"మీరు వస్తారని తెలుసు"..పోలీసులనే ఎదురు ప్రశ్నించిన నిందితుడు: విజయవాడలో ఉగ్ర మూలాలు!

విజయవాడలో ఉగ్రవాద మూలాలను చేధిస్తూ కౌంటర్ ఇంటెలిజెన్స్ (CI Cell) మరియు టాస్క్ ఫోర్స్ పోలీసులు భారీ ఆపరేషన్ నిర్వహించారు. పాకిస్థాన్ హ్యాండ్లర్లతో సంబంధాలు కలిగి ఉండి, సోషల్ మీడియా ద్వారా జిహాదీ భావజాలాన్ని వ్యాప్తి చేస్తున్న ముగ్గురు యువకులను అరెస్ట్ చేయడం సంచలనం సృష్టించింది.

నిందితుల వివరాలు: మొహ్మద్ రహమతుల్లా షరీఫ్ (బైక్ డ్రైవర్), మీర్జా సొహైల్ బేగ్ (బిర్యానీ షాప్ క్యాషియర్), మొహ్మద్ డానిష్ (ఆటోనగర్ వర్కర్). వీరంతా విజయవాడలోని వేర్వేరు ప్రాంతాలకు చెందినవారు.

పాక్ హ్యాండ్లర్లతో లింకులు: నిందితులు పాకిస్థాన్‌లోని హ్యాండ్లర్లతో టెలిగ్రామ్, ఇన్‌స్టాగ్రామ్ ద్వారా టచ్‌లో ఉన్నట్లు పోలీసులు గుర్తించారు. ఉగ్రవాద కార్యకలాపాల కోసం వీరికి అక్కడి నుంచే నిధులు అందుతున్నట్లు సమాచారం.

పేలుడు పదార్థాలపై సెర్చ్: ప్రధాన నిందితుడు రహమతుల్లా షరీఫ్ ఇంటర్నెట్‌లో పేలుడు పదార్థాల తయారీ మరియు వాటి వినియోగం గురించి సెర్చ్ చేసినట్లు నిఘా వర్గాలు నిర్ధారించాయి.

నిర్బంధం వెనుక అసలు కథ: యువతను జిహాదీ వైపు ఆకర్షించడం, గ్రూపులు ఏర్పాటు చేసి ఉగ్రవాద రిక్రూట్‌మెంట్‌కు పాల్పడటం వీరి ప్రధాన లక్ష్యం. వీరికి దేశవ్యాప్తంగా మరో 10 మందితో సంబంధాలు ఉన్నట్లు పోలీసులు అనుమానిస్తున్నారు.

పోలీసులకే షాక్: పోలీసులు రహమతుల్లా ఇంటికి వెళ్లగానే, “మీరు వస్తారని నాకు తెలుసు.. సోషల్ మీడియా పోస్టుల కోసమే కదా వచ్చారు?” అని నిందితుడు ఎదురు ప్రశ్నించడం అందరినీ విస్మయానికి గురిచేసింది.