వాట్సప్ కొత్త అధిపతిగా కునాల్ షా నియామకం

మెసేజింగ్ యాప్ వాట్సప్ అధిపతిగా భారతీయ టెక్నాలజీ దిగ్గజం కునాల్ షా బాధ్యతలు చేపట్టనున్నట్లు సమాచారం. దీర్ఘకాలంగా ఈ పదవిలో ఉన్న విల్ కాథ్‌కార్డ్ స్థానంలో మెటా ఆయనను నియమించినట్లు తెలుస్తోంది. కొత్త బాధ్యతల్లోకి వెళ్తున్న విల్ కాథ్‌కార్డ్ కొంతకాలం పాటు కునాల్ షాకు సహకరించనున్నారని సమాచారం.

భారత్‌లో తొలి తరం డిజిటల్ చెల్లింపు వ్యవస్థల నుంచి ఫిన్‌టెక్ యూనికార్న్ క్రెడ్ స్థాపన వరకు కునాల్ షా తనదైన ముద్ర వేశారు. ఆయన నేతృత్వంలోని క్రెడ్‌లో మెటా రూ.8,550 కోట్ల (సుమారు 900 మిలియన్ డాలర్లు) పెట్టుబడులు పెట్టనుందనే సమాచారం కూడా వెలువడింది. ఈ పరిణామం నేపథ్యంలో కునాల్ షా క్రెడ్ సీఈఓ బాధ్యతల నుంచి తప్పుకుని, మెటా అంతర్జాతీయ నాయకత్వ బృందంలో చేరనున్నట్లు చెబుతున్నారు.

మెటా వ్యవస్థాపకుడు, సీఈఓ మార్క్ జుకర్‌బర్గ్ మాట్లాడుతూ, “భారత్‌లో అత్యంత ముఖ్యమైన టెక్ కంపెనీల్లో ఒకటిగా క్రెడ్‌ను కునాల్ షా నిలిపారు. ఆయనకు ఉన్న ప్రపంచ దృక్కోణం వాట్సప్ యాప్ అభివృద్ధికి ఉపయోగపడుతుంది” అని అభిప్రాయపడ్డారు. వాట్సప్ భవిష్యత్ దిశలో కొత్త అవకాశాల కోసం ఎదురు చూస్తున్నట్లు కునాల్ షా తెలిపారు.

కునాల్ షా గతంలో ఫ్రీఛార్జ్ వంటి స్టార్టప్‌లను ప్రారంభించి భారత డిజిటల్ చెల్లింపుల రంగంలో కీలక పాత్ర పోషించారు. ఆయన 250కు పైగా స్టార్టప్‌లలో ఏంజెల్ ఇన్వెస్టర్‌గా పెట్టుబడులు పెట్టారు. అలాగే ఇండియా మొబైల్ అండ్ ఇంటర్నెట్ అసోసియేషన్ ఛైర్మన్‌గా, పలు అంతర్జాతీయ పెట్టుబడి సంస్థలకు సలహాదారుగా కూడా పనిచేశారు. ప్రస్తుతం క్రెడ్ సీఈఓగా మితేన్ సంపత్ తక్షణ బాధ్యతలు స్వీకరించనున్నారు.

వాట్సప్‌కు భారత్ అతిపెద్ద మార్కెట్ కావడం, బిజినెస్ మెసేజింగ్ మరియు డిజిటల్ చెల్లింపుల్లో కీలక పాత్ర ఉండటంతో భారతీయ నాయకత్వాన్ని ఎంపిక చేసినట్లు విశ్లేషకులు భావిస్తున్నారు. మెటా చీఫ్ ప్రొడక్ట్ ఆఫీసర్ క్రిస్ కాక్స్ స్వయంగా కునాల్ షాను ఈ బాధ్యతల కోసం సంప్రదించినట్లు సమాచారం.