ఇంటర్నెట్ డెస్క్: సాధారణంగా ఓ సినిమా విజయం సాధించాలంటే మంచి కథ, ఆకట్టుకునే నటీనటులు, అద్భుతమైన విజువల్స్, భారీ బడ్జెట్తో పాటు ప్రచారం కూడా కీలకంగా మారుతుంది. అయితే.. చైనాలో విడుదలైన ఓ యానిమేషన్ సినిమా మాత్రం ఇందుకు పూర్తిగా భిన్నంగా నిలిచింది. భారీగా ప్రచారం చేయకపోయినా.. నాణ్యతపై దారుణమైన విమర్శలు, సోషల్మీడియాలో వచ్చిన ట్రోల్స్ ఈ సినిమాకు అనూహ్యంగా కలిసొచ్చాయి. చివరకు అదే ట్రోలింగ్ సినిమాకు ఉచిత ప్రచారంగా మారి బాక్సాఫీస్ వద్ద భారీ వసూళ్లు వచ్చేలా చేసింది.
ఆగస్టు 5న చైనాలో విడుదలైన ఈ చిత్రమే ‘న్యూ లాయ్’ (Niu Lai). తెలుగులో దీని అర్థం ‘ఆవు వస్తోంది’ అని. దాదాపు 86 నిమిషాల నిడివి ఉన్న ఈ యానిమేషన్ సినిమాలో ఓ లేగదూడ, పిచ్చుక చుట్టూ సాగే విచిత్రమైన కలల ప్రపంచాన్ని చూపించినట్లు తెలుస్తోంది.
ఈ సినిమాను భారీ నిర్మాణ సంస్థలు రూపొందించలేదు. తల్లీకొడుకు కలిసి సుమారు ఐదేళ్లపాటు కష్టపడి సినిమాను రూపొందించినట్లు ప్రచారంలో ఉంది. కథ, రచన, దర్శకత్వం, డబ్బింగ్, ప్రొడక్షన్ తదితర పనులను వారిద్దరే నిర్వహించినట్లు సమాచారం. మొత్తం సినిమాను తెరకెక్కించేందుకు దాదాపు రూ.లక్ష మాత్రమే ఖర్చు చేసినట్లు తెలుస్తోంది.
అయితే.. థియేటర్లలోకి వచ్చిన తర్వాత పరిస్థితి ఆశించిన దానికి పూర్తి భిన్నంగా మారింది. విడుదలైన తొలి పది రోజుల్లో చైనా వ్యాప్తంగా కేవలం 300 మంది మాత్రమే ఈ సినిమాకు టికెట్లు కొనుగోలు చేశారు. దీంతో 7,700 యువాన్లకు పైగా.. అంటే మన కరెన్సీలో సుమారు రూ.1.04 లక్షలు మాత్రమే వసూలయ్యాయి. పెట్టిన డబ్బు దాదాపు తిరిగి వచ్చినా.. సినిమా విజయవంతమవుతుందని ఎవరూ ఊహించలేదు.
సినిమా చూసిన కొందరు ప్రేక్షకులు దాని యానిమేషన్, గ్రాఫిక్స్, సన్నివేశాలపై తీవ్ర విమర్శలు చేశారు. 2026లో వచ్చిన అత్యంత చెత్త సినిమాల్లో ఇదొకటంటూ సోషల్మీడియాలో పోస్టులు పెట్టారు. కొందరు అయితే ‘దీని కంటే ఏఐతో మెరుగైన వీడియో చేయొచ్చు’ అంటూ కామెంట్లు చేశారు.
అయితే ఈ విమర్శలే సినిమాకు ఊహించని ప్రచారాన్ని తెచ్చిపెట్టాయి. సినిమాలోని కొన్ని సన్నివేశాలు, గ్రాఫిక్స్కు సంబంధించిన వీడియోలు సోషల్మీడియాలో విపరీతంగా షేర్ అయ్యాయి. వాటిపై నెటిజన్లు మీమ్స్ తయారు చేశారు. ఫలితంగా సినిమా పేరు ఒక్కసారిగా ఎక్కువ మందికి తెలిసింది.
ట్రోల్స్, మీమ్స్ వైరల్ కావడంతో చాలామందిలో ఆసక్తి మొదలైంది. ‘అసలు ఈ సినిమాలో అంత చెత్తగా ఏముంది?’ అనే ఉత్సుకతతో కొందరు థియేటర్లకు వెళ్లడం ప్రారంభించారు. ఇలా సినిమా చూడాలనే ఆసక్తి పెరిగేకొద్దీ థియేటర్లలో ప్రేక్షకుల సంఖ్య కూడా పెరిగింది.
సాధారణంగా ప్రతికూల ప్రచారం సినిమాకు నష్టం చేస్తుందని భావిస్తాం. కానీ ‘న్యూ లాయ్’ విషయంలో మాత్రం ఇదే ప్రతికూల ప్రచారం పాజిటివ్ బాక్సాఫీస్ ఫలితంగా మారింది. సినిమా బాగుందనే ప్రచారానికి బదులుగా.. ‘ఇంత చెత్తగా ఉందట.. ఎలా ఉందో మనమే చూద్దాం’ అనే ఆసక్తి ప్రేక్షకులను థియేటర్లకు రప్పించింది.
ప్రస్తుతం ఈ చిత్రం చైనా బాక్సాఫీస్ వద్ద 14.9 మిలియన్ యువాన్లకు పైగా వసూలు చేసినట్లు సమాచారం. మన కరెన్సీలో ఈ మొత్తం సుమారు రూ.20 కోట్లకు సమానం. కేవలం రూ.లక్ష బడ్జెట్తో తెరకెక్కిన సినిమాకు ఇది భారీ మొత్తమే.
అంతేకాదు.. చైనాలో విడుదలైన కొన్ని భారీ హాలీవుడ్ చిత్రాల కలెక్షన్లతోనూ ఈ చిన్న సినిమా పోటీ పడుతున్నట్లు ప్రచారం జరుగుతోంది. మొదట్లో కేవలం 300 మంది ప్రేక్షకులతో ప్రారంభమైన సినిమా.. ఇప్పుడు కోట్ల రూపాయల వసూళ్లు సాధించడం సినీ వర్గాలను కూడా ఆశ్చర్యానికి గురిచేస్తోంది.
మొత్తంగా ‘న్యూ లాయ్’ కథ సినిమా విజయానికి కొత్త కోణాన్ని చూపించింది. మంచి సినిమా అంటూ వచ్చే ప్రచారం మాత్రమే కాదు.. ‘చెత్త సినిమా’ అనే ట్రోలింగ్ కూడా ఒక్కోసారి ప్రేక్షకుల్లో ఆసక్తిని పెంచి బాక్సాఫీస్ విజయానికి దారితీయవచ్చని ఈ చిత్రం నిరూపించింది.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsToday NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews WorldNews
