రాయదుర్గం భూమి కేసులో హైకోర్టును ఆశ్రయించిన ఎస్‌బీఐ

రంగారెడ్డి జిల్లా శేరిలింగంపల్లి మండలం రాయదుర్గంలోని సర్వే నంబర్ 83/1లో ఉన్న హైదరాబాద్ నాలెడ్జ్ సిటీలోని 5.09 ఎకరాల భూమి వివాదం మరింత జటిలంగా మారింది. ఆ భూమి తమకు విక్రయించారంటూ ఎస్‌బీఐ హైకోర్టును ఆశ్రయించడంతో ఈ అంశం ఇప్పుడు చర్చనీయాంశంగా మారింది.

ఇటీవల ఈ భూమి అత్యధికంగా ఎకరా రూ.237 కోట్ల ధరకు ఈ-వేలం ద్వారా టీజీఐఐసీ విక్రయించింది. అయితే ప్రస్తుతం కోర్టులో వివాదం నడుస్తుండటంతో, ఈ-వేలంలో కొనుగోలు చేసిన సంస్థకు భూ కేటాయింపు కొనసాగుతుందా లేదా అన్నది ప్రశ్నార్థకంగా మారింది.

టీజీఐఐసీ ఈ భూములు ప్రభుత్వానికే చెందుతాయని బలంగా వాదిస్తోంది. 2010లో అప్పటి ఉమ్మడి ఆంధ్రప్రదేశ్ ప్రభుత్వం ఈ భూమిని ఎస్‌బీఐకి రాయితీ ధరకు కేటాయించింది. అక్కడ కార్పొరేట్ కార్యాలయం ఏర్పాటు చేయడం ద్వారా ఉద్యోగ అవకాశాలు కల్పించాలన్న ఉద్దేశంతో ఈ కేటాయింపు జరిగినట్లు అధికారులు చెబుతున్నారు.

అయితే ఎస్‌బీఐ మాత్రం భూమి తమ స్వాధీనంలోనే ఉందని, ఔట్‌రైట్ సేల్ తర్వాత ప్రభుత్వం తిరిగి స్వాధీనం చేసుకుని వేలం వేయడానికి కేటాయింపు నిబంధనల్లో ఎటువంటి క్లాజ్ లేదని వాదిస్తోంది.

ప్రభుత్వ అధికారుల ప్రకారం, కేటాయింపు నిబంధనల మేరకు రెండేళ్లలో భూమిని అభివృద్ధి చేయాల్సి ఉండగా ఎస్‌బీఐ ఆ పనులు ప్రారంభించలేదని చెబుతున్నారు. 2011లోనే షోకాజ్ నోటీసులు జారీ చేసినప్పటికీ నిర్మాణం జరగలేదని, 2016లో గడువు పొడిగించాలని ఎస్‌బీఐ కోరినట్లు వెల్లడించారు.

ఈ భూమిని కేటాయింపు ఉద్దేశానికి అనుగుణంగా వినియోగించకపోవడంతో టీజీఐఐసీ 2019, 2020లో ప్రభుత్వానికి నివేదిక ఇచ్చింది. అనంతరం 2021 జనవరి 22న కేటాయింపును రద్దు చేసినట్లు అధికారులు తెలిపారు.

ఈ రద్దును ఎస్‌బీఐ వ్యతిరేకిస్తూ ప్రభుత్వానికి లేఖ రాసింది. ప్రస్తుతం ఈ వ్యవహారం కోర్టు పరిధిలో ఉంది. ఉస్మాన్‌సాగర్, గండిపేటలో ప్రత్యామ్నాయ భూములు ప్రతిపాదించినా ఎస్‌బీఐ వాటిని తిరస్కరించినట్లు సమాచారం.

హైకోర్టు ఎలాంటి స్టే ఇవ్వకపోవడంతోనే ఈ-వేలం నిర్వహించామని టీజీఐఐసీ చెబుతుండగా, సమస్య పరిష్కారం కాకముందే వేలం ఎలా నిర్వహించారన్నది ఎస్‌బీఐ ప్రశ్నిస్తోంది. దీంతో హైదరాబాద్‌లోని అత్యంత ఖరీదైన భూముల్లో ఒకటైన ఈ వ్యవహారం మరింత ఉత్కంఠగా మారింది.