చిత్రా రామకృష్ణ పిటిషన్‌ కొట్టివేత.. కోలొకేషన్‌ కేసులో సీబీఐ విచారణ కొనసాగింపు

నేషనల్‌ స్టాక్‌ ఎక్స్ఛేంజీ (ఎన్‌ఎస్‌ఈ) మాజీ ఎండీ, సీఈఓ చిత్రా రామకృష్ణకు దిల్లీ హైకోర్టులో చుక్కెదురైంది. కోలొకేషన్‌ స్కామ్‌ కేసులో తనపై అవినీతి నిరోధక చట్టం (పీసీ యాక్ట్‌) కింద విచారణ జరపడాన్ని సవాల్‌ చేస్తూ ఆమె దాఖలు చేసిన పిటిషన్‌ను హైకోర్టు కొట్టివేసింది.

ట్రయల్‌ కోర్టు ఇచ్చిన ఉత్తర్వులను సమర్థించిన హైకోర్టు ధర్మాసనం.. ఎన్‌ఎస్‌ఈ ఒక సాధారణ ప్రైవేటు సంస్థ కాదని, దేశ ఆర్థిక వ్యవస్థలో కీలక పాత్ర పోషించే మార్కెట్‌ మౌలిక వసతుల సంస్థగా ప్రజా ప్రయోజనాలకు సంబంధించిన బాధ్యతలు నిర్వహిస్తోందని పేర్కొంది. అందువల్ల ఎన్‌ఎస్‌ఈ ఎండీ, సీఈఓగా ఉన్న వ్యక్తి కూడా ప్రజా బాధ్యతలు కలిగిన హోదాలో ఉంటారని స్పష్టం చేసింది.

జస్టిస్‌ నవీన్‌ చావ్లా, జస్టిస్‌ రవీందర్‌ దుడేజాలతో కూడిన ధర్మాసనం 54 పేజీల తీర్పును వెలువరించింది. పీసీ యాక్ట్‌లోని ‘ప్రభుత్వ ఉద్యోగి’ నిర్వచనం స్పష్టంగా లేదన్న చిత్రా రామకృష్ణ వాదనను కోర్టు అంగీకరించలేదు.

కోలొకేషన్‌ కేసులో సీబీఐ దాఖలు చేసిన ఛార్జిషీట్‌ను రద్దు చేయాలన్న ఆమె అభ్యర్థనను కూడా న్యాయస్థానం తిరస్కరించింది. తనపై నమోదైన అభియోగాలు చెల్లుతాయా లేదా, ఎన్‌ఎస్‌ఈ రోజువారీ వ్యవహారాల్లో ఆమె పాత్ర ఎంత వరకు ఉందన్న అంశాలు విచారణ సమయంలోనే తేలాల్సి ఉంటుందని పేర్కొంది.

సీబీఐ, కేంద్ర ప్రభుత్వం కూడా చిత్రా రామకృష్ణ పిటిషన్‌ను వ్యతిరేకించాయి. కేసు విచారణను అడ్డుకునేలా ఎలాంటి కారణాలు లేవని కోర్టు అభిప్రాయపడింది.

కోలొకేషన్‌ స్కామ్‌ నేపథ్యం

ఎన్‌ఎస్‌ఈలో కోలొకేషన్‌ సదుపాయాల దుర్వినియోగం ఆరోపణలపై 2018లో కేసు నమోదైంది. స్టాక్‌ ఎక్స్ఛేంజ్‌ ట్రేడింగ్‌ వ్యవస్థలో కొందరు బ్రోకర్లకు అనుచిత ప్రయోజనం కల్పించారనే ఆరోపణలపై సీబీఐ దర్యాప్తు ప్రారంభించింది.

ఈ కేసులో భాగంగా సీబీఐ 2022 మార్చి 6న చిత్రా రామకృష్ణను అరెస్టు చేసింది. అనంతరం అదే ఏడాది సెప్టెంబరులో దిల్లీ హైకోర్టు ఆమెకు బెయిల్‌ మంజూరు చేసింది. తాజాగా హైకోర్టు ఇచ్చిన తీర్పుతో కేసులో తదుపరి విచారణకు మార్గం సుగమమైంది.

కాగా, ఎన్‌ఎస్‌ఈ మాజీ గ్రూప్‌ ఆపరేటింగ్‌ ఆఫీసర్‌ ఆనంద్‌ సుబ్రమణియన్‌ వ్యవహారం కూడా ఈ కేసులో కీలక అంశంగా నిలిచింది. ఎన్‌ఎస్‌ఈలో కీలక నిర్ణయాలు, అంతర్గత వ్యవహారాల్లో పారదర్శకతపై వచ్చిన ప్రశ్నల నేపథ్యంలో ఈ కేసు దేశ ఆర్థిక రంగంలో ప్రాధాన్యం సంతరించుకుంది.