ప్రధాని మోదీతో ‘పెద్ది’ గురించి చర్చించిన రామ్‌చరణ్

రామ్‌చరణ్ కథానాయకుడిగా, బుచ్చిబాబు సానా దర్శకత్వంలో తెరకెక్కుతున్న భారీ పాన్ ఇండియా చిత్రం ‘పెద్ది’పై ప్రేక్షకుల్లో భారీ అంచనాలు నెలకొన్నాయి. మారుమూల ప్రాంతానికి చెందిన ఓ యువకుడు తనకంటూ గుర్తింపు సాధించేందుకు చేసే పోరాటమే ఈ కథ ప్రధానాంశమని చిత్రబృందం వెల్లడించింది. ఈ చిత్రంలో జాన్వీ కపూర్ కథానాయికగా నటిస్తుండగా, వెంకట సతీశ్ కిలారు నిర్మిస్తున్నారు. జూన్ 4న ఈ సినిమా ప్రపంచవ్యాప్తంగా థియేటర్లలో విడుదల కానుంది.

ప్రస్తుతం చిత్రబృందం దేశవ్యాప్తంగా ప్రచార కార్యక్రమాల్లో పాల్గొంటోంది. గురువారం దిల్లీలో జరిగిన విలేకరుల సమావేశంలో రామ్‌చరణ్, జాన్వీ కపూర్ తదితరులు పాల్గొన్నారు. ఈ సందర్భంగా రామ్‌చరణ్ మాట్లాడుతూ, ఇది “మట్టి వాసన ఉన్న కథ” అని పేర్కొన్నారు. తాను గతంలో చేసిన గ్రామీణ నేపథ్య సినిమాలు మంచి విజయాలను సాధించాయని, వాటి సరసన ‘పెద్ది’ కూడా నిలుస్తుందని ఆయన ఆశాభావం వ్యక్తం చేశారు.

ప్రధాని నరేంద్ర మోదీని ఇటీవల దిల్లీలో కలిసినప్పుడు ఈ సినిమా గురించి చర్చ జరిగినట్లు రామ్‌చరణ్ తెలిపారు. గ్రామీణ సాధికారత నేపథ్యంతో ఈ చిత్రం రూపొందుతోందని ఆయన మోదీకి వివరించగా, మోదీ తన అనుభవాన్ని పంచుకున్నారని చెప్పారు. పశ్చిమ బెంగాల్‌లో ప్రచార సమయంలో గ్రామీణ యువత క్రీడల్లో చూపిన ప్రతిభ గురించి ఆయన చెప్పిన విషయం ఎంతో ప్రేరణ కలిగించిందని రామ్‌చరణ్ వెల్లడించారు.

ఒక వ్యక్తి స్ఫూర్తి సమాజంలో ఎంత పెద్ద మార్పును తీసుకురాగలదో ఆ ఉదాహరణను మోదీ వివరించారని ఆయన తెలిపారు. అదే భావనతో ‘పెద్ది’ కథ కూడా రూపుదిద్దుకుందని చెప్పారు. ఈ పాత్ర కోసం తాను పూర్తిగా శ్రమించి ప్రాణం పెట్టి నటించానని రామ్‌చరణ్ అన్నారు.

జాన్వీ కపూర్ మాట్లాడుతూ, తమ మూలాలను గుర్తుచేసే కథలో భాగం కావడం ఎంతో సంతృప్తినిచ్చిందని తెలిపారు. ఇది కుటుంబమంతా కలిసి చూడదగిన సినిమా అని ఆమె పేర్కొన్నారు. ఈ కార్యక్రమంలో దివ్యేందు శర్మ, బొమన్ ఇరానీ, వెంకట సతీశ్ కిలారు తదితరులు పాల్గొన్నారు.