ఇంటర్ తర్వాత మీకు నచ్చిన కోర్సును మీరే డిజైన్ చేసుకోండి..

ఇంటర్ పూర్తి చేసిన తర్వాత చాలామంది విద్యార్థులు ఇంజినీరింగ్, మెడిసిన్ లేదా సంప్రదాయ డిగ్రీ కోర్సుల వైపు అడుగులు వేస్తారు. అయితే ప్రస్తుతం ప్రపంచవ్యాప్తంగా వేగంగా ప్రాచుర్యం పొందుతున్న విద్యా విధానం “లిబరల్ స్టడీస్”. ఇందులో విద్యార్థులు తమ ఆసక్తులు, లక్ష్యాలకు అనుగుణంగా వివిధ సబ్జెక్టులను ఎంపిక చేసుకుని స్వంత విద్యా ప్రయాణాన్ని రూపొందించుకోవచ్చు.

లిబరల్ స్టడీస్ ప్రత్యేకత ఏమిటంటే.. ఒకే రంగానికి పరిమితం కాకుండా ఆర్ట్స్, సైన్స్, ఎకనామిక్స్, కంప్యూటర్ సైన్స్, సైకాలజీ, పాలిటికల్ సైన్స్, మీడియా, డిజైన్ వంటి విభిన్న రంగాలను కలిపి నేర్చుకునే అవకాశం ఉంటుంది. దీనివల్ల విద్యార్థుల్లో విశ్లేషణాత్మక ఆలోచన, సమస్య పరిష్కార నైపుణ్యాలు, కమ్యూనికేషన్ స్కిల్స్, నాయకత్వ లక్షణాలు పెరుగుతాయి.

భారత్‌లో అశోకా యూనివర్సిటీ, క్రియా యూనివర్సిటీ, ఫ్లేమ్ యూనివర్సిటీ, ఓపీ జిందాల్ గ్లోబల్ యూనివర్సిటీ, శివ నాడార్ యూనివర్సిటీ, అజీం ప్రేమ్‌జీ యూనివర్సిటీ, గీతం యూనివర్సిటీ వంటి ప్రముఖ విద్యాసంస్థలు లిబరల్ స్టడీస్ కోర్సులను అందిస్తున్నాయి.

ప్రవేశాల కోసం అకడమిక్ ప్రతిభతో పాటు ఎంట్రన్స్ టెస్ట్, స్టేట్‌మెంట్ ఆఫ్ పర్పస్ (SOP), ఇంటర్వ్యూ, సహపాఠ్య కార్యక్రమాల్లో పాల్గొనడం వంటి అంశాలను కూడా పరిగణనలోకి తీసుకుంటారు.

భవిష్యత్‌లో మారుతున్న ఉద్యోగ అవకాశాలకు అనుగుణంగా బహుముఖ నైపుణ్యాలను పెంపొందించుకోవాలనుకునే విద్యార్థులకు లిబరల్ స్టడీస్ ఉత్తమ ఎంపికగా మారుతోంది.