గుంపుగా ఉంటే గుండె ధైర్యమే.. జంగిల్‌ బాబ్లర్స్‌ ప్రత్యేకత ఇదే!

అడవుల్లో ఎక్కడ చూసినా కిచకిచలతో సందడి చేస్తూ కనిపించే పక్షుల్లో జంగిల్‌ బాబ్లర్స్‌ ప్రత్యేకమైనవి. గుంపులుగా తిరుగుతూ నిరంతరం శబ్దాలు చేస్తుండటం వీటి ప్రధాన లక్షణం. అందుకే వీటి కదలికలు, అరుపులతో పరిసర ప్రాంతాల్లో ఎప్పుడూ సందడిగా ఉంటుంది. మనదేశంలో వీటిని సాధారణంగా ‘సెవెన్‌ సిస్టర్స్‌’ అని కూడా పిలుస్తారు.

జంగిల్‌ బాబ్లర్స్‌ జీవన విధానంలో అత్యంత ఆసక్తికరమైన అంశం వాటి సామూహిక జీవనం, పిల్లల పెంపకం. గుంపులోని పెద్దపక్షులు తమ సొంత పిల్లలు కాకపోయినా చిన్నపక్షులకు ఆహారం అందించడంతోపాటు వాటి సంరక్షణలోనూ భాగస్వాములు అవుతాయి. అంటే ఒక జంటకు పుట్టిన పిల్లలను గుంపులోని ఇతర పక్షులు కూడా కలిసి పెంచుతాయన్నమాట. ఈ సామూహిక పెంపకం వాటి పేరెంటింగ్‌ విధానంలో ప్రత్యేకతగా నిలుస్తోంది.

ఇక వీటి కిచకిచలకు అంతే ప్రాధాన్యం ఉంది. గుంపులోని పక్షులు ఒకదానితో ఒకటి నిరంతరం శబ్దాల ద్వారా సమాచారాన్ని పంచుకుంటున్నట్లు కనిపిస్తాయి. ప్రమాదం ఎదురైనప్పుడు తోటి పక్షులను అప్రమత్తం చేయడం, ఆహారం లభించినప్పుడు సంకేతాలు ఇవ్వడం వంటి సామూహిక ప్రవర్తన వీటిలో కనిపిస్తుంది.

జంగిల్‌ బాబ్లర్స్‌ పర్యావరణ సమతుల్యతలోనూ తమ వంతు పాత్ర పోషిస్తాయి. పంటలకు, మొక్కలకు హాని కలిగించే వివిధ కీటకాలను ఆహారంగా తీసుకోవడం ద్వారా సహజంగా కీటకాల నియంత్రణకు దోహదపడతాయి.

మరో ఆసక్తికరమైన విషయం ఏమిటంటే.. పాము కనిపించినప్పుడు భయంతో చెదరిపోకుండా గుంపుగా దానిని ఎదుర్కొనే స్వభావం వీటిలో కనిపిస్తుందని అనంతపురం ప్రభుత్వ ఆర్ట్స్‌ కళాశాల జంతుశాస్త్ర అధ్యాపకుడు జీఎల్‌ఎన్‌ ప్రసాద్‌ తెలిపారు. ఒక్కో పక్షి ఒంటరిగా కాకుండా మొత్తం గుంపు కలిసి స్పందించడం వీటి సామూహిక రక్షణ వ్యూహానికి నిదర్శనం.

అందుకే జంగిల్‌ బాబ్లర్స్‌ కేవలం కిచకిచలతో అడవిని సందడిగా మార్చే పక్షులు మాత్రమే కాదు.. కలిసి జీవించడం, కలిసి పిల్లలను పెంచడం, కలిసి ప్రమాదాలను ఎదుర్కోవడం నేర్పించే ప్రకృతి జీవులు కూడా.