ఎల్‌ఐజీ గృహ పథకానికి లోగో రూపొందించండి.. రూ.లక్ష గెలుచుకోండి

‘క్యూర్‌’ పరిధిలో అమలు చేయనున్న అల్ప ఆదాయ వర్గాల (ఎల్‌ఐజీ) గృహ నిర్మాణ పథకానికి ప్రత్యేక గుర్తింపు తీసుకొచ్చేలా లోగో రూపకల్పన పోటీని నిర్వహిస్తున్నట్లు హౌసింగ్‌ బోర్డు వైస్‌ ఛైర్మన్‌ గౌతమ్‌ తెలిపారు. ఈ పథకం లక్ష్యం, సామాజిక ప్రయోజనం, పేద, మధ్యతరగతి వర్గాలకు అందించే గృహ భరోసాను ప్రతిబింబించే విధంగా లోగో ఉండాలని ఆయన సూచించారు.

ఉత్తమమైన, ఆకట్టుకునే లోగోను రూపొందించిన విజేతకు రూ.లక్ష నగదు బహుమతిని అందించనున్నట్లు వెల్లడించారు. సృజనాత్మకత, వినూత్న ఆలోచనలు, పథకం ఉద్దేశాలను ప్రతిబింబించే డిజైన్లకు ప్రాధాన్యం ఇస్తామని తెలిపారు.

ఈ లోగో డిజైన్‌ పోటీలో పాల్గొనేందుకు డిజైనర్లు, విద్యార్థులు, కళాకారులు, సృజనాత్మకత ఉన్న ఎవరైనా అర్హులేనని పేర్కొన్నారు. పాల్గొనదలచిన వారు హౌసింగ్‌ శాఖకు చెందిన అధికారిక ఇన్‌స్టాగ్రామ్‌ ఖాతా ద్వారా తమ డిజైన్లను సమర్పించాలని సూచించారు. ఈ నెల 12వ తేదీలోపు లోగోలను పోస్టు చేయాలని కోరారు.

ఎల్‌ఐజీ గృహ నిర్మాణ పథకానికి ప్రజల్లో సులభంగా గుర్తింపు వచ్చేలా, పథకం ఆశయాలను తెలియజేసేలా లోగో రూపొందించాలని అధికారులు తెలిపారు. ఎంపిక ప్రక్రియలో డిజైన్‌ నాణ్యత, సృజనాత్మకత, పథకంతో అనుసంధానం వంటి అంశాలను పరిగణనలోకి తీసుకుంటామని వెల్లడించారు.

ఇదిలా ఉండగా, గత నెల చివరి వారంలో ఎల్‌ఐజీ గృహ పథకానికి పేరు సూచించే పోటీని కూడా హౌసింగ్‌ బోర్డు నిర్వహించింది. ఈ పోటీలో పెద్ద సంఖ్యలో ప్రజలు పాల్గొని వివిధ పేర్లను సూచించారు. మొత్తం 14 వేల మందికి పైగా పాల్గొని తమ ప్రతిపాదనలు పంపినట్లు అధికారులు తెలిపారు.

ప్రస్తుతం వచ్చిన పేర్లను పరిశీలించే ప్రక్రియ కొనసాగుతోందని, త్వరలోనే తుది ఎంపిక చేసిన పేరును ప్రకటించి విజేతకు రూ.లక్ష బహుమతిని అందజేస్తామని వెల్లడించారు. ఎల్‌ఐజీ పథకాన్ని ప్రజలకు మరింత చేరువ చేయడం, పథకంపై అవగాహన పెంచడం లక్ష్యంగా ఈ కార్యక్రమాలను చేపడుతున్నట్లు అధికారులు తెలిపారు.