బెన్ స్టోక్స్ మద్యం వివాదంలో చిక్కుల్లో, కెప్టెన్సీపై అనుమానాలు

ఇంగ్లాండ్ టెస్ట్ కెప్టెన్ బెన్ స్టోక్స్ మరోసారి వివాదంలో చిక్కుకోవడంతో క్రికెట్ వర్గాల్లో తీవ్ర చర్చ జరుగుతోంది. న్యూజిలాండ్‌తో జరిగిన తొలి టెస్టులో ఇంగ్లాండ్ ఘన విజయం సాధించిన అనంతరం, ఆ మ్యాచ్‌లో కీలక పాత్ర పోషించిన గస్ అట్కిన్సన్‌తో కలిసి స్టోక్స్ నైట్‌క్లబ్‌కు వెళ్లినట్లు సమాచారం.

అక్కడ మద్యం మత్తులో ఉన్న ఇద్దరూ ఓ రగ్బీ ఆటగాడితో గొడవకు దిగినట్లు తెలుస్తోంది. ఈ ఘటనలో క్రికెటర్లకు గాయాలు కాలేదుగానీ, అక్కడ విధుల్లో ఉన్న ఇంగ్లాండ్ క్రికెట్ బోర్డు (ECB) భద్రతా సిబ్బందికి తీవ్ర గాయాలైనట్లు నివేదికలు చెబుతున్నాయి.

ఈ ఘటనపై ఈసీబీ ఇప్పటికే విచారణ ప్రారంభించింది. అంతేకాకుండా స్టోక్స్‌ను కెప్టెన్సీ బాధ్యతల నుంచి తప్పుకోవాలని సూచించినట్లు సమాచారం. మిగతా సిరీస్‌లో స్టోక్స్, అట్కిన్సన్‌లను కొనసాగించే అవకాశాలు తక్కువగా ఉన్నాయని ఈసీబీ వర్గాలు పేర్కొన్నాయి.

టెస్టు ఫార్మాట్‌కే పరిమితమైన స్టోక్స్ కెరీర్‌పై కూడా ఈ వివాదం ప్రభావం చూపవచ్చని అంచనా వేస్తున్నారు. గతంలో కూడా మద్యం కారణంగా అతడు వివాదాల్లో చిక్కుకున్న ఘటనలు ఉన్నాయి. 2013లో సిరీస్ నుంచి మధ్యలోనే తప్పించబడ్డాడు. 2017లో బ్రిస్టల్ నైట్‌క్లబ్ ఘటనలో పోలీసులు అతడిని అదుపులోకి తీసుకున్నా, ఆ తర్వాత ఎలాంటి చర్యలు తీసుకోలేదు.

ప్రస్తుతం ఈ తాజా ఘటనతో స్టోక్స్ భవిష్యత్‌పై అనిశ్చితి నెలకొంది.