జోగి రమేశ్‌ కుటుంబంపై కోడలు మేఘన సంచలన ఆరోపణలు

మాజీ మంత్రి జోగి రమేశ్‌ కుటుంబంపై ఆయన కోడలు మేఘన తీవ్ర ఆరోపణలు చేశారు. కుటుంబ కలహాలు, తనను ఇబ్బందులకు గురిచేసిన తీరు, పోలీసులకు ఇచ్చిన ఫిర్యాదు తదితర అంశాలపై మంగళవారం ఆమె మీడియా సమావేశంలో మాట్లాడారు. తనపై జోగి రమేశ్‌ చేసిన వ్యాఖ్యలు బాధ కలిగించాయని పేర్కొన్నారు.

జోగి రమేశ్‌ దంపతులను తాను సొంత తల్లిదండ్రులుగా భావించానని మేఘన తెలిపారు. అయితే వివాహం తర్వాత కుటుంబంలో చోటుచేసుకున్న పరిణామాలు తనను తీవ్రంగా కలిచివేశాయని ఆవేదన వ్యక్తం చేశారు. అదనపు కట్నం విషయంలో తనపై ఒత్తిడి తెచ్చారని ఆరోపించారు. తన పుట్టింటి వారికి ఎలాంటి రాజకీయ నేపథ్యం లేదని, వారు వ్యాపార కుటుంబానికి చెందినవారని చెప్పారు.

వివాహానికి ముందు తమ కుటుంబానికి సంబంధించిన కొన్ని విషయాలను తనకు చెప్పలేదని మేఘన ఆరోపించారు. మతపరమైన అంశాలను కూడా వివాహానికి ముందు ఒక విధంగా, పెళ్లి తర్వాత మరో విధంగా తెలుసుకున్నానని అన్నారు. మతాన్ని పాటించడం తప్పు కాదని, అయితే కొన్ని విషయాలను దాచిపెట్టి వివాహం జరపడం సరైంది కాదని వ్యాఖ్యానించారు.

తన అత్తింట్లో చోటుచేసుకున్న కొన్ని పరిణామాలకు సంబంధించిన ఆధారాలు తన వద్ద ఉన్నాయని మేఘన చెప్పారు. ఇప్పటికే పోలీసులకు ఆధారాలను అందజేశానని, ఎఫ్‌ఐఆర్‌లో నమోదైన ఆరోపణలకు సంబంధించి కూడా తన వద్ద ఆధారాలు ఉన్నాయని పేర్కొన్నారు. ప్రస్తుతం బయటకు వచ్చిన వీడియోలు కొన్ని మాత్రమేనని, తనను ఏ విధంగా ఇబ్బందులకు గురిచేశారో తెలిపే మరిన్ని వీడియోలు ఉన్నాయని తెలిపారు. సరైన సమయంలో వాటిని బయటపెడతానని స్పష్టం చేశారు.

సమస్య పరిష్కారం కోసం పలువురు రాజకీయ నాయకులను కలిసిన విషయాన్ని కూడా మేఘన వెల్లడించారు. మైలవరం ఎమ్మెల్యే వసంత కృష్ణప్రసాద్‌ను కలిసినట్లు, ఆయన తనకు మేలు జరిగేలా కొన్ని సూచనలు చేశారని తెలిపారు. ఫిర్యాదు చేసేందుకు పోలీసు అధికారులను సంప్రదించిన సమయంలో కేసు పెట్టకుండా మధ్యవర్తిత్వం చేసేందుకు ప్రయత్నాలు జరిగాయని చెప్పారు.

సజ్జల రామకృష్ణారెడ్డిని కూడా కలిసినట్లు మేఘన తెలిపారు. రాజీ చేసుకోవాలని ఆయన సూచించారని పేర్కొన్నారు. అయితే సమస్యను పరిష్కరించే దిశగా జోగి రమేశ్‌ కుటుంబం నుంచి తగిన స్పందన రాలేదని ఆరోపించారు. వైఎస్‌ జగన్‌ను కలిసేందుకు కూడా ప్రయత్నించామని, అయితే అది సాధ్యం కాలేదని చెప్పారు.

వివాహం జరిగిన రెండు నెలలకే తన భర్త రాజీవ్‌ విడాకుల కోసం కోర్టును ఆశ్రయించారని మేఘన తెలిపారు. ఆ విషయం తనకు ఆలస్యంగా తెలిసిందని చెప్పారు. విడాకుల కోసం దాఖలు చేసిన పిటిషన్‌ను కోర్టు కొట్టివేసిందని పేర్కొన్నారు. తనను వివాహ బంధం నుంచి దూరం చేసేందుకు అనేక కట్టుకథలు చెప్పారని ఆరోపించారు.

కుమారుడికి చికిత్స చేయించాల్సి ఉందని చెప్పి తనను పుట్టింటికి పంపించారని మేఘన తెలిపారు. చికిత్స పేరుతో తాను అత్తింటికి అప్పుడప్పుడు వెళ్లేదానినని చెప్పారు. తమ తప్పు లేకపోయినా ఏడాదిన్నరగా మానసిక క్షోభ అనుభవిస్తున్నామని ఆవేదన వ్యక్తం చేశారు. తనకు న్యాయం జరిగే వరకు పోరాటం కొనసాగిస్తానని స్పష్టం చేశారు.