బిహార్‌లో విద్యార్థులకు గుడ్‌న్యూస్.. జేఈఈ, నీట్‌కు ఉచిత ఆన్‌లైన్ కోచింగ్

బిహార్ ప్రభుత్వం విద్యార్థుల కోసం మరో కీలక విద్యా కార్యక్రమానికి శ్రీకారం చుట్టింది. ప్రభుత్వ పాఠశాలల విద్యార్థులకు నాణ్యమైన బోధన అందించేందుకు ‘బిహార్ స్కూల్ లైవ్ క్లాసెస్’ కార్యక్రమాన్ని ప్రారంభించడంతో పాటు, ఇంజినీరింగ్‌, వైద్య విద్య ప్రవేశ పరీక్షలైన జేఈఈ, నీట్‌కు హాజరయ్యే విద్యార్థులకు ఉచిత ఆన్‌లైన్ కోచింగ్ కార్యక్రమాన్ని అందుబాటులోకి తీసుకొచ్చింది.

రాష్ట్ర ముఖ్యమంత్రి సామ్రాట్‌ చౌధరి గురువారం ఈ రెండు కార్యక్రమాలను ప్రారంభించారు. పట్నాలోని శాస్త్రినగర్‌లో ఉన్న ప్రభుత్వ బాలికల పాఠశాలలో నిర్వహించిన కార్యక్రమంలో ఈ కొత్త విద్యా విధానానికి శ్రీకారం చుట్టారు.

బిహార్ స్కూల్ లైవ్ క్లాసెస్లో భాగంగా రాష్ట్రంలోని ప్రభుత్వ పాఠశాలలను ఒక సెంట్రల్ టీచింగ్ హబ్‌తో అనుసంధానం చేయనున్నారు. ఈ విధానం ద్వారా మారుమూల ప్రాంతాల్లోని విద్యార్థులకు కూడా నిపుణులైన ఉపాధ్యాయుల బోధన అందుబాటులోకి రానుంది.

విద్యార్థులు వీడియో కాన్ఫరెన్స్‌ సౌకర్యం ద్వారా కేంద్ర బోధనా కేంద్రానికి అనుసంధానమై వివిధ సబ్జెక్టులపై నిపుణుల పాఠాలను వినే అవకాశం పొందుతారు. గణితం, సైన్స్‌, ఇతర ముఖ్యమైన సబ్జెక్టుల్లో నాణ్యమైన బోధన అందించడమే ఈ కార్యక్రమం ప్రధాన ఉద్దేశమని అధికారులు తెలిపారు.

ఇక ఇంజినీరింగ్‌, వైద్య విద్యను లక్ష్యంగా పెట్టుకున్న విద్యార్థుల కోసం బిహార్ స్కూల్ ఎగ్జామినేషన్ బోర్డు ఆధ్వర్యంలో జేఈఈ, నీట్ ఉచిత ఆన్‌లైన్ శిక్షణను కూడా ప్రారంభించారు. ఈ శిక్షణలో ప్రవేశ పరీక్షలకు అవసరమైన పాఠ్యాంశాలు, పరీక్ష విధానం, ప్రాక్టీస్‌ సెషన్లు, నిపుణుల మార్గదర్శకత్వం అందించనున్నారు.

ఆర్థికంగా వెనుకబడిన విద్యార్థులు కూడా ఖరీదైన కోచింగ్‌ సెంటర్లపై ఆధారపడకుండా పోటీ పరీక్షలకు సిద్ధం కావాలనే లక్ష్యంతో ఈ కార్యక్రమాన్ని రూపొందించినట్లు ప్రభుత్వం పేర్కొంది.

డిజిటల్‌ సాంకేతికతను ఉపయోగించి గ్రామీణ, ప్రభుత్వ పాఠశాలల విద్యార్థులకు సమాన విద్యా అవకాశాలు కల్పించడమే ఈ కార్యక్రమాల ఉద్దేశమని అధికారులు తెలిపారు. భవిష్యత్తులో మరిన్ని పాఠశాలలను ఈ లైవ్ క్లాస్ వ్యవస్థతో అనుసంధానం చేయనున్నట్లు వెల్లడించారు.