శ్రీసిటీ ఇంటర్నేషనల్ యూనివర్సిటీ ప్రారంభించిన నారా లోకేశ్

దేశ ఆర్థికాభివృద్ధిలో ఆంధ్రప్రదేశ్ అగ్రగామిగా నిలవాలన్నదే రాష్ట్ర ప్రభుత్వ లక్ష్యమని మంత్రి నారా లోకేశ్ పేర్కొన్నారు. ప్రస్తుతం సుమారు 220 బిలియన్ డాలర్ల ఆర్థిక వ్యవస్థగా ఉన్న ఆంధ్రప్రదేశ్‌ను 2047 నాటికి 2.4 ట్రిలియన్ డాలర్ల ఎకానమీగా అభివృద్ధి చేయాలనే సంకల్పంతో ప్రభుత్వం పనిచేస్తోందని ఆయన వెల్లడించారు. తిరుపతి జిల్లా శ్రీసిటీలో నూతనంగా నిర్మించిన శ్రీసిటీ ఇంటర్నేషనల్ యూనివర్సిటీని శ్రీసిటీ ఛైర్మన్ శ్రీనిరాజు, ఎండీ డా. రవీంద్ర సన్నారెడ్డితో కలిసి లోకేశ్ ప్రారంభించారు.

ఈ సందర్భంగా నిర్వహించిన సభలో ఆయన మాట్లాడుతూ రాష్ట్రంలో ప్రపంచ స్థాయి విద్యా సంస్థను ఏర్పాటు చేసిన యాజమాన్యాన్ని అభినందించారు. పరిశ్రమలు, విద్య, ఉపాధి అవకాశాలను ఒకే వేదికపై కలిపే విధంగా ఈ విశ్వవిద్యాలయాన్ని అభివృద్ధి చేయడం అభినందనీయమని అన్నారు. కేవలం డిగ్రీలు ఇవ్వడమే విద్యా సంస్థల బాధ్యత కాదని, సమాజంలో మార్పు తీసుకువచ్చేలా యువతను తీర్చిదిద్దే విద్యా విధానం అవసరమని స్పష్టం చేశారు.

ప్రస్తుత కాలంలో డిగ్రీతో పాటు నైపుణ్యాలు, సాంకేతిక పరిజ్ఞానం, సమస్యలను పరిష్కరించే సామర్థ్యం కూడా విద్యార్థులకు అత్యవసరమని లోకేశ్ పేర్కొన్నారు. ప్రపంచవ్యాప్తంగా వేగంగా మారుతున్న సాంకేతిక పరిస్థితులకు అనుగుణంగా యువతను తీర్చిదిద్దాల్సిన బాధ్యత విద్యాసంస్థలపై ఉందన్నారు. ఆ దిశగానే శ్రీసిటీ ఇంటర్నేషనల్ యూనివర్సిటీ పనిచేస్తుందని ఆశాభావం వ్యక్తం చేశారు.

ఈ యూనివర్సిటీ ద్వారా భవిష్యత్తులో మరో 75 వేల ఉద్యోగ అవకాశాలు రాష్ట్రానికి తీసుకురావడమే లక్ష్యమని మంత్రి వెల్లడించారు. పరిశ్రమల అవసరాలకు అనుగుణంగా నైపుణ్యాలున్న మానవ వనరులను తయారు చేయడంలో ఈ సంస్థ కీలక పాత్ర పోషిస్తుందని చెప్పారు. విద్యార్థులు చదువుతో పాటు పరిశ్రమల్లో ప్రత్యక్ష అనుభవం పొందేలా రూపొందించిన వర్క్–స్టడీ మోడల్ భవిష్యత్ ఉపాధికి ఎంతో ఉపయోగపడుతుందని వివరించారు.

ముఖ్యమంత్రి నారా చంద్రబాబు నాయుడు దూరదృష్టి కలిగిన నాయకుడని కొనియాడిన లోకేశ్, ఆయన ఒక లక్ష్యాన్ని నిర్దేశించుకుంటే దాన్ని సాధించే వరకు విశ్రాంతి తీసుకోరని అన్నారు. రాష్ట్ర అభివృద్ధి కోసం సీఎం చూపుతున్న వేగానికే అనుగుణంగా మంత్రులు, అధికారులు కూడా పనిచేస్తున్నారని చెప్పారు. అభివృద్ధి, పెట్టుబడులు, ఉపాధి కల్పనలో ఆంధ్రప్రదేశ్‌ను దేశంలోనే అగ్రస్థానంలో నిలబెట్టడమే ప్రభుత్వ లక్ష్యమని పేర్కొన్నారు.

ప్రధాని నరేంద్ర మోదీ నాయకత్వంలో దేశంలో విద్యా రంగంలో విస్తృత మార్పులు చోటుచేసుకుంటున్నాయని లోకేశ్ తెలిపారు. నూతన విద్యా విధానం (NEP), స్టార్టప్ ఇండియా, స్కిల్ ఇండియా, వికసిత్ భారత్ వంటి కార్యక్రమాలు యువతకు కొత్త అవకాశాలను అందిస్తున్నాయని అన్నారు. ఈ మార్పులను అందిపుచ్చుకునేలా రాష్ట్రంలో కూడా విద్యా వ్యవస్థను ఆధునీకరిస్తున్నామని చెప్పారు.

కృత్రిమ మేధస్సు (AI)పై మాట్లాడిన లోకేశ్, ప్రతి పారిశ్రామిక విప్లవం కొన్ని సంప్రదాయ ఉద్యోగాలను తగ్గించినప్పటికీ, అంతకంటే ఎక్కువ కొత్త ఉద్యోగాలను సృష్టించిందని గుర్తు చేశారు. AI కూడా అదే తరహాలో కొత్త అవకాశాలను తెస్తుందని, దానిని భయపడాల్సిన అవసరం లేదన్నారు. ప్రభుత్వం, పరిశ్రమలు మాత్రమే కాకుండా రాజకీయ వ్యవస్థలో కూడా AI వినియోగం పెరుగుతోందని, తాము కూడా రాజకీయ కార్యకలాపాల్లో AI సాంకేతికతను వినియోగిస్తున్నామని వెల్లడించారు.

శ్రీసిటీ వంటి పారిశ్రామిక కేంద్రాల్లో ప్రపంచ స్థాయి విద్యా సంస్థలు ఏర్పడడం వల్ల విదేశీ పెట్టుబడులు పెరగడంతో పాటు నైపుణ్యం కలిగిన యువతకు అధిక ఉపాధి అవకాశాలు లభిస్తాయని, తద్వారా ఆంధ్రప్రదేశ్‌ను ప్రపంచ స్థాయి పెట్టుబడుల గమ్యస్థానంగా తీర్చిదిద్దే లక్ష్యానికి మరింత బలం చేకూరుతుందని మంత్రి నారా లోకేశ్ పేర్కొన్నారు.