రూ.350 కోట్ల బ్రాండ్‌.. కానీ చర్చంతా కత్రినా బరువుపైనే!

బాలీవుడ్‌ స్టార్‌ హీరోయిన్‌ కత్రినా కైఫ్‌ మరోసారి సోషల్‌ మీడియాలో చర్చనీయాంశంగా మారారు. అయితే ఈసారి ఆమె కొత్త సినిమా, ఫ్యాషన్‌ లుక్‌ లేదా వ్యాపార విజయాల గురించి కాదు.. ఆమె శరీరాకృతిపై వచ్చిన వ్యాఖ్యలే చర్చకు కారణమయ్యాయి. ఇటీవల అంబానీ కుటుంబం నిర్వహించిన వినాయక చవితి వేడుకలకు భర్త విక్కీ కౌశల్‌తో కలిసి కత్రినా హాజరయ్యారు. ఈ సందర్భంగా తీసిన ఫొటోలు, వీడియోలు సోషల్‌ మీడియాలో వైరల్‌గా మారాయి.

కత్రినా లుక్‌పై పలువురు అభిమానులు ప్రశంసలు కురిపించగా.. మరికొందరు ఆమె బరువు, శరీరాకృతిలో వచ్చిన మార్పులపై కామెంట్లు చేశారు. గతంలో తీసిన ఫొటోలతో పోలుస్తూ కొందరు ట్రోలింగ్‌కు దిగారు. దీంతో కత్రినా అభిమానులు, పలువురు మహిళలు ఆమెకు మద్దతుగా నిలుస్తున్నారు.

ప్రసవం తర్వాత మహిళల శరీరంలో అనేక సహజమైన మార్పులు చోటుచేసుకోవడం సాధారణమే. ప్రసవానంతరం మునుపటి శరీరాకృతికి తిరిగి రావడానికి పట్టే సమయం కూడా ప్రతి మహిళకు ఒకేలా ఉండదు. అందువల్ల ఒక మహిళను కేవలం ఆమె రూపం లేదా బరువు ఆధారంగా అంచనా వేయడం సరికాదంటూ అభిమానులు పేర్కొంటున్నారు.

కత్రినా కైఫ్‌ 2003లో ‘బూమ్‌’ సినిమాతో సినీ ప్రయాణాన్ని ప్రారంభించారు. దాదాపు రెండు దశాబ్దాలుగా బాలీవుడ్‌లో కొనసాగుతూ పలు విజయవంతమైన చిత్రాల్లో నటించారు. నటిగా గుర్తింపు తెచ్చుకోవడంతో పాటు ‘కే బ్యూటీ’ బ్రాండ్‌ ద్వారా వ్యాపార రంగంలోనూ తనదైన ముద్ర వేశారు.

2024లో వచ్చిన జీక్యూ ఇండియా నివేదిక ప్రకారం.. కత్రినా ఒక్కో ప్రాజెక్ట్‌కు రూ.10 కోట్లకు పైగా పారితోషికం తీసుకుంటారని సమాచారం. మరోవైపు ఆమెకు చెందిన కే బ్యూటీ బ్రాండ్‌ 2025-26 ఆర్థిక సంవత్సరంలో సుమారు రూ.350 కోట్ల అమ్మకాల విలువను నమోదు చేసినట్లు అంచనాలు వెలువడ్డాయి.

ఇన్ని విజయాలు సాధించిన నటిపై చర్చ ఆమె బరువు చుట్టూ మాత్రమే సాగడంపై అభిమానులు ప్రశ్నిస్తున్నారు. ఒక మహిళను ఆమె రూపంతో కాకుండా ప్రతిభ, వ్యక్తిత్వం, వృత్తిపరమైన విజయాలతో చూడాలంటూ సోషల్‌ మీడియాలో తమ అభిప్రాయాలను వ్యక్తం చేస్తున్నారు.