మహానాడు వేదికగా మహిళా రిజర్వేషన్‌పై చంద్రబాబు ప్రకటన చారిత్రాత్మకం: అనిత

మంత్రి వంగలపూడి అనిత మహిళా రిజర్వేషన్ అంశంపై కీలక వ్యాఖ్యలు చేశారు. పార్లమెంటులో మహిళా రిజర్వేషన్ బిల్లు ఆమోదం పొందినా లేదా పొందకపోయినా, రాష్ట్రంలో మహిళలకు చట్టసభల్లో 33% రిజర్వేషన్లు కల్పించాలన్న నిర్ణయం తీసుకోవడం పట్ల ఆమె హర్షం వ్యక్తం చేశారు. చంద్రబాబు నాయుడు మహానాడు వేదికగా ఈ నిర్ణయాన్ని ప్రకటించడం చారిత్రాత్మకమని ఆమె అభివర్ణించారు. ఇది ఒక సామాజిక విప్లవానికి నాంది అని వ్యాఖ్యానించారు.

సచివాలయంలో శుక్రవారం మీడియాతో మాట్లాడిన అనిత, 33% టికెట్లను మహిళలకు ఇవ్వాలని ధైర్యంగా ప్రకటించిన ఏకైక పార్టీ తెలుగుదేశం పార్టీ అని అన్నారు. దేశంలోని అన్ని రాజకీయ పార్టీలు ఇదే విధానం అనుసరిస్తే మహిళా రిజర్వేషన్ బిల్లు అమలు సాధ్యమవుతుందని పేర్కొన్నారు. ఈ నిర్ణయంతో తొలి అడుగు తెదేపానే వేసిందని ఆమె తెలిపారు.

ముఖ్యమంత్రి చంద్రబాబు నాయుడు, ఎన్డీయే కూటమి మహిళా పక్షపాతిగా వ్యవహరిస్తోందని ఆమె అన్నారు. ప్రతి ఇంటి నుంచి ఒక పారిశ్రామికవేత్తను తయారు చేయాలనే లక్ష్యంతో ప్రభుత్వం పనిచేస్తోందని, మహిళల కోసం ప్రత్యేకంగా ఎంఎస్‌ఎంఈ పార్కులు ఏర్పాటు చేసినట్లు తెలిపారు. మహిళా సాధికారతకు ప్రభుత్వం ప్రత్యేక ప్రాధాన్యం ఇస్తోందని చెప్పారు.

అనిత మాట్లాడుతూ గత ప్రభుత్వంపై తీవ్ర విమర్శలు చేశారు. అమరావతి ఉద్యమ సమయంలో మహిళలను అణచివేశారని, రోడ్డెక్కిన మహిళలపై దాడులు జరిగాయని ఆరోపించారు. మహిళల హక్కులను అణచివేసిన ఆ పాలనకు వ్యతిరేకంగా ఇప్పుడు ఎన్డీయే ప్రభుత్వం మహిళలకు చట్టసభల్లో ప్రాతినిధ్యం కల్పించేందుకు ముందడుగు వేస్తోందని అన్నారు.

ఉపముఖ్యమంత్రి పవన్ కళ్యాణ్తో కలిసి రాష్ట్ర అభివృద్ధి లక్ష్యాలను 2047 నాటికి సాధించాలన్న దిశగా ప్రభుత్వం పని చేస్తోందని తెలిపారు. మహిళలను ఓటుబ్యాంకుగా కాకుండా శక్తిగా గుర్తిస్తూ వారి అభివృద్ధికి ప్రభుత్వం కట్టుబడి ఉందని స్పష్టం చేశారు.

మహానాడు వంటి భావోద్వేగ వేదికపై మహిళా రిజర్వేషన్‌పై కీలక ప్రకటన చేయడం చారిత్రాత్మకమని, దీనికి ముఖ్యమంత్రి, పార్టీ నాయకుడు నారా లోకేశ్కు కృతజ్ఞతలు తెలియజేశారు.