ఇంధన ధరల పెంపుపై గిగ్ వర్కర్ల ఆగ్రహం

దేశవ్యాప్తంగా గిగ్ వర్కర్లు మరోసారి ఆందోళన బాట పట్టారు. పెరుగుతున్న ఇంధన ధరలు, తక్కువ వేతనాలు, సామాజిక భద్రత లేకపోవడాన్ని నిరసిస్తూ గిగ్ వర్కర్లు ఐదు గంటలపాటు సమ్మె చేపట్టనున్నారు. మధ్యాహ్నం 12 గంటల నుంచి సాయంత్రం 5 గంటల వరకు క్యాబ్ డ్రైవర్లు, ఫుడ్ డెలివరీ పార్టనర్లు, ఇతర ప్లాట్‌ఫామ్ సేవల కార్మికులు విధులను బహిష్కరించనున్నారు.Gig and Platform Service Workers Union పిలుపుతో ఈ సమ్మె నిర్వహించబడుతోంది. దేశవ్యాప్తంగా యాప్ ఆధారిత సేవలతో పనిచేస్తున్న లక్షలాది మంది కార్మికులు ఈ నిరసనలో పాల్గొనే అవకాశముంది.

ఇటీవల పెట్రోల్‌, డీజిల్‌ ధరలను లీటరుకు రూ.3 చొప్పున పెంచడంతో గిగ్ వర్కర్లపై భారీ ఆర్థిక భారం పడిందని సంఘాలు ఆందోళన వ్యక్తం చేస్తున్నాయి. ఇప్పటికే ఆదాయాలు తగ్గిపోతుండగా, ఇంధన ఖర్చులు పెరగడం వల్ల జీవనోపాధి కష్టమైందని వర్కర్లు చెబుతున్నారు.ఈ ధరల పెంపు ప్రభావం దేశవ్యాప్తంగా సుమారు 1.2 కోట్ల గిగ్ వర్కర్లపై పడనున్నట్లు జీఐపీఎస్‌డబ్ల్యూయూ పేర్కొంది. ముఖ్యంగా క్యాబ్ డ్రైవర్లు, బైక్ టాక్సీ సర్వీసులు, ఆన్‌లైన్ ఫుడ్ డెలివరీ కార్మికులు తీవ్ర ఇబ్బందులు ఎదుర్కొంటున్నట్లు తెలిపింది.

గతంలో కూడా గిగ్ వర్కర్లు తమ వేతనాలు పెంచాలని, ఉద్యోగ భద్రత కల్పించాలని, బీమా మరియు పెన్షన్ వంటి సామాజిక రక్షణలు అందించాలని డిమాండ్ చేస్తూ పలుమార్లు నిరసనలు చేపట్టారు. ఈ నేపథ్యంలో కేంద్ర ప్రభుత్వం గిగ్ వర్కర్లకు సామాజిక భద్రత కల్పించేందుకు ముసాయిదా నిబంధనలను విడుదల చేసినప్పటికీ, అవి అమలులోకి రావడంలో జాప్యం జరుగుతోందని కార్మిక సంఘాలు విమర్శిస్తున్నాయి.ఈ సమ్మె కారణంగా పలు నగరాల్లో క్యాబ్ సేవలు, ఫుడ్ డెలివరీలు, ఈ-కామర్స్ సరఫరా సేవలపై తాత్కాలిక ప్రభావం పడే అవకాశం ఉంది. వినియోగదారులు సేవల్లో ఆలస్యం ఎదుర్కొనే అవకాశముందని సంబంధిత సంస్థలు సూచిస్తున్నాయి.