వైపో పీసీటీ ర్యాంకింగ్స్‌లో జియో ప్లాట్‌ఫామ్స్‌ టాప్‌-20లో స్థానం

రిలయన్స్ ఇండస్ట్రీస్ టెక్నాలజీ విభాగమైన జియో ప్లాట్‌ఫామ్స్‌ వరల్డ్ ఇంటెలెక్చువల్ ప్రాపర్టీ ఆర్గనైజేషన్‌ (WIPO) విడుదల చేసిన పేటెంట్ కో-ఆపరేషన్ ట్రీటీ (PCT) ర్యాంకింగ్స్‌లో గ్లోబల్ టాప్-20లో స్థానం సాధించింది. 2025 సంవత్సరానికి విడుదల చేసిన తాజా జాబితాలో జియో ప్లాట్‌ఫామ్స్‌ 320 స్థానాలు ఎగబాకి 20వ ర్యాంక్‌ను దక్కించుకుంది.

ఈ విజయంతో అంతర్జాతీయంగా వేగంగా ఎదుగుతున్న ఆవిష్కరణ సంస్థల్లో జియో ప్లాట్‌ఫామ్స్‌ ఒకటిగా నిలిచింది. ప్రపంచంలోని ప్రముఖ టెక్నాలజీ దిగ్గజాలు హువావే, శామ్‌సంగ్, క్వాల్‌కామ్, ఎల్‌జీ, పానాసోనిక్, నోకియా, గూగుల్, యాపిల్, మైక్రోసాఫ్ట్ వంటి సంస్థల సరసన జియో చేరింది. ఈ టాప్-20 జాబితాలో స్థానం పొందిన ఏకైక భారతీయ కంపెనీగా జియో ప్లాట్‌ఫామ్స్‌ గుర్తింపు పొందింది.

WIPO నివేదిక ప్రకారం, అత్యధిక పీసీటీ పేటెంట్ దరఖాస్తుల ఆధారంగా ఈ ర్యాంకులు ప్రకటిస్తారు. జియో ప్లాట్‌ఫామ్స్‌ భారీగా తన పేటెంట్ పోర్ట్‌ఫోలియోను విస్తరించుకుంటూ కొత్త తరం డిజిటల్ టెక్నాలజీలపై దృష్టి పెట్టింది.

కంపెనీ ప్రధానంగా 5G, 5G అడ్వాన్స్‌డ్, 6G, ఆర్టిఫిషియల్ ఇంటెలిజెన్స్ (AI), AI నేటివ్ నెట్‌వర్క్స్, క్లౌడ్ నేటివ్ ప్లాట్‌ఫామ్స్, ఇంటెలిజెంట్ ఆటోమేషన్, రేడియో యాక్సెస్ టెక్నాలజీ, కోర్ నెట్‌వర్క్ సాఫ్ట్‌వేర్, ఎడ్జ్ ఇంటెలిజెన్స్, ఫిక్స్‌డ్ వైర్‌లెస్ యాక్సెస్, నెట్‌వర్క్ స్లైసింగ్ మరియు డిజిటల్ సర్వీసెస్ వంటి రంగాల్లో ఆవిష్కరణలపై పనిచేస్తోంది.

జియో ప్లాట్‌ఫామ్స్‌ ఎండీ ఆకాశ్ అంబానీ మాట్లాడుతూ, టాప్-20లో స్థానం దక్కడం తమ డీప్‌టెక్ ప్రయాణానికి ప్రతిబింబమని తెలిపారు. ఈ విజయాన్ని ఆత్మనిర్భర్ భారత్ లక్ష్యానికి అంకితం చేస్తున్నామని ఆయన పేర్కొన్నారు.

2026 మార్చి నాటికి జియో మొత్తం 6,817 పేటెంట్‌లకు దరఖాస్తు చేసింది. ఇందులో 2,393 దేశీయ పేటెంట్‌లు, 4,424 అంతర్జాతీయ పేటెంట్‌లు ఉన్నాయి. ఇప్పటివరకు 1,009 పేటెంట్‌లు మంజూరు కాగా, వాటిలో 538 భారత్‌లో, 471 విదేశాల్లో లభించాయని కంపెనీ వెల్లడించింది.

ఈ పురోగతితో జియో ప్లాట్‌ఫామ్స్‌ ప్రపంచ స్థాయి డీప్‌టెక్ మరియు ఇన్నోవేషన్ సంస్థగా తన స్థానం మరింత బలపర్చుకుంది.