ఫేస్‌బుక్ ఫ్రెండ్ రిక్వెస్ట్ వస్తే జాగ్రత్త..మీ సంపాదనపై సైబర్ డేగ కన్ను!

హైదరాబాద్‌ సాఫ్ట్‌వేర్ ఇంజనీర్లను లక్ష్యంగా చేసుకుని సాగుతున్న హైటెక్ సైబర్ మోసాల్లో మరో భారీ కుంభకోణం వెలుగుచూసింది. ఫేస్‌బుక్‌లో పరిచయమైన ఓ కిలేడీ మాటలు నమ్మి, కొండాపూర్‌కు చెందిన వీరభద్రరావు అనే సాఫ్ట్‌వేర్ ఉద్యోగి ఏకంగా రూ. 2.36 కోట్లు పోగొట్టుకున్నాడు. మూడున్నర నెలల వ్యవధిలో విడతల వారీగా ఈ సొమ్మును సైబర్ నేరగాళ్ల ఖాతాల్లోకి మళ్లించాడు.

ఈ మోసం వెనుక ఉన్న వ్యూహం అత్యంత పకడ్బందీగా సాగింది. గతేడాది ఆగస్టులో ‘కోరా’ అనే పేరుతో సింగపూర్‌కు చెందిన మహిళగా పరిచయమైన వ్యక్తి, వీరభద్రరావుతో సన్నిహితంగా చాటింగ్ చేస్తూ నమ్మకం కలిగించింది. తన తల్లిదండ్రులు హైదరాబాద్‌లోనే ఉంటున్నారని, తనకు జర్మనీ సహా విదేశాల్లో బడా వ్యాపారవేత్తలు స్నేహితులుగా ఉన్నారని నమ్మబలికింది. ‘ఫేస్‌బుక్‌ స్టోర్‌’లో వస్తువుల కొనుగోలు, అమ్మకాల ద్వారా భారీ లాభాలు గడించవచ్చంటూ ఒక ఏపీకే (APK) ఫైల్‌ను పంపి, అది అచ్చం ఫేస్‌బుక్ తరహాలో ఉండేలా డిజైన్ చేసిన నకిలీ యాప్‌ను అతని ఫోన్‌లో ఇన్‌స్టాల్ చేయించింది.

జర్మనీకి చెందిన ‘బెల్లా’ అనే మరో స్నేహితురాలిని పరిచయం చేసి, ఆమె సలహాల ప్రకారం క్రిప్టో వ్యాలెట్ ద్వారా పెట్టుబడులు పెట్టాలని సూచించింది. సెప్టెంబరు నుంచి డిసెంబరు మధ్య కాలంలో బాధితుడు తన పొదుపు మొత్తాన్ని, అప్పులను కలిపి మొత్తం రూ. 2.36 కోట్లు పెట్టుబడిగా పెట్టాడు. యాప్‌లో లాభాలు కనిపిస్తున్నా, వాటిని విత్‌డ్రా చేసుకునే అవకాశం ఇవ్వకపోవడంతో అనుమానం వచ్చిన వీరభద్రరావు పోలీసులను ఆశ్రయించాడు. సైబరాబాద్ సైబర్ క్రైమ్ పోలీసులు కేసు నమోదు చేసి దర్యాప్తు చేపట్టారు.