వ్యాధుల ముప్పును ముందే పసిగట్టాలి

ప్రజారోగ్య పరిరక్షణలో సాంకేతికతను విస్తృతంగా వినియోగిస్తూ వ్యాధుల ముప్పును ముందుగానే గుర్తించి నివారణ చర్యలు చేపట్టాలని వైద్య ఆరోగ్య శాఖ కార్యదర్శి జి.వీరపాండియన్‌ సూచించారు. వ్యాధుల పర్యవేక్షణ, ముందస్తు అంచనా, సమాచార విశ్లేషణ ఆధారంగా ప్రభుత్వ నిర్ణయాలను మరింత సమర్థంగా అమలు చేయాల్సిన అవసరం ఉందన్నారు.

విజయవాడలో నిర్వహించిన ‘డిసీజ్‌ మానిటరింగ్, డెసిషన్‌ మేకింగ్‌ సెంటర్‌’ కార్యకలాపాలు, విధివిధానాలపై భాగస్వామ్య సంస్థలతో జరిగిన కార్యశాలలో ఆయన మాట్లాడారు. ప్రజారోగ్య కార్యక్రమాల రూపకల్పన నుంచి అమలు వరకు అందుబాటులో ఉన్న సమాచారాన్ని సమర్థంగా వినియోగించుకోవాలని పేర్కొన్నారు.

ఆరోగ్య శాఖలో ఇప్పటికే అందుబాటులో ఉన్న సమాచారాన్ని ఆధారంగా చేసుకుని రూపొందించిన ‘అవేర్‌’ వేదిక ద్వారా సంక్రమిక, అసంక్రమిక వ్యాధుల పరిస్థితులను ముందుగానే అంచనా వేసే అవకాశం ఉందన్నారు. వివిధ ప్రాంతాల నుంచి సేకరించిన సమాచారాన్ని మ్యాప్‌ల రూపంలో విశ్లేషించడం ద్వారా వ్యాధుల ప్రభావం అధికంగా ఉండే ప్రాంతాలను ముందుగానే గుర్తించవచ్చని తెలిపారు.

వ్యాధి ప్రభావిత ప్రాంతాలను ముందుగానే గుర్తించడం వల్ల అవసరమైన వైద్య సిబ్బంది, మందులు, పరీక్షలు, ప్రజలకు అవగాహన కార్యక్రమాలు వంటి చర్యలను వేగంగా చేపట్టేందుకు అవకాశం ఉంటుందని వివరించారు. రాష్ట్రస్థాయిలో అభివృద్ధి చేసే సాంకేతిక పరిజ్ఞానాన్ని క్షేత్రస్థాయిలో సమర్థంగా ఉపయోగించినప్పుడే ఆశించిన ఫలితాలు సాధ్యమవుతాయని స్పష్టం చేశారు.

కార్యశాలలో వ్యాధులకు సంబంధించిన సమాచార సేకరణ, విశ్లేషణ, పరిస్థితుల అంచనా, ముందస్తు గుర్తింపు, ప్రభుత్వ నిర్ణయాల అమలుకు అవసరమైన విధానపరమైన సూచనలపై నిపుణులు, వైద్య ఆరోగ్య శాఖ అధికారులు చర్చించారు. ప్రాధాన్య అంశాలను గుర్తించి వాటిపై అధ్యయనం చేసేందుకు నోడల్‌ అధికారులను నియమించాలని నిర్ణయించారు.

అలాగే ఆరు నుంచి పన్నెండు నెలల కార్యాచరణ ప్రణాళిక రూపొందించి, వ్యాధుల పర్యవేక్షణ వ్యవస్థను మరింత బలోపేతం చేయాలని సమావేశంలో నిర్ణయించారు. సాంకేతికత, డేటా విశ్లేషణ, వైద్య నిపుణుల సూచనలను సమన్వయం చేసి ప్రజలకు మెరుగైన ఆరోగ్య సేవలు అందించే దిశగా చర్యలు చేపట్టాలని అధికారులు పేర్కొన్నారు.