గుండె ఆరోగ్యానికి ఐదు పండ్లు సరిపోవా? శాస్త్రవేత్తల కొత్త హెచ్చరిక

ప్రతిరోజూ ఐదు రకాల పండ్లు, కూరగాయలు తినాలని వైద్యులు చెబుతుండటం తెలిసిందే. అయితే తాజాగా అంతర్జాతీయ శాస్త్రవేత్తలు ఈ విషయంపై కొత్త కోణాన్ని వెల్లడించారు. కేవలం ఐదు రకాల ఆహారాలు తింటే సరిపోదని, గుండె ఆరోగ్యాన్ని కాపాడుకోవాలంటే ప్రత్యేకంగా ఫ్లేవనాల్స్ ఎక్కువగా ఉన్న ఆహారాన్ని ఎంపిక చేసుకోవాల్సిన అవసరం ఉందని వారు సూచిస్తున్నారు.

అమెరికా, యూకేకు చెందిన దాదాపు 30,000 మందిపై చేసిన పరిశోధనలో రోజువారీగా పండ్లు, కూరగాయలు తింటున్నా కూడా చాలామందిలో అవసరమైన ఫ్లేవనాల్స్ స్థాయి తక్కువగా ఉన్నట్లు తేలింది. గుండె ఆరోగ్యానికి రోజుకు కనీసం 500 మిల్లీగ్రాముల ఫ్లేవనాల్స్ అవసరమని పరిశోధకులు పేర్కొంటున్నారు. ఇవి శక్తివంతమైన యాంటీఆక్సిడెంట్లుగా పనిచేసి రక్తప్రసరణను మెరుగుపరచడం, రక్తనాళాల్లో వాపులను తగ్గించడం వంటి ప్రయోజనాలు కలిగిస్తాయి.

పరిశోధనల ప్రకారం కొన్ని ప్రత్యేక ఆహారాల్లో ఫ్లేవనాల్స్ ఎక్కువగా ఉంటాయి. ఉదాహరణకు ప్లమ్స్, క్రాన్‌బెర్రీస్, బ్లాక్‌బెర్రీస్, చెర్రీస్, ఆపిల్స్ (తొక్కతో సహా), స్ట్రాబెర్రీస్, బ్లూబెర్రీస్, గ్రీన్ టీ, బ్రాడ్ బీన్స్, పింటో బీన్స్ వంటి వాటిలో ఈ పోషకాలు ఎక్కువగా లభిస్తాయి. వీటిని రోజువారీ ఆహారంలో చేర్చుకుంటే ఫ్లేవనాల్స్ స్థాయి గణనీయంగా పెరుగుతుందని నిపుణులు చెబుతున్నారు.

డార్క్ చాక్లెట్‌లో కూడా ఫ్లేవనాల్స్ ఉంటాయని, కానీ మార్కెట్లో లభించే ఉత్పత్తుల్లో వాటి పరిమాణం చాలా తక్కువగా ఉంటుందని పరిశోధకులు హెచ్చరిస్తున్నారు. అందువల్ల పండ్లు, సహజ ఆహారాల ద్వారా ఫ్లేవనాల్స్ పొందడం ఉత్తమమని సూచిస్తున్నారు.

అయితే ఈ పరిశోధనపై కొందరు హార్ట్ నిపుణులు భిన్నాభిప్రాయాలు వ్యక్తం చేస్తున్నారు. కేవలం ఫ్లేవనాల్స్‌పై ఆధారపడటం సరిపోదని, సమతుల్య ఆహారం, జీవనశైలి మార్పులు కూడా గుండె ఆరోగ్యానికి ముఖ్యమని వారు చెబుతున్నారు. ప్రతి వ్యక్తి శరీర నిర్మాణం, గట్ బ్యాక్టీరియా ఆధారంగా పోషకాల గ్రహణ శక్తి మారుతుందని కూడా వారు గుర్తు చేస్తున్నారు.

మొత్తానికి, రోజువారీ ఆహారంలో వైవిధ్యం ఉండటం ముఖ్యమని, ఏదైనా ఒకే రకమైన ఆహారంపై ఆధారపడకుండా సమతుల్యంగా తీసుకోవడం ఉత్తమమని నిపుణులు సూచిస్తున్నారు.