1985 కనిష్క విమాన దుర్ఘటనలో ఖలిస్థానీ ఉగ్రవాదుల పాత్రను తొలిసారి అంగీకరించిన కెనడా

ఖలిస్థానీ ఉగ్రవాదంపై ఇప్పటివరకు మెతక వైఖరి అవలంబిస్తూ, వారికి పరోక్షంగా ఆశ్రయం ఇచ్చిందన్న విమర్శలు ఎదుర్కొన్న కెనడా ఇప్పుడు తన వైఖరిలో మార్పు సంకేతాలు ఇస్తోందా అనే చర్చ అంతర్జాతీయ స్థాయిలో జరుగుతోంది. నాలుగు దశాబ్దాల క్రితం జరిగిన ఎయిరిండియా ‘కనిష్క’ విమాన దుర్ఘటనపై తొలిసారి అధికారికంగా ఖలిస్థానీ ఉగ్రవాదుల పాత్రను కెనడా గుర్తించడంతో ఈ చర్చ మరింత వేడెక్కింది.

1985 జూన్ 23న టొరంటో నుంచి ముంబయికి బయల్దేరిన ఎయిరిండియా బోయింగ్ 747 విమానం ‘కనిష్క’ అట్లాంటిక్ మహాసముద్రంపై కూలిపోయింది. ఈ ఘోర ప్రమాదంలో 329 మంది ప్రయాణికులు ప్రాణాలు కోల్పోయారు. ఇది కెనడా చరిత్రలోనే అత్యంత ఘోర ఉగ్రదాడుల్లో ఒకటిగా నిలిచింది.

వెంటనే ఈ దాడి వెనుక ఖలిస్థానీ ఉగ్రవాదుల పాత్ర ఉందని భారత్ స్పష్టంగా ఆరోపించింది. అయితే కెనడా దశాబ్దాల పాటు ఆ విషయాన్ని అధికారికంగా అంగీకరించలేదు. విచారణ ప్రక్రియ కూడా తగినంత పారదర్శకంగా జరగలేదన్న విమర్శలు వినిపించాయి. దీంతో ప్రధాన నిందితులు కొన్ని సందర్భాల్లో శిక్ష నుంచి తప్పించుకున్నారని కూడా ఆరోపణలు ఉన్నాయి.

ఇటీవల కెనడా సెక్యూరిటీ ఇంటెలిజెన్స్ సర్వీస్ (CSIS) చేసిన ప్రకటనలో ఈ దాడికి ఖలిస్థానీ వేర్పాటువాద ఉద్యమమే కారణమని స్పష్టం చేసింది. కెనడా స్థావరంగా పనిచేస్తున్న కొన్ని ఖలిస్థానీ తీవ్రవాద గ్రూపులు ఈ బాంబు దాడికి పాల్పడి విమానాన్ని కూల్చేశాయని పేర్కొంది. ఈ ఘటనను కెనడా చరిత్రలోనే అత్యంత దారుణమైన ఉగ్రదాడిగా అభివర్ణించింది.

విమానం లగేజీ విభాగంలో ఖలిస్థానీ గ్రూప్ బబ్బర్ ఖాల్సా సభ్యులు బాంబులు అమర్చి ఈ ఘోరానికి కారణమయ్యారని కూడా ప్రస్తావించింది. ఈ పరిణామంతో కెనడా గత వైఖరిపై విమర్శలు మళ్లీ తెరపైకి వచ్చాయి. అంతేకాకుండా భారత్–కెనడా సంబంధాలపై కూడా ఈ తాజా అంగీకారం ప్రభావం చూపే అవకాశముందని విశ్లేషకులు భావిస్తున్నారు.