మనమిత్ర సేవలకు మరింత విస్తరణ.. ప్రత్యేక యాప్ అభివృద్ధికి గ్రీన్ సిగ్నల్

ప్రభుత్వ సేవలను ప్రజలకు మరింత సులభంగా, వేగంగా అందించేందుకు ప్రత్యేక మొబైల్ యాప్‌ను అభివృద్ధి చేయాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. ప్రస్తుతం మనమిత్ర (WhatsApp Governance) ద్వారా అందుతున్న ప్రభుత్వ సేవలను మరింత విస్తరించి, అన్ని సేవలను ఒకే వేదికపై అందుబాటులోకి తీసుకురావాలని సూచించారు.

మంగళవారం క్యాంప్ కార్యాలయంలో ఆర్టీజీఎస్ (RTGS) మరియు వివిధ శాఖల క్షేత్రస్థాయి పనితీరుపై నిర్వహించిన సమీక్ష సమావేశంలో సీఎం పలు కీలక అంశాలపై దిశానిర్దేశం చేశారు. మనమిత్ర వాట్సాప్ గవర్నెన్స్ ద్వారా లభిస్తున్న సేవలపై ప్రజల్లో విస్తృత అవగాహన కల్పించాలని, గ్రామీణ ప్రాంతాల్లో కూడా పట్టణాల మాదిరిగానే అన్న క్యాంటీన్ల సేవలు అందుబాటులో ఉండేలా చర్యలు చేపట్టాలని అధికారులను ఆదేశించారు.

ప్రజలకు సరఫరా చేసే తాగునీటి నాణ్యతపై ప్రత్యేక శ్రద్ధ చూపాలని, ప్రతిరోజూ నీటి నమూనాలు సేకరించి పరీక్షలు నిర్వహించాలని సూచించారు. పరిశుభ్రమైన పరిసరాల కోసం ప్రజల భాగస్వామ్యాన్ని పెంచేలా వినూత్న అవగాహన కార్యక్రమాలు చేపట్టాలని, ప్రకృతి సంరక్షణతో పాటు పర్యావరణ పరిరక్షణకు ప్రాధాన్యం ఇవ్వాలని పేర్కొన్నారు.

‘జలధార’ కార్యక్రమం ద్వారా స్పష్టమైన ఫలితాలు కనిపించేలా చర్యలు తీసుకోవాలని, వర్షాకాలంలో చెరువులు, కుంటలు నిండేలా ముందస్తు ప్రణాళికలు సిద్ధం చేయాలని సీఎం ఆదేశించారు. ప్రభుత్వ భూముల రక్షణ కోసం సాంకేతికతను వినియోగించాలని, అనంతపురం జిల్లాలో అమలవుతున్న పైలట్ ప్రాజెక్టును పరిశీలించి రాష్ట్రవ్యాప్తంగా అమలు చేసే అవకాశాలను అధ్యయనం చేయాలని సూచించారు.

రాష్ట్రంలో గంజాయి నిర్మూలనకు మూలస్థాయిలో చర్యలు చేపట్టాలని, మహిళలపై నేరాలను అరికట్టేందుకు కఠిన చర్యలు తీసుకోవాలని అధికారులకు స్పష్టం చేశారు. సుపరిపాలనలో భాగంగా ఆర్టీజీఎస్, అవేర్ వంటి ఆధునిక వ్యవస్థల ద్వారా పరిపాలనను మరింత పారదర్శకంగా, సమర్థవంతంగా తీర్చిదిద్దాలని అన్నారు.

రాష్ట్రంలో అమలవుతున్న సాంకేతిక ఆధారిత పరిపాలనా విధానాలపై కేంద్ర ప్రభుత్వం కూడా ఆసక్తి చూపుతోందని, ఈ వినూత్న నమూనాలను త్వరలో దిల్లీలో జరగనున్న నీతి ఆయోగ్ సమావేశంలో ప్రదర్శించాలని సీఎం పేర్కొన్నారు.