‘మీ నాన్న నాకు మంచి ఫ్రెండ్‌ రా.. కూల్‌డ్రింక్‌ ఇప్పిస్తా!’

‘మీ నాన్న నాకు బాగా తెలుసు.. ఆయన నాకు మంచి స్నేహితుడు. బజారుకు వెళ్దాం రా.. నీకు కూల్‌డ్రింక్‌ ఇప్పిస్తా’ అంటూ ఓ బాలుడిని నమ్మించిన ఓ అగంతకుడు అతడి సైకిల్‌తో ఉడాయించిన ఘటన గణపవరం గ్రామంలో చోటుచేసుకుంది. బాలుడికి కూల్‌డ్రింక్‌ ఇప్పించి, గ్లాసులు తీసుకొస్తానంటూ సైకిల్‌తో అక్కడి నుంచి వెళ్లిపోయాడు. ఈ ఘటనకు సంబంధించిన దృశ్యాలు సీసీ కెమెరాలో నమోదయ్యాయి.

గ్రామానికి చెందిన ఆకునూరి నాగేశ్వరరావు కుమారుడు పవన్‌కుమార్‌ స్థానిక జెడ్పీ ఉన్నత పాఠశాలలో ఐదో తరగతి చదువుతున్నాడు. శుక్రవారం సాయంత్రం సుమారు 5 గంటల సమయంలో స్నేహితులతో కలిసి ఆడుకునేందుకు పవన్‌కుమార్‌ సైకిల్‌పై ఇంటి నుంచి బయలుదేరాడు. సినిమాహాల్‌ రోడ్డులో వెళ్తుండగా ఓ యువకుడు అతడిని ఆపి మాటలు కలిపాడు.

‘మీ నాన్న నాకు తెలుసు.. ఆయన నా స్నేహితుడు. బజారుకు వెళ్దాం రా’ అంటూ బాలుడితో చెప్పాడు. అతడి మాటలను నమ్మిన పవన్‌కుమార్‌ ఆ యువకుడితో కలిసి సైకిల్‌పై వెళ్లాడు. బాలుడిని సైకిల్‌పై వెనుక కూర్చోబెట్టుకుని మెయిన్‌రోడ్డులోని ఓ బడ్డీ దుకాణం వద్దకు తీసుకెళ్లాడు.

అక్కడ బాలుడికి కూల్‌డ్రింక్‌ ఇప్పించాడు. అనంతరం ‘గ్లాసులు తీసుకొస్తా.. ఇక్కడే ఉండు’ అని చెప్పి బాలుడి సైకిల్‌ను తీసుకుని అక్కడి నుంచి వెళ్లిపోయాడు. ఎంతసేపటికీ అతడు తిరిగి రాకపోవడంతో పవన్‌కుమార్‌ ఆందోళనకు గురయ్యాడు. అనంతరం ఇంటికి వెళ్లి జరిగిన విషయాన్ని తండ్రి నాగేశ్వరరావుకు వివరించాడు.

దీంతో నాగేశ్వరరావు గ్రామంలో అగంతకుడి కోసం వెతికారు. అతడి ఆచూకీ లభించకపోవడంతో సమీపంలోని ఓ ఇంటి సీసీ కెమెరా ఫుటేజీని పరిశీలించారు. అందులో బాలుడిని సైకిల్‌పై ఎక్కించుకుని తీసుకెళ్తున్న దృశ్యాలు రికార్డైనట్లు గుర్తించారు.

ఘటనపై బాలుడి తండ్రి నాగేశ్వరరావు సోమవారం పోలీసులకు ఫిర్యాదు చేశారు. సీసీ కెమెరా ఫుటేజీ ఆధారంగా అగంతకుడిని గుర్తించే పనిలో పోలీసులు నిమగ్నమయ్యారు. బాలుడిని మాయమాటలతో నమ్మించి సైకిల్‌ తీసుకెళ్లిన ఘటన స్థానికంగా చర్చనీయాంశమైంది. పిల్లలను అపరిచితులు పలకరించినప్పుడు వారి మాటలను నమ్మకుండా, ఎక్కడికి వెళ్తున్నారనే విషయాన్ని వెంటనే తల్లిదండ్రులకు తెలియజేయాలని స్థానికులు సూచిస్తున్నారు.