నడి సముద్రంలో అక్రమ చమురు రవాణా.. మూడునౌకలు స్వాధీనం

నడి సముద్రంలో చమురు స్మగ్లింగ్‌కు పాల్పడుతున్న ఓ అంతర్జాతీయ ముఠాను భారత కోస్ట్ గార్డ్ సమర్థవంతంగా అడ్డుకుంది. ముంబయి తీరానికి సుమారు 100 నాటికల్ మైళ్ల దూరంలో నిర్వహించిన ప్రత్యేక ఆపరేషన్‌లో మూడు నౌకలను కోస్ట్‌గార్డ్ సిబ్బంది అదుపులోకి తీసుకున్నారు. ఈ మేరకు అధికారులు అధికారిక ప్రకటన విడుదల చేశారు.భారత ఎక్స్‌క్లూజివ్ ఎకనామిక్ జోన్‌ (EEZ) పరిధిలో అనుమానాస్పద కదలికలను గమనించిన కోస్ట్‌గార్డ్ అధికారులు, సమీప సముద్ర మార్గాలపై నిఘా పెంచారు. ఈ క్రమంలో మూడు నౌకలను అడ్డుకుని సుదీర్ఘంగా తనిఖీలు నిర్వహించారు. నౌకల్లోని సిబ్బందిని విచారించగా, చమురు స్మగ్లింగ్‌కు సంబంధించిన కీలక సమాచారం బయటపడింది.

ప్రాథమిక దర్యాప్తులో వెల్లడైన వివరాల ప్రకారం, వివిధ దేశాల్లో ప్రస్తుతం కొనసాగుతున్న ఘర్షణల నేపథ్యంలో తక్కువ ధరకు చమురును సేకరించి, దాన్ని అక్రమంగా అంతర్జాతీయ మార్కెట్‌కు తరలించేలా ఈ ముఠా కొత్త విధానాన్ని రూపొందించింది. అంతర్జాతీయ జలాల్లో మోటార్ ట్యాంకర్ల ద్వారా చమురును తరలిస్తూ, భారత్‌తో పాటు తీరప్రాంత రాష్ట్రాలకు చెల్లించాల్సిన కస్టమ్స్ సుంకాలను తప్పించుకుంటున్నట్లు అధికారులు గుర్తించారు.

ఈ అక్రమ వ్యాపారం వెనుక అంతర్జాతీయ హ్యాండ్లర్ల నెట్‌వర్క్ పనిచేస్తోందని కోస్ట్‌గార్డ్ అధికారులు తెలిపారు. ఎవరికీ పట్టుబడకుండా ఉండేందుకు నౌకల గుర్తింపు సంఖ్యలు, పేర్లు తరచూ మార్చుతూ స్మగ్లింగ్ కొనసాగిస్తున్నట్లు ప్రాథమిక విచారణలో తేలిందన్నారు.

పట్టుబడిన మూడు నౌకలను తదుపరి దర్యాప్తు కోసం ముంబయికి తరలించే అవకాశం ఉందని అధికారులు వెల్లడించారు. నౌకల్లో ఉన్న సిబ్బందిని స్థానిక పోలీసులకు అప్పగించనున్నట్లు తెలిపారు. అలాగే, ఈ నౌకల యజమానులు విదేశాల్లో నివసిస్తున్నట్లు ప్రాథమిక సమాచారం ఉందని పేర్కొన్నారు.ఈ ఘటనతో నడి సముద్రంలో జరుగుతున్న అక్రమ చమురు రవాణాపై దేశ భద్రతా సంస్థలు మరింత నిఘా పెంచే అవకాశముందని విశ్లేషకులు అభిప్రాయపడుతున్నారు.