టాటా టియాగో ఈవీ విడుదల.. ప్రారంభ ధర రూ.6.99 లక్షలు

దేశీయ ఆటోమొబైల్‌ రంగంలో టాటా మోటార్స్‌ మరో కీలక అడుగు వేసింది. తదుపరి తరం టియాగో, టియాగో సీఎన్‌జీ, టియాగో ఈవీ మోడళ్లను భారత మార్కెట్లో విడుదల చేసింది. ప్రారంభ స్థాయి టియాగో పెట్రోల్‌ ధరను రూ.4.69 లక్షలుగా నిర్ణయించగా.. సీఎన్‌జీ వెర్షన్‌ ధర రూ.5.79 లక్షలు, టియాగో ఈవీ ధర రూ.6.99 లక్షలుగా కంపెనీ ప్రకటించింది.

టియాగో ఈవీకి ప్రత్యేక ఆకర్షణగా ‘బ్యాటరీ యాజ్‌ ఏ సర్వీస్‌’ విధానాన్ని తీసుకొచ్చింది. ఈ విధానంలో కస్టమర్లు రూ.4.69 లక్షల ప్రారంభ ధరతో కారును కొనుగోలు చేసి.. కిలోమీటరుకు రూ.2.60 చొప్పున బ్యాటరీ వినియోగ చార్జీలు చెల్లించవచ్చు. దీంతో ఎలక్ట్రిక్‌ కార్ల కొనుగోలు ఖర్చు తగ్గే అవకాశం ఉందని నిపుణులు భావిస్తున్నారు.కొత్త టియాగోలో ఆధునిక ఫీచర్లకు పెద్దపీట వేశారు. 10.25 అంగుళాల టచ్‌స్క్రీన్‌, డ్యూయల్‌ వైర్‌లెస్‌ ఛార్జర్‌, 360 డిగ్రీల కెమెరా, బ్లైండ్‌ స్పాట్‌ మానిటర్‌, రియర్‌ ఏసీ వెంట్స్‌, క్రూయిజ్‌ కంట్రోల్‌, ఆటో హెడ్‌ల్యాంప్స్‌, 6 ఎయిర్‌బ్యాగ్‌లు వంటి సౌకర్యాలు అందుబాటులో ఉన్నాయి.

టియాగో ఈవీ రెండు బ్యాటరీ ఆప్షన్లలో లభిస్తుంది. 19.2 కిలోవాట్‌ అవర్‌ బ్యాటరీతో 205 కి.మీ., 24 కిలోవాట్‌ అవర్‌ బ్యాటరీతో 285 కి.మీ. వరకు ప్రయాణించవచ్చని కంపెనీ తెలిపింది. ఫాస్ట్‌ ఛార్జింగ్‌ సదుపాయం కూడా అందుబాటులో ఉంది.ఇక ప్రస్తుత ఆర్థిక పరిస్థితుల్లో ఇంధన ధరల పెరుగుదల వాహన విక్రయాలపై ప్రభావం చూపే అవకాశం ఉందని టాటా మోటార్స్‌ ప్యాసింజర్‌ వెహికల్స్‌ ఎండీ శైలేష్‌ చంద్ర అభిప్రాయపడ్డారు. వినియోగదారుల సెంటిమెంట్‌, మార్కెట్‌ పరిస్థితులను పరిశీలించిన తర్వాతే పూర్తి అంచనాలు వెల్లడించగలమన్నారు.

మరోవైపు ఎలక్ట్రిక్‌, హైబ్రిడ్‌ వాహనాల్లో ఉపయోగించే అధునాతన హీటర్ల తయారీ కోసం టాటా ఆటోకాంప్‌ సిస్టమ్స్‌ కొరియాకు చెందిన జహ్వా ఎలక్ట్రానిక్స్‌తో సంయుక్త సంస్థను ఏర్పాటు చేసింది.అంతర్జాతీయ పెట్టుబడి రంగంలో కూడా మార్పులు చోటుచేసుకుంటున్నాయి. యూబీఎస్‌ సర్వే ప్రకారం ప్రపంచవ్యాప్తంగా కుటుంబ వ్యాపారాలు అమెరికా డాలర్‌పై ఆధారాన్ని తగ్గించే దిశగా అడుగులు వేస్తున్నాయి. ఆసియా-పసిఫిక్‌, వర్ధమాన మార్కెట్లలో పెట్టుబడులు పెంచే ఆలోచనలో ఉన్నట్లు సర్వే వెల్లడించింది.