అమెరికా, యూరప్‌ మార్కెట్ల నుంచి వన్‌ప్లస్‌ వైదొలగనున్నట్లు సమాచారం

ప్రముఖ స్మార్ట్‌ఫోన్‌ తయారీ సంస్థ వన్‌ప్లస్‌ తన అంతర్జాతీయ వ్యూహంలో కీలక మార్పులు చేయనున్నట్లు సమాచారం. అమెరికా, యూరప్‌ మార్కెట్లలో కార్యకలాపాలను నిలిపివేయాలనే ఆలోచనలో ఉన్నట్లు జర్మనీకి చెందిన టెక్‌ వెబ్‌సైట్‌ విన్‌ఫ్యూచర్‌ నివేదిక వెల్లడించింది. దీనిపై సంస్థ త్వరలో అధికారిక ప్రకటన చేసే అవకాశం ఉందని సంబంధిత వర్గాలు చెబుతున్నాయి.

అమెరికా, యూరప్‌ మార్కెట్ల నుంచి వైదొలగే నిర్ణయం తీసుకుంటే, ప్రస్తుతం వన్‌ప్లస్‌ పరికరాలను ఉపయోగిస్తున్న వినియోగదారులపై తక్షణ ప్రభావం ఉండదని తెలుస్తోంది. ఇప్పటికే విక్రయించిన స్మార్ట్‌ఫోన్లకు సాఫ్ట్‌వేర్‌ అప్‌డేట్లు, సాంకేతిక సేవలు నిర్ణీత కాలపరిమితి వరకు కొనసాగించే అవకాశం ఉందని సమాచారం.

ప్రస్తుతం మార్కెట్లో ఉన్న స్టాక్‌ పూర్తయిన తర్వాత ఆ ప్రాంతాల్లో కొత్త స్మార్ట్‌ఫోన్లను విడుదల చేయకపోవచ్చని నివేదికలు పేర్కొంటున్నాయి. అయితే భారత్‌, చైనా వంటి కీలక మార్కెట్లలో మాత్రం వన్‌ప్లస్‌ తన కార్యకలాపాలను కొనసాగించనున్నట్లు తెలుస్తోంది.

భారత మార్కెట్లో వన్‌ప్లస్‌కు ప్రత్యేక గుర్తింపు ఉంది. ముఖ్యంగా ప్రీమియం ఫీచర్లను తక్కువ ధరల్లో అందించే బ్రాండ్‌గా యువతలో మంచి ఆదరణ పొందింది. దీంతో భారత్‌లో సంస్థ తన ఉనికిని మరింత బలోపేతం చేసే అవకాశం ఉందని పరిశ్రమ వర్గాలు భావిస్తున్నాయి.

వన్‌ప్లస్‌ ప్రస్తుతం చైనాకు చెందిన ఒప్పో గ్రూప్‌లో భాగంగా కొనసాగుతోంది. భవిష్యత్తులో ఒప్పో పరిధిలో తక్కువ ధరల స్మార్ట్‌ఫోన్లు, ట్యాబ్లెట్లు వంటి ఉత్పత్తులపై మరింత దృష్టి పెట్టే అవకాశం ఉందని సమాచారం.

ఇదిలా ఉండగా, స్మార్ట్‌ఫోన్‌ తయారీలో కీలకమైన ర్యామ్‌, చిప్‌ల ధరలు పెరుగుతున్న నేపథ్యంలో వన్‌ప్లస్‌ తన ట్యాబ్‌ ఉత్పత్తుల ధరలను సవరించింది. వన్‌ప్లస్‌ ప్యాడ్‌ గో 2, వన్‌ప్లస్‌ ప్యాడ్‌ లైట్‌ మోడళ్ల ధరలను రూ.1,000 నుంచి రూ.2,000 వరకు పెంచినట్లు తెలుస్తోంది.

గతంలోనూ వన్‌ప్లస్‌ కొన్ని అంతర్జాతీయ మార్కెట్ల నుంచి వైదొలగనుందనే వార్తలు వచ్చినప్పటికీ, అప్పట్లో కంపెనీ వాటిని ఖండించింది. తాజాగా వస్తున్న నివేదికలపై కంపెనీ అధికారిక స్పందన కోసం ఎదురుచూస్తున్నారు.