హెచ్‌డీఎఫ్‌సీ బ్యాంక్ కొత్త ఛైర్మన్‌గా మాజీ ఆర్థిక కార్యదర్శి రాజీవ్ కుమార్ నియామకం

హెచ్‌డీఎఫ్‌సీ బ్యాంక్ బోర్డు తమ కొత్త ఛైర్మన్‌గా కేంద్ర ఆర్థిక శాఖ మాజీ కార్యదర్శి రాజీవ్ కుమార్‌ను నియమించింది. ప్రభుత్వ రంగ బ్యాంకింగ్, ఆర్థిక రంగ పునరుజ్జీవంలో కీలక పాత్ర పోషించిన రాజీవ్ కుమార్‌ను నాలుగేళ్ల పాటు స్వతంత్ర డైరెక్టర్‌గా నియమించేందుకు బోర్డు ఆమోదముద్ర వేసింది.

ఈ నియామకం 2026 జూన్ 30 నుంచి అమల్లోకి వస్తుందని స్టాక్ ఎక్స్ఛేంజీలకు హెచ్‌డీఎఫ్‌సీ బ్యాంక్ తెలిపింది. అయితే ఈ నియామకానికి సంబంధించి ఆర్‌బీఐ అనుమతి తప్పనిసరి కాగా, తాత్కాలిక ఛైర్మన్ బాధ్యతలు మరియు పారితోషికానికి కూడా ఆమోదం లభించాల్సి ఉంది. ఆర్‌బీఐ గ్రీన్ సిగ్నల్ ఇచ్చిన వెంటనే రాజీవ్ కుమార్ ఛైర్మన్ బాధ్యతలు స్వీకరించనున్నారు.

రాజీవ్ కుమార్ గతంలో 25వ ఎన్నికల ప్రధాన అధికారి (సీఈసీ)గా పనిచేశారు. అత్యధిక మంది ఓటర్లు పాల్గొన్న ఎన్నికలను విజయవంతంగా నిర్వహించినందుకు ఆయనకు ప్రపంచ స్థాయి గుర్తింపు కూడా లభించింది. హెచ్‌డీఎఫ్‌సీ బ్యాంక్‌లో నైతిక విలువలపై ఆందోళన వ్యక్తం చేస్తూ రాజీనామా చేసిన అతాను చక్రవర్తి స్థానాన్ని ఆయన భర్తీ చేయనున్నారు.

ఆర్థిక కార్యదర్శిగా (2017–2020) పనిచేసిన సమయంలో రాజీవ్ కుమార్ బ్యాంకింగ్ రంగ సంస్కరణల్లో కీలక పాత్ర పోషించారు. అప్పట్లో ప్రభుత్వ రంగ బ్యాంకుల్లో పెరిగిన ఎన్‌పీఏల సమస్యను ఎదుర్కొంటూ మూలధన కొరత సమస్యల పరిష్కారంపై దృష్టి పెట్టారు. కొద్ది కాలంలోనే 3.38 లక్షల షెల్ కంపెనీల ఖాతాలను స్తంభింపజేయడంలో కీలక చర్యలు తీసుకున్నారు.

బ్యానింగ్ ఆఫ్ అన్‌రెగ్యులేటెడ్ డిపాజిట్స్ స్కీమ్స్ యాక్ట్, 2019 అమలులో కీలక పాత్ర పోషించడంతో పాటు పోంజీ పథకాలపై నిషేధానికి ఆయన సహకరించారు. ఎన్‌పీఏల పారదర్శక గుర్తింపు, ప్రొవిజనింగ్ విధానాలను బలోపేతం చేయడం ద్వారా బ్యాంకుల బ్యాలెన్స్ షీట్లను మెరుగుపరచడంలో కీలక పాత్ర పోషించారు.

సహకార బ్యాంకింగ్ పర్యవేక్షణ నిబంధనల బలోపేతం, హై ప్రొఫైల్ ఎగవేతలు నివారించేందుకు పాస్‌పోర్ట్ వివరాల తప్పనిసరి నమోదు వంటి సంస్కరణలను కూడా ఆయన అమలు చేశారు. డిపాజిట్ ఇన్సూరెన్స్ పరిమితిని రూ.1 లక్ష నుంచి రూ.5 లక్షలకు పెంచడంలోనూ ఆయన పాత్ర ఉంది.

బ్యాంక్ ప్రకటన ప్రకారం, రాజీవ్ కుమార్‌కు హెచ్‌డీఎఫ్‌సీ బ్యాంక్ లేదా దాని డైరెక్టర్లు, కీలక యాజమాన్య వ్యక్తులతో ఇప్పటివరకు ఎటువంటి సంబంధం లేదు.