నెల్లూరులో బారా షాహీద్ దర్గా రొట్టెల పండగతో సందడి వాతావరణం

మత సామరస్యానికి ప్రతీకగా నిలిచే నెల్లూరు బారా షాహీద్ దర్గా రొట్టెల పండగతో నగరంలో ఆధ్యాత్మిక, ఉత్సవ వాతావరణం నెలకొంది. కోర్కెల రొట్టెల కోసం రాష్ట్రం నలుమూలల నుంచే కాకుండా సుదూర ప్రాంతాల నుంచి కూడా భక్తులు భారీ సంఖ్యలో తరలివస్తున్నారు. దీంతో స్వర్ణాల చెరువు పరిసరాలు భక్తుల రద్దీతో కళకళలాడుతున్నాయి.

రాష్ట్ర ప్రభుత్వం ఆధ్వర్యంలో ఈ రొట్టెల పండగను అధికారికంగా నిర్వహిస్తున్నారు. ఈ నెల 26 నుంచి 30 వరకు వివిధ ఆధ్యాత్మిక, సాంస్కృతిక కార్యక్రమాలు జరగనున్నాయి. ఇవాళ ఒక్కరోజే దాదాపు 3 లక్షల మంది భక్తులు రానున్నారని అధికారులు అంచనా వేస్తున్నారు.

భక్తులకు ఎలాంటి ఇబ్బందులు కలగకుండా మంత్రి నారాయణ ఆదేశాల మేరకు జిల్లా యంత్రాంగం విస్తృత ఏర్పాట్లు చేసింది. కలెక్టర్ హిమాన్షు శుక్లా నేతృత్వంలో అన్ని శాఖల అధికారులు సమన్వయంతో ఏర్పాట్లను పర్యవేక్షిస్తున్నారు. ఎస్పీ అజిత వేజెండ్ల, జాయింట్ కలెక్టర్ మొగిలి వెంకటేశ్వర్లు, నగరపాలక సంస్థ కమిషనర్ నందన్ నిరంతరం పరిస్థితిని సమీక్షిస్తూ సిబ్బందికి సూచనలు చేస్తున్నారు.

జిల్లా వైద్యారోగ్య శాఖ ఆధ్వర్యంలో ప్రత్యేక వైద్య శిబిరాలు, అంబులెన్స్ సౌకర్యాలు ఏర్పాటు చేశారు. అత్యవసర పరిస్థితులను ఎదుర్కొనేందుకు వైద్య బృందాలు సిద్ధంగా ఉన్నాయి. స్వర్ణాల చెరువు వద్ద ప్రమాదాలు జరగకుండా 15 బోట్లను సిద్ధం చేసి, ఒక్కో షిఫ్ట్‌కు 15 మంది చొప్పున గజ ఈతగాళ్లను నియమించారు. మత్స్యశాఖ జేడీ చాంద్ బాషా పర్యవేక్షణలో ఈ భద్రతా చర్యలు పకడ్బందీగా అమలు చేస్తున్నారు.

మొత్తంగా నెల్లూరు రొట్టెల పండగ ఆధ్యాత్మికతతో పాటు భారీ భక్తజన సందడితో కొనసాగుతోంది.