పసిబిడ్డతో అత్తింటి ఎదుట గర్భిణి కన్నీటి పోరాటం

ఒడిలో మూడేళ్ల పాప.. కడుపులో మరో బిడ్డ.. అయినా అత్తింటి గడప వద్దే కన్నీటి పోరాటం చేయాల్సిన పరిస్థితి ఓ గర్భిణికి ఎదురైంది. భర్త, అత్తమామలు తనను విడాకులు ఇవ్వాలంటూ వేధిస్తున్నారని ఆరోపిస్తూ ఐదో నెల గర్భిణి అత్తింటి ఎదుట బైఠాయించింది. తనను తరచూ పుట్టింటికి పంపిస్తున్నారని, భర్త మరో వివాహం చేసుకునేందుకే తనను దూరం చేసేందుకు ప్రయత్నిస్తున్నారని ఆవేదన వ్యక్తం చేసింది.

ఈ ఘటన మండలంలోని కొడవలూరు రైల్వేగేట్‌ కాలనీలో సోమవారం చోటుచేసుకుంది. బాధితురాలు చెంగమ్మ తెలిపిన వివరాల ప్రకారం.. కొడవలూరు రైల్వేగేట్‌ కాలనీకి చెందిన జయకుమార్‌ వరికోత యంత్రం డ్రైవర్‌గా పనిచేస్తున్నారు. వరికోతల సీజన్‌లో వృత్తిరీత్యా వివిధ జిల్లాలకు వెళుతుంటారు. సుమారు మూడేళ్ల క్రితం ఒంగోలు వెళ్లిన సమయంలో అక్కడి పూజల చెంగమ్మతో ఆయనకు పరిచయం ఏర్పడింది. ఆ పరిచయం ప్రేమగా మారడంతో పెద్దల సమక్షంలో 2023 ఆగస్టు 30న కొడవలూరు విష్ణు ఆలయంలో వివాహం చేసుకున్నారు.

వివాహం అనంతరం దంపతులకు ఓ కుమార్తె జన్మించింది. ప్రస్తుతం ఆ చిన్నారికి మూడేళ్లు. కాగా, చెంగమ్మ ప్రస్తుతం ఐదో నెల గర్భిణిగా ఉన్నారు.

గత ఐదు నెలలుగా భర్త తనను మానసికంగా వేధిస్తున్నారని చెంగమ్మ ఆరోపించారు. విడాకులు ఇవ్వాలని ఒత్తిడి చేస్తూ తరచూ పుట్టింటికి పంపిస్తున్నారని తెలిపారు. వృత్తిరీత్యా మచిలీపట్నం వెళ్లిన సమయంలో జయకుమార్‌కు మరో యువతితో పరిచయం ఏర్పడిందని, ఆమెను వివాహం చేసుకునేందుకే తన నుంచి విడిపోవాలని చూస్తున్నారని ఆరోపించారు.

తన భర్తకు అత్తమామలు కూడా మద్దతుగా నిలుస్తూ తనను వేధిస్తున్నారని చెంగమ్మ వాపోయారు. ప్రస్తుతం తాను గర్భిణినని, మూడేళ్ల కుమార్తె కూడా ఉందని.. ఇలాంటి పరిస్థితుల్లో తనను ఒంటరిగా వదిలేయడం సరికాదని ఆవేదన వ్యక్తం చేశారు.

తన సమస్యకు పరిష్కారం లభించకపోవడంతో సోమవారం చెంగమ్మ తన తల్లి, పిన్నమ్మతో కలిసి మూడేళ్ల కుమార్తెను వెంటబెట్టుకుని జయకుమార్‌ ఇంటి ఎదుటకు చేరుకున్నారు. తనను అత్తింట్లోకి అనుమతించాలని, తనకు న్యాయం చేయాలని కోరుతూ అక్కడే బైఠాయించారు.

తనను భర్తతో కలిసి కాపురం చేసుకునేలా చూడాలని, పిల్లల భవిష్యత్తును దృష్టిలో ఉంచుకుని సమస్యను పరిష్కరించాలని ఆమె కోరారు. దీంతో అక్కడ కొంతసేపు ఉద్రిక్త వాతావరణం నెలకొంది.

భర్త వేధింపులపై గతంలోనూ ఒంగోలు పోలీస్‌స్టేషన్‌లో ఫిర్యాదు చేసినట్లు చెంగమ్మ తెలిపారు. అప్పట్లో పోలీసులు ఇరువర్గాలను పిలిపించి కౌన్సెలింగ్‌ ఇచ్చి పంపించారని చెప్పారు. కౌన్సెలింగ్‌ అనంతరం కొద్దిరోజులు పరిస్థితి సజావుగానే ఉన్నప్పటికీ.. ఆ తర్వాత మళ్లీ భర్త వేధింపులు మొదలయ్యాయని ఆమె ఆరోపించారు.

చెంగమ్మ అత్తింటి ఎదుట బైఠాయించిన విషయం తెలుసుకున్న పోలీసులు అక్కడికి చేరుకున్నారు. స్థానిక సీఐ, ఎస్సైలు విధుల్లో భాగంగా బయటకు వెళ్లడంతో అందుబాటులో లేకపోవడంతో పోలీసు సిబ్బంది సంఘటనా స్థలానికి చేరుకుని పరిస్థితిని పరిశీలించారు.

అనంతరం బాధితురాలితో పాటు అత్తింటి వారిని పోలీస్‌స్టేషన్‌కు తీసుకెళ్లారు. జయకుమార్‌ వరికోతల నిమిత్తం నాయుడుపేట వెళ్లి ఉండటంతో ఆయన్ను కూడా కొడవలూరు పోలీస్‌స్టేషన్‌కు రావాలని పోలీసులు సమాచారం అందించారు.

ఇరువర్గాల వాదనలు తెలుసుకున్న పోలీసులు కౌన్సెలింగ్‌ నిర్వహించి సమస్యను సామరస్యంగా పరిష్కరించేందుకు ప్రయత్నిస్తున్నారు. దంపతులు కలిసి ఉండేలా చేయడంతో పాటు కుటుంబ సమస్యకు పరిష్కారం చూపే దిశగా చర్యలు చేపడుతున్నట్లు తెలిపారు.