ఏఐ దెబ్బకు ఉద్యోగాలు ప్రమాదంలో?..ఒరాకిల్‌లో లేఆఫ్‌ల చర్చ!!

ఒరాకిల్‌ సంస్థలో ఉద్యోగాల కోతపై చర్చలు మళ్లీ మొదలయ్యాయి. కృత్రిమ మేధ (AI) వినియోగాన్ని విస్తరించడంతో పాటు భారీ డేటా సెంటర్ల నిర్మాణానికి నిధులు సమకూర్చుకునే క్రమంలో సంస్థ పునర్‌వ్యవస్థీకరణ చర్యలను వేగవంతం చేస్తున్నట్లు సమాచారం. ఈ నేపథ్యంలో రాబోయే నెలల్లో వేల మంది ఉద్యోగులను తగ్గించే అవకాశం ఉందన్న వార్తలు టెక్‌ రంగంలో చర్చనీయాంశంగా మారాయి.

లారీ ఎల్లిసన్‌ స్థాపించిన ఈ డేటాబేస్‌ దిగ్గజం ఇటీవల తన త్రైమాసిక ఆదాయ నివేదిక అనంతరం అమెరికా సెక్యూరిటీస్‌ అండ్‌ ఎక్స్చేంజ్‌ కమిషన్‌ (SEC)కు సమర్పించిన పత్రాల్లో పునర్నిర్మాణ వ్యయాల కోసం అదనంగా 500 మిలియన్‌ డాలర్లు (సుమారు రూ.4,600 కోట్లు) కేటాయించినట్లు వెల్లడించింది. దీంతో ప్రస్తుత ఆర్థిక సంవత్సరానికి మొత్తం పునర్నిర్మాణ నిధులు 2.1 బిలియన్‌ డాలర్లకు (సుమారు రూ.19,320 కోట్లు) చేరాయి. ఇది గత సంవత్సరాలతో పోలిస్తే గణనీయంగా ఎక్కువ.

ఈ పెరిగిన పునర్నిర్మాణ వ్యయాలు చూస్తే, సంస్థలో పెద్ద ఎత్తున ఉద్యోగాల కోత ఉండొచ్చని మార్కెట్‌ విశ్లేషకులు అంచనా వేస్తున్నారు. ముఖ్యంగా భారీ స్థాయిలో ఏఐ ఆధారిత డేటా సెంటర్ల నిర్మాణం కోసం పెట్టుబడిదారుల నుంచి ఒత్తిడి పెరుగుతున్న నేపథ్యంలో సంస్థ ఖర్చులను తగ్గించే దిశగా చర్యలు తీసుకుంటోందని చెబుతున్నారు. అవసరమైతే ఈ ప్రాజెక్టులకు రుణాలు కూడా సమీకరించాల్సి రావొచ్చని విశ్లేషణలు సూచిస్తున్నాయి.

ఆర్‌బీసీ విశ్లేషకుడు రిషి జలూరియా అభిప్రాయం ప్రకారం, వచ్చే త్రైమాసికంలో ఉద్యోగుల సంఖ్యను తగ్గించకుండా ఉంటే పునర్నిర్మాణ ఖర్చులను ఇంతగా పెంచే అవసరం ఉండేది కాదని పేర్కొన్నారు. కంపెనీలు తరచుగా ఉద్యోగాల కోతను ‘రీస్ట్రక్చరింగ్‌’ పేరుతో ప్రకటించడం సాధారణమని, ఈసారి కూడా అదే సంకేతాలు కనిపిస్తున్నాయని ఆయన చెప్పారు.

ఇదిలా ఉండగా, గత ఏడాది ఆగస్టు-సెప్టెంబరు మధ్య కాలంలో ఒరాకిల్‌ అమెరికా, కెనడా, భారత్‌లలో కలిసి సుమారు 3,000 మందికి పైగా ఉద్యోగులను తొలగించింది. ముఖ్యంగా సేల్స్‌, మార్కెటింగ్‌ విభాగాల్లో మధ్యస్థాయి ఉద్యోగులను లక్ష్యంగా చేసుకున్నట్లు సమాచారం.

తాజాగా జరగబోయే ఉద్యోగాల కోత ఏ విభాగాల్లో ఉంటుందో, ఎంతమంది ఉద్యోగులను ప్రభావితం చేస్తుందో ఇంకా స్పష్టత రాలేదు. అయితే వేలమంది ఉద్యోగులను తగ్గించే ప్రణాళికపై సంస్థ పనిచేస్తోందని బ్లూమ్‌బెర్గ్‌ నివేదిక పేర్కొంది. ఈ విషయంపై ఒరాకిల్‌ సంస్థ అధికారికంగా స్పందించలేదు.