చలు సానుకూలంగా సాగితే ప్రస్తుతం అమల్లో ఉన్న కాల్పుల విరమణ ఒప్పందాన్ని మరింత కాలం పొడిగించే అవకాశాలు ఉన్నాయని అంచనా వేస్తున్నారు.

ఇక ఈ పరిణామాలపై అమెరికా అధ్యక్షుడు డొనాల్డ్ ట్రంప్ స్పందించారు. పశ్చిమాసియా సమస్య పరిష్కారానికి అమెరికా పంపిన ప్రతిపాదనలపై ఇరాన్ త్వరలో స్పందించే అవకాశం ఉందని ఆయన ఆశాభావం వ్యక్తం చేశారు. ఇరాన్ ఈ అంశాన్ని ఉద్దేశపూర్వకంగా ఆలస్యం చేస్తుందా అన్న ప్రశ్నలకు సమాధానం త్వరలోనే తెలుస్తుందని ట్రంప్ వ్యాఖ్యానించారు. హర్మూజ్ జలసంధిలో చిక్కుకున్న నౌకలను సురక్షితంగా బయటకు తీసుకువచ్చేందుకు చేపట్టిన ‘ప్రాజెక్ట్ ఫ్రీడమ్’ను తిరిగి పరిశీలిస్తున్నట్లు కూడా ఆయన పేర్కొన్నారు. ఒప్పందం ఆలస్యం అయితే ఈ కార్యక్రమాన్ని మరింత విస్తరించి ‘ప్రాజెక్ట్ ఫ్రీడమ్ ప్లస్’గా చేపడతామని హెచ్చరించారు.

మరోవైపు అమెరికా చర్యలపై ఇరాన్ తీవ్ర స్థాయిలో స్పందించింది. ఐక్యరాజ్య సమితి ప్రధాన కార్యదర్శి ఆంటోనియో గుటెరస్‌కు ఇరాన్ శాశ్వత ప్రతినిధి అమీర్ సయీద్ ఇరవానీ లేఖ రాశారు. హర్మూజ్ జలసంధిలో అమెరికా సైనిక చర్యలు కాల్పుల విరమణ ఒప్పందాన్ని ఉల్లంఘించాయని ఆరోపించారు. పర్షియన్ గల్ఫ్, హర్మూజ్ ప్రాంతాల్లో అమెరికా సైనిక కార్యకలాపాలు కొనసాగితే తీవ్రమైన పరిణామాలు తప్పవని ఆయన హెచ్చరించారు. దీంతో ప్రాంతీయ ఉద్రిక్తతలు మరింత పెరిగే అవకాశంపై అంతర్జాతీయ సమాజం ఆందోళన వ్యక్తం చేస్తోంది.