ఆగస్టు 1న ఏపీకి ప్రధాని మోదీ.. కీలక ప్రాజెక్టుల ప్రారంభోత్సవాలు

ప్రధానమంత్రి నరేంద్రమోదీ ఆగస్టు 1న ఆంధ్రప్రదేశ్‌లో పర్యటించనున్నారు. ఈ సందర్భంగా విజయనగరం జిల్లా భోగాపురంలో నిర్వహించే కార్యక్రమంలో రూ.17,900 కోట్లకు పైగా విలువైన పలు అభివృద్ధి ప్రాజెక్టులకు ప్రారంభోత్సవాలు, శంకుస్థాపనలు చేయనున్నట్లు ప్రధానమంత్రి కార్యాలయం వెల్లడించింది.

ఈ పర్యటనలో భాగంగా రూ.5,640 కోట్ల వ్యయంతో నిర్మించిన భోగాపురం అల్లూరి సీతారామరాజు అంతర్జాతీయ గ్రీన్‌ఫీల్డ్ విమానాశ్రయాన్ని ప్రధాని మోదీ ప్రారంభించనున్నారు. ఈ విమానాశ్రయం ఉత్తరాంధ్ర ప్రాంతంలో విమాన రాకపోకలు, పర్యాటకం, వాణిజ్య కార్యకలాపాలకు మరింత ఊతమివ్వనుందని భావిస్తున్నారు.

అలాగే విశాఖపట్నంలో రూ.460 కోట్లతో ఏర్పాటు చేయనున్న ఆంధ్రప్రదేశ్ తొలి సెమీకండక్టర్ తయారీ కేంద్రానికి ప్రధాని శంకుస్థాపన చేయనున్నారు. ఈ ప్లాంట్‌లో ఏడాదికి సుమారు 9.6 కోట్ల సెమీకండక్టర్ చిప్‌లను తయారు చేసే సామర్థ్యం ఉంటుందని అధికారులు తెలిపారు. దీంతో రాష్ట్రంలో ఎలక్ట్రానిక్స్, సెమీకండక్టర్ రంగాలకు కొత్త అవకాశాలు ఏర్పడే అవకాశం ఉంది.

ఇక కర్నూలు-IV పునరుత్పాదక ఇంధన జోన్‌కు సంబంధించిన రూ.5,550 కోట్ల విద్యుత్ ప్రసార వ్యవస్థ ప్రాజెక్టుకు కూడా శంకుస్థాపన చేయనున్నారు. కర్నూలు, అనంతపురం సోలార్-విండ్ ఎనర్జీ జోన్లకు సంబంధించిన రూ.3,550 కోట్లు, రూ.820 కోట్ల విలువైన ట్రాన్స్‌మిషన్ ప్రాజెక్టులను ప్రారంభించనున్నారు.

మరోవైపు రూ.1,880 కోట్లకు పైగా విలువైన జాతీయ రహదారి ప్రాజెక్టులకు కూడా ప్రారంభోత్సవాలు, శంకుస్థాపనలు జరగనున్నాయి. ఈ ప్రాజెక్టులు పూర్తయితే విజయవాడలో ట్రాఫిక్ రద్దీ తగ్గడంతో పాటు విశాఖపట్నం-హైదరాబాద్ మధ్య ప్రయాణ సమయం తగ్గే అవకాశం ఉంది. ప్రాంతీయ రవాణా, అనుసంధానం మరింత మెరుగుపడుతుందని భావిస్తున్నారు.

ఏపీ పర్యటన అనంతరం ప్రధాని మోదీ కర్ణాటకలోని మైసూరుకు వెళ్లనున్నారు. అక్కడ స్వామి వివేకానంద సాంస్కృతిక యువ కేంద్రాన్ని ప్రారంభించి, సభను ఉద్దేశించి ప్రసంగించనున్నారు.