జీఎంఆర్‌ ఎయిర్‌పోర్ట్స్‌ ఆర్థిక ఫలితాల్లో భారీ మార్పు.. నష్టాల నుంచి లాభాల్లోకి

విమానాశ్రయాల నిర్వహణ సంస్థ జీఎంఆర్‌ ఎయిర్‌పోర్ట్స్‌ లిమిటెడ్‌ జూన్‌ త్రైమాసికంలో మెరుగైన ఆర్థిక ఫలితాలను నమోదు చేసింది. కంపెనీ రూ.4,085 కోట్ల ఆదాయంపై రూ.148 కోట్ల నికరలాభాన్ని ఆర్జించింది.

గత ఆర్థిక సంవత్సరం ఇదే త్రైమాసికంలో కంపెనీ రూ.3,321.23 కోట్ల ఆదాయంపై రూ.137.11 కోట్ల నష్టాన్ని నమోదు చేసింది. దీంతో ఏడాది వ్యవధిలో నష్టాల నుంచి లాభాల్లోకి కంపెనీ మారింది.

రూ.5,000 కోట్ల వరకు నిధుల సమీకరణ :

వ్యూహాత్మక అవసరాల కోసం సెక్యూరిటీల జారీ ద్వారా గరిష్ఠంగా రూ.5,000 కోట్ల వరకు నిధులు సమీకరించేందుకు జీఎంఆర్‌ ఎయిర్‌పోర్ట్స్‌ బోర్డు అనుమతి ఇచ్చింది. పాత బాండ్ల పునర్‌వ్యవస్థీకరణలో భాగంగా రూ.1,500 కోట్ల విలువైన కొత్త ఎన్‌సీడీ బాండ్ల జారీకి కూడా ఆమోదం లభించింది.

దిల్లీ, హైదరాబాద్‌ విమానాశ్రయాల్లో ప్రారంభించిన డ్యూటీ ఫ్రీ వ్యాపారాలు విమానయేతర ఆదాయ వృద్ధికి దోహదం చేశాయని సంస్థ తెలిపింది. జీఎంఆర్‌ లాజిస్టిక్స్‌ పార్కులోని 70 శాతం ఈక్విటీ వాటాను జీహెచ్‌ఐఏఎల్‌ కొనుగోలు చేయడంతో అది పూర్తిస్థాయి అనుబంధ సంస్థగా మారింది.అదేవిధంగా దిల్లీ ఎయిర్‌పోర్ట్‌లోని సెలెబీ గ్రూపు కార్గో టెర్మినల్‌ లైసెన్సును జీఎంఆర్‌ ఎయిర్‌పోర్ట్స్‌ దక్కించుకుని కొత్త ఒప్పందాన్ని కుదుర్చుకుంది.

హైదరాబాద్‌ ఎయిర్‌పోర్ట్‌ ప్రయాణికుల రద్దీ తగ్గుదల :

ఈ ఏడాది ఏప్రిల్‌-జూన్‌ మధ్య హైదరాబాద్‌ రాజీవ్‌గాంధీ అంతర్జాతీయ విమానాశ్రయం నుంచి 71 లక్షల మంది ప్రయాణించారు. గతేడాది ఇదే కాలంలో ఈ సంఖ్య 81 లక్షలుగా ఉంది.పశ్చిమాసియాలో నెలకొన్న అనిశ్చిత పరిస్థితులు, విమాన ఛార్జీల పెరుగుదల కారణంగా ప్రయాణికుల రద్దీ కొంత మేర తగ్గిందని సంస్థ వెల్లడించింది. భవిష్యత్తులో విమానాశ్రయ సేవల పరిధిని విస్తరించడంతో పాటు ఆదాయ మార్గాలను మరింత బలోపేతం చేస్తామని జీఎంఆర్‌ ఎయిర్‌పోర్ట్స్‌ మేనేజింగ్‌ డైరెక్టర్‌, సీఈఓ గ్రంధి కిరణ్‌ కుమార్‌ తెలిపారు.