వైభవ్‌ను వైస్‌ కెప్టెన్‌ ఎలా చేశారు?: హర్షా భోగ్లే

దులీప్‌ ట్రోఫీ 2026-27 సీజన్‌ కోసం ఈస్ట్‌ జోన్‌ జట్టును ప్రకటించిన నేపథ్యంలో యువ క్రికెటర్‌ వైభవ్‌ సూర్యవంశీకి వైస్‌ కెప్టెన్సీ అప్పగించడం క్రికెట్‌ వర్గాల్లో చర్చకు దారితీసింది. సీనియర్‌ ఆటగాడు ఇషాన్‌ కిషన్‌ను జట్టు కెప్టెన్‌గా ఎంపిక చేసిన సెలక్టర్లు.. అంతర్జాతీయ క్రికెట్‌లో ఇప్పుడిప్పుడే అడుగులు వేస్తున్న వైభవ్‌ను డిప్యూటీగా నియమించారు.

ఈ నిర్ణయంపై క్రికెట్‌ వ్యాఖ్యాత హర్షా భోగ్లే తన అభిప్రాయాన్ని వ్యక్తం చేశారు. రెడ్‌ బాల్‌ క్రికెట్‌లో, ముఖ్యంగా సీనియర్‌ ఆటగాళ్లు ఉన్న జట్టుకు వైభవ్‌ను వైస్‌ కెప్టెన్‌గా ఎలా ఎంపిక చేశారో తనకు ఇప్పటికీ ఆశ్చర్యంగా ఉందని పేర్కొన్నారు.

ఫస్ట్‌క్లాస్‌ క్రికెట్‌లో వైభవ్‌ ఇప్పటివరకు సుదీర్ఘ ఫార్మాట్‌లో కేవలం 12 ఇన్నింగ్స్‌లు మాత్రమే ఆడాడని, 17.25 సగటుతో 207 పరుగులు చేశాడని భోగ్లే గుర్తుచేశారు. అయితే వైభవ్‌ ప్రతిభను తాను ఏమాత్రం తక్కువ చేయడం లేదని స్పష్టం చేశారు.

వైభవ్‌ అద్భుతమైన నైపుణ్యం కలిగిన ఆటగాడని ప్రశంసించిన భోగ్లే.. సుదీర్ఘ ఫార్మాట్‌లో అతడు ఇంకా చాలా విషయాలు నేర్చుకోవాల్సి ఉందని అభిప్రాయపడ్డారు. సీనియర్‌ ఆటగాళ్లతో కూడిన జట్టులో నాయకత్వ బాధ్యతలు చేపట్టేందుకు మరింత అనుభవం అవసరమనే అభిప్రాయం ఆయన వ్యాఖ్యల్లో వ్యక్తమైంది.

మరోవైపు, వైభవ్‌ సూర్యవంశీకి వైస్‌ కెప్టెన్సీ ఇవ్వడాన్ని కొందరు అభిమానులు, క్రికెట్‌ విశ్లేషకులు స్వాగతిస్తుండగా.. మరికొందరు మాత్రం సెలక్టర్లు తొందరపడ్డారని అభిప్రాయపడుతున్నారు. ఈ నిర్ణయం యువ ఆటగాడికి నాయకత్వ అనుభవాన్ని అందించడంతో పాటు అతని ఎదుగుదలకు ఉపయోగపడుతుందా? లేక సుదీర్ఘ ఫార్మాట్‌లో మరింత అనుభవం వచ్చిన తర్వాత బాధ్యతలు అప్పగించాల్సిందా? అనే చర్చ కొనసాగుతోంది.