భారత్‌లో యాపిల్ జోరు..ఐఫోన్ తయారీలో భారీ పెరుగుదల!!

ప్రపంచంలోనే రెండో అతిపెద్ద స్మార్ట్‌ఫోన్ మార్కెట్‌గా ఎదిగిన భారత్‌లో యాపిల్ (Apple) తన ఉత్పత్తి కార్యకలాపాలను వేగంగా విస్తరిస్తోంది. తాజాగా వెలువడిన బ్లూమ్‌బెర్గ్ నివేదికల ప్రకారం, ప్రపంచవ్యాప్తంగా విక్రయిస్తున్న ఐఫోన్లలో దాదాపు 25 శాతం భారత్‌లోనే తయారవుతున్నాయి. దేశంలో ఐఫోన్ తయారీ గత ఏడాదితో పోలిస్తే 2025లో సుమారు 53 శాతం పెరిగినట్లు సమాచారం.

అమెరికా–చైనా మధ్య కొనసాగుతున్న వాణిజ్య ఉద్రిక్తతలు, ముఖ్యంగా అమెరికా అధ్యక్షుడు డొనాల్డ్ ట్రంప్ చైనాపై విధించిన భారీ సుంకాలు కారణంగా యాపిల్ తన ఉత్పత్తి కేంద్రాలను ఇతర దేశాలకు విస్తరించే ప్రయత్నం చేస్తోంది. ఈ నేపథ్యంలో భారత్ యాపిల్‌కు ప్రధాన తయారీ కేంద్రంగా మారుతోంది.

బ్లూమ్‌బెర్గ్ అంచనాల ప్రకారం యాపిల్ సంస్థ ప్రపంచవ్యాప్తంగా ప్రతి ఏడాది గరిష్ఠంగా 230 మిలియన్ ఐఫోన్లను తయారు చేస్తుంది. 2024లో భారత్‌లో సుమారు 36 మిలియన్ ఐఫోన్లు అసెంబుల్ చేయగా, 2025లో ఆ సంఖ్య 55 మిలియన్లకు చేరినట్లు తెలుస్తోంది. దీంతో భారత్ ఐఫోన్ తయారీలో కీలక పాత్ర పోషిస్తున్న దేశంగా మారుతోంది.

ప్రధాని నరేంద్ర మోదీ ప్రభుత్వం ప్రవేశపెట్టిన ఉత్పత్తి-సంబంధిత ప్రోత్సాహక (PLI) పథకం కూడా యాపిల్ విస్తరణకు పెద్దగా సహాయపడింది. ఈ పథకం ద్వారా అందుతున్న ప్రోత్సాహకాలు, సబ్సిడీలు కంపెనీలకు లాజిస్టిక్స్ ఖర్చులను తగ్గించడంలో ఉపయోగపడుతున్నాయి.

అయితే ప్రస్తుతం స్మార్ట్‌ఫోన్ తయారీకి సంబంధించిన ఈ సబ్సిడీలు మార్చి 31తో ముగియనున్న నేపథ్యంలో, ఎగుమతులను పెంచేలా కొత్త ప్రోత్సాహకాలు ఇవ్వాలని యాపిల్ సంస్థ కేంద్ర ప్రభుత్వంతో చర్చలు జరుపుతున్నట్లు సమాచారం. ఈ అంశంపై యాపిల్ నుంచి అధికారిక ప్రకటన రావాల్సి ఉంది.