బీమా సుగమ్ ప్లాట్‌ఫామ్ సెప్టెంబర్ నాటికి అందుబాటులోకి.. ఐఆర్‌డీఏఐ ఛైర్మన్ అజయ్ సేథ్

ఎంతోకాలంగా ఎదురుచూస్తున్న ‘బీమా సుగమ్’ ప్లాట్‌ఫామ్‌ను ఈ ఏడాది సెప్టెంబర్ నెలాఖరు నాటికి అందుబాటులోకి తీసుకురానున్నట్లు భారతీయ బీమా నియంత్రణ, ప్రాధికార సంస్థ (ఐఆర్‌డీఏఐ) ఛైర్మన్ అజయ్ సేథ్ తెలిపారు. పాలసీదారులకు తక్కువ ఖర్చుతో రక్షణ కల్పించడం, సున్నా కమీషన్ పాలసీలను అందించడం లక్ష్యంగా ఈ డిజిటల్ ప్లాట్‌ఫామ్‌ను రూపొందిస్తున్నట్లు ఆయన పేర్కొన్నారు.

ఈ ప్రాజెక్టు నిర్ణీత సమయానికి కొంత ఆలస్యమైనప్పటికీ, బీమా కంపెనీలు తమ సాంకేతిక వ్యవస్థలను అనుసంధానించుకోవడం, అవసరమైన పెట్టుబడులు పెట్టడం వంటి కారణాల వల్ల మౌలిక సదుపాయాల అభివృద్ధిలో జాప్యం జరిగినట్లు ఆయన వివరించారు.

ఈ ప్లాట్‌ఫామ్ ద్వారా ప్రారంభ దశలో వాహన బీమా, ఆరోగ్య బీమా, టర్మ్ పాలసీల విక్రయాలకు ప్రాధాన్యం ఇవ్వనున్నట్లు అజయ్ సేథ్ తెలిపారు. మంగళవారం ముంబయిలో లైఫ్ ఇన్సూరెన్స్ కౌన్సిల్ ఆధ్వర్యంలో నిర్వహించిన ఇన్సూరెన్స్ అవేర్‌నెస్ కమిటీ సమావేశంలో ఆయన మాట్లాడారు.

గత ఏడాది ప్రభుత్వం బీమా రంగంలో 100 శాతం విదేశీ ప్రత్యక్ష పెట్టుబడులకు (FDI) అనుమతించిన తర్వాత సాధారణ బీమా విభాగంలో రెండు ప్రతిపాదనలకు ఆమోదం తెలిపినట్లు ఆయన వెల్లడించారు. అయితే ఈ పెట్టుబడుల పూర్తి వివరాలను ఆయన వెల్లడించలేదు.

ఇటీవలే ఒక FDI ప్రతిపాదనకు ఆమోదం లభించినట్లు స్పష్టం చేశారు. మదుపరులకు అనువైన ఉత్పత్తులు అందించడం, తప్పుదోవ పట్టించే విక్రయాల నుంచి వినియోగదారులను రక్షించడం వంటి అంశాలపై దృష్టి పెట్టినట్లు ఆయన తెలిపారు.

ఈ సమస్యల పరిష్కారం కోసం జులైలో ఐఆర్‌డీఏఐ ఒక ముసాయిదా మార్గదర్శకాలను విడుదల చేయనున్నట్లు కూడా వెల్లడించారు. ఈ కార్యక్రమంలో ఇన్సూరెన్స్ అవేర్‌నెస్ కౌన్సిల్ ఛైర్‌పర్సన్ కమలేష్ రావు, ఎల్‌ఐసీ ఎండీ దొరైస్వామి, పీఎన్‌బీ మెట్‌లైఫ్ ఎండీ సమీర్ బన్సాల్, ఇండియాఫస్ట్ ఎండీ రుషభ్ గాంధీ తదితరులు పాల్గొన్నారు.