సూర్య సినిమా మార్నింగ్‌ షోలు రద్దు.. క్షమాపణలు చెప్పిన టీమ్‌

కోలీవుడ్ అగ్ర కథానాయకుడు సూర్య నటించిన తాజా చిత్రం ‘కరుప్పు’ (తెలుగులో ‘వీరభద్రుడు’) విడుదలకు ముందే అనుకోని ఆర్థిక ఇబ్బందుల్లో చిక్కుకున్నట్లు సమాచారం. నేడు ప్రేక్షకుల ముందుకు రావాల్సిన ఈ సినిమా చివరి నిమిషంలో ఎదురైన సమస్యలతో విడుదల షెడ్యూల్‌లో మార్పులు చోటు చేసుకుంది.

ప్రారంభంలో మార్నింగ్ షోల కోసం అనుమతులు వచ్చినప్పటికీ, ఆ షోలు అనేక చోట్ల రద్దయ్యాయి. దీంతో అభిమానులు మధ్యాహ్నం 12 గంటల షో కోసం ఎదురుచూస్తున్నారు. తమిళనాడుతో పాటు ఆంధ్రప్రదేశ్, తెలంగాణ రాష్ట్రాల్లోని పలు థియేటర్లలో ఉదయం ఆటలు నిలిపివేశారు.

అనివార్య పరిస్థితుల కారణంగా మార్నింగ్ షోలు ప్రదర్శించలేకపోతున్నామని నిర్మాత సోషల్ మీడియా వేదికగా క్షమాపణలు తెలిపారు. ఇదే సమయంలో అమెరికాలో కూడా ప్రీమియర్ షోలు రద్దు కావడం పరిస్థితి తీవ్రతను సూచిస్తోంది. అంతేకాకుండా, వారాంతపు బుకింగ్స్ కూడా క్లియర్ కాకపోవడంతో ఓవర్సీస్ విడుదలపై అనిశ్చితి నెలకొంది.

సినీ వర్గాల సమాచారం ప్రకారం, గత సినిమాలకు సంబంధించిన ఫైనాన్షియల్ బకాయిలు ఇంకా పూర్తిగా సర్దుబాటు కాకపోవడమే ప్రధాన సమస్యగా భావిస్తున్నారు. ఈ బకాయిల చెల్లింపులపై ప్రస్తుతం సంబంధిత వర్గాల మధ్య చర్చలు జరుగుతున్నాయి. అవి పరిష్కారమైతేనే తదుపరి షోలు సాధ్యమవుతాయని తెలుస్తోంది.

ఈ పరిణామాలపై చిత్ర దర్శకుడు ఆర్.జె. బాలాజీ భావోద్వేగంగా స్పందించారు. “ప్రస్తుత పరిస్థితికి నా దగ్గర స్పష్టమైన సమాధానం లేదు. నిర్మాతలు సమస్యలను పరిష్కరించడానికి ప్రయత్నిస్తున్నారు. ఈ సినిమా ఎప్పుడూ ఏదో ఒక అడ్డంకిని ఎదుర్కొంటూనే వచ్చింది. అయినా 32 నెలల తర్వాత ప్రేక్షకుల ముందుకు తీసుకురావడానికి సిద్ధమయ్యాము. ఈసారి కూడా దేవుడిపై నాకు పూర్తి నమ్మకం ఉంది” అని ఆయన పేర్కొన్నారు.

త్రిష హీరోయిన్‌గా నటించిన ఈ చిత్రంపై మొదటినుంచే భారీ అంచనాలు ఉండగా, తాజా పరిణామాలు సినిమాకు మరింత ఆసక్తిని, అదే సమయంలో ఉత్కంఠను పెంచాయి.