విదేశీ పౌరుల కదలికలపై చైనా నిఘా.. డేటా లీక్‌తో వెలుగులోకి సంచలన విషయాలు

చైనా ప్రపంచవ్యాప్తంగా భారీ స్థాయిలో నిఘా వ్యవస్థను నిర్వహిస్తోందని అమెరికాకు చెందిన ఓ మీడియా సంస్థ ప్రచురించిన కథనం సంచలనం రేపుతోంది. చైనా తన సొంత పౌరులతో పాటు దేశాన్ని సందర్శించే విదేశీయులపైనా నిఘా ఉంచుతోందని, వారి వ్యక్తిగత వివరాలు, ప్రయాణ సమాచారం, కదలికలను సేకరిస్తోందని ఆ కథనం పేర్కొంది.

సైబర్‌ సెక్యూరిటీ పరిశోధకుడు మార్క్‌ హోఫర్‌ చైనా నిఘా వ్యవస్థపై పరిశోధన చేస్తున్న సమయంలో తనకు సంబంధించిన వ్యక్తిగత సమాచారం ఓ వెబ్‌సైట్‌లో కనిపించడంతో ఈ వ్యవహారం వెలుగులోకి వచ్చినట్లు సమాచారం. అందులో ఆయన పేరు, ఫొటో, పాస్‌పోర్ట్‌ నంబర్‌, గతంలో చైనా పర్యటనలో ఉపయోగించిన మొబైల్‌ నంబర్‌ వంటి వివరాలు ఉన్నట్లు తెలుస్తోంది.

ప్రత్యేకంగా చైనాలోని జాంగ్‌జియాకోవు ప్రాంతాన్ని సందర్శించిన విదేశీయుల వివరాలు ఈ డేటాబేస్‌లో ఉన్నట్లు నివేదిక పేర్కొంది. భారత్‌, పాకిస్థాన్‌, అమెరికా, బ్రిటన్‌, ఆస్ట్రేలియా, కెనడా, న్యూజిలాండ్‌ సహా పలు దేశాలకు చెందిన పౌరుల సమాచారం ఇందులో ఉన్నట్లు తెలిపింది. విదేశీ విద్యార్థులకు సంబంధించిన వివరాలు కూడా నమోదు చేసినట్లు సమాచారం.

కెమెరాలు, మొబైల్‌ ఫోన్‌ సిగ్నల్స్‌ వంటి సాంకేతికతల ద్వారా వ్యక్తుల కదలికలను ట్రాక్‌ చేసినట్లు ఆరోపణలు ఉన్నాయి. వారు ఎక్కడికి వెళ్తున్నారు, ఏ రవాణా మార్గాలను ఉపయోగిస్తున్నారు, విమానాలు లేదా రైళ్లలో ఏ సీట్లలో ప్రయాణిస్తున్నారు వంటి వివరాలు కూడా సేకరించినట్లు కథనం పేర్కొంది. కొందరు విదేశీయులు చైనా నుంచి స్వదేశాలకు తిరిగి వెళ్లిన తర్వాత కూడా వారి సమాచారం నిఘా వ్యవస్థలో కొనసాగినట్లు తెలిపింది.

ఈ నిఘా వ్యవస్థకు చైనా పోలీసు విభాగాలకు సాంకేతిక పరికరాలను అందించే ఓ సంస్థతో సంబంధాలు ఉన్నట్లు కూడా నివేదికలో పేర్కొన్నారు. అయితే ఈ ఆరోపణలపై చైనా ప్రభుత్వం నుంచి ఇప్పటివరకు అధికారిక స్పందన వెలువడలేదు. వెబ్‌సైట్‌లోని సమాచారం అనంతరం తొలగించబడినప్పటికీ, పరిశోధకుడు ముందుగానే డేటాను భద్రపరచడంతో ఈ వ్యవహారం వెలుగులోకి వచ్చినట్లు తెలుస్తోంది.