ప్రతి నెలా పీరియడ్స్‌ లేట్‌ అవుతున్నాయా? కారణం ఇవి కావచ్చు!

నెలసరి ఒకసారి ముందుగా లేదా ఆలస్యంగా రావడం కొన్నిసార్లు సాధారణమే. అయితే ప్రతి నెలా పీరియడ్స్‌లో మార్పులు కనిపిస్తుంటే మాత్రం కారణాన్ని గుర్తించడం అవసరం. హార్మోన్ల అసమతుల్యతతో పాటు జీవనశైలిలో మార్పులు, ఒత్తిడి, ఆహారపు అలవాట్లు, అధిక వ్యాయామం, కొన్ని మందులు, నిద్రలేమి వంటి అంశాలు కూడా రుతుచక్రంపై ప్రభావం చూపే అవకాశం ఉందని నిపుణులు చెబుతున్నారు.

తీవ్రమైన ఒత్తిడి ఉన్నప్పుడు శరీరంలోని హార్మోన్ల సమతుల్యతలో మార్పులు రావచ్చు. దీని ప్రభావం రుతుచక్రంపై పడి పీరియడ్స్‌ ఆలస్యమయ్యే అవకాశం ఉంటుంది. అందువల్ల తరచూ నెలసరి ఆలస్యమవుతుంటే ఇటీవల ఒత్తిడి, ఆందోళన పెరిగిందా అనే విషయాన్ని పరిశీలించాలి.

బరువు తగ్గేందుకు కఠినమైన డైటింగ్‌ పాటించడం, తగినంత ఆహారం తీసుకోకపోవడం వల్ల శరీరానికి అవసరమైన పోషకాలు, శక్తి అందకపోవచ్చు. దీనివల్ల హార్మోన్ల పనితీరులో మార్పులు ఏర్పడి నెలసరి క్రమం తప్పే అవకాశం ఉంటుంది. ఆహారంలో ఇటీవల చేసిన మార్పులను కూడా గమనించాలి.

అలాగే ఒక్కసారిగా అధిక తీవ్రతతో వ్యాయామం చేయడం, శరీరానికి సరిపడా ఆహారం తీసుకోకుండా ఎక్కువగా వర్కవుట్‌ చేయడం వల్ల కూడా రుతుచక్రం ప్రభావితమయ్యే అవకాశం ఉంది. బరువు ఒక్కసారిగా పెరగడం లేదా తగ్గడం కూడా కొంతమందిలో నెలసరి సమస్యలకు కారణం కావచ్చు.

కొన్ని మందులు వాడుతున్నప్పుడు కూడా పీరియడ్స్‌లో మార్పులు కనిపించవచ్చు. ముఖ్యంగా గర్భనిరోధక మాత్రలు, కొన్ని మానసిక ఆరోగ్య సంబంధిత మందులు, థైరాయిడ్‌ లేదా ఇతర ఆరోగ్య సమస్యలకు ఉపయోగించే మందులు రుతుచక్రాన్ని ప్రభావితం చేసే అవకాశం ఉంది. కొత్తగా మందులు ప్రారంభించిన తర్వాత మార్పులు గమనిస్తే సంబంధిత వైద్యుడిని సంప్రదించి కారణాన్ని తెలుసుకోవాలి.

నిద్రలేమి, రాత్రి వేళల్లో పని చేయడం, మారిన నిద్ర సమయాలు కూడా శరీరంలోని జీవ గడియారం, హార్మోన్ల సమతుల్యతపై ప్రభావం చూపవచ్చు. అందువల్ల పీరియడ్స్‌ తరచూ ఆలస్యమవుతుంటే నిద్ర, ఆహారం, వ్యాయామం, ఒత్తిడి వంటి రోజువారీ అలవాట్లను ఒకసారి పరిశీలించడం ఉపయోగకరం.

నెలసరి సమస్యలు పదేపదే కొనసాగుతున్నా, అసాధారణ రక్తస్రావం, తీవ్రమైన నొప్పి లేదా ఇతర ఆరోగ్య సమస్యలు ఉంటే స్వయంగా కారణాన్ని నిర్ణయించుకోకుండా వైద్యులను సంప్రదించడం మంచిది.