రహానేకు ఘన వీడ్కోలు.. ప్రశంసలతో ముంచెత్తిన క్రికెట్ దిగ్గజాలు

క్రికెట్‌కు వీడ్కోలు పలికిన భారత మాజీ టెస్టు వైస్‌ కెప్టెన్ అజింక్య రహానేపై మాజీలు, ప్రస్తుత క్రికెటర్లు ప్రశంసల వర్షం కురిపిస్తున్నారు. జెర్సీ నంబర్ 278కి వీడ్కోలు చెబుతున్నట్లు రహానే సోషల్ మీడియా వేదికగా ప్రకటించడంతో పలువురు క్రికెట్ ప్రముఖులు ఆయనతో తమ అనుబంధాన్ని, కెరీర్‌లో సాధించిన విజయాలను గుర్తుచేసుకున్నారు.

టీమిండియా స్టార్ బ్యాటర్ రోహిత్ శర్మ రహానే నిబద్ధతను ప్రత్యేకంగా ప్రశంసించాడు. ఎన్నో ఏళ్ల పాటు డ్రెస్సింగ్ రూమ్‌ను పంచుకున్నామని, రహానే ఎంత కష్టపడి పనిచేస్తాడో తనకు తెలుసని పేర్కొన్నాడు. అద్భుతమైన కెరీర్‌ను పూర్తి చేసినందుకు అభినందనలు తెలిపిన రోహిత్.. భవిష్యత్తుకు శుభాకాంక్షలు చెప్పాడు.

సూర్యకుమార్ యాదవ్ కూడా రహానేను ప్రశంసిస్తూ.. మైదానంలో, డ్రెస్సింగ్ రూమ్‌లో ఆయనతో కలిసి ఉండటం ఎంతో గౌరవంగా భావిస్తున్నానని తెలిపాడు. ప్రశాంతమైన స్వభావం, ఆటపట్ల అంకితభావం ఎంతో స్ఫూర్తిదాయకమని పేర్కొంటూ, రహానే తదుపరి జీవిత ప్రయాణం మరింత ఆనందంగా సాగాలని ఆకాంక్షించాడు.

క్రికెట్ దిగ్గజం సచిన్ టెండూల్కర్ కూడా రహానే కెరీర్‌ను గుర్తుచేసుకున్నాడు. అవకాశాల కోసం ఎప్పుడూ వెంటపడకుండా, జట్టు కోసం కష్టపడేందుకు సిద్ధంగా ఉండేవాడని ప్రశంసించాడు. ముఖ్యంగా ఆస్ట్రేలియా పర్యటనలో రహానే చూపించిన నాయకత్వం, సంయమనం, పోరాట స్ఫూర్తిని సచిన్ కొనియాడాడు.మాజీ క్రికెటర్ ప్రవీణ్ ఆమ్రే రహానేను ‘సైలెంట్ వారియర్’గా అభివర్ణించాడు. జట్టుకు అవసరమైన సమయంలో ముందుండి పోరాడే స్వభావం ఆయనదని, ఆస్ట్రేలియాలో భారత జట్టును విజయవంతంగా నడిపించిన తీరు అద్భుతమని పేర్కొన్నాడు.

రహానే కెరీర్‌లో ఆస్ట్రేలియా పర్యటన ప్రత్యేక స్థానాన్ని సంపాదించుకుంది. ముఖ్యంగా ప్రతికూల పరిస్థితుల్లో జట్టును ముందుండి నడిపించడం, కీలక సందర్భాల్లో బ్యాట్‌తో రాణించడం ద్వారా భారత క్రికెట్‌లో తనకంటూ ప్రత్యేక గుర్తింపు తెచ్చుకున్నాడు. ఆయన రిటైర్మెంట్ సందర్భంగా పలువురు క్రికెటర్లు చేసిన వ్యాఖ్యలు రహానే కెరీర్‌కు లభించిన గౌరవానికి నిదర్శనంగా నిలిచాయి.