షోయబ్ అక్తర్ సోదరుడి అంత్యక్రియల్లో లష్కరే తయ్యిబా ఉగ్రవాదులు హాజరైనట్లు సమాచారం

పాకిస్థాన్ మాజీ క్రికెటర్ షోయబ్ అక్తర్ సోదరుడు షాహిద్ అక్తర్ అంత్యక్రియలు ఇస్లామాబాద్‌లో నిర్వహించగా, ఈ కార్యక్రమంలో లష్కరే తయ్యిబా ఉగ్రవాదులు పాల్గొన్నట్లు సమాచారం వెలుగులోకి వచ్చింది. వారిలో పహల్గాం ఉగ్రదాడి సూత్రధారి సైఫుల్లా కసూరీ కూడా ఉన్నట్లు సోషల్ మీడియాలో వీడియోలు వైరల్ అవుతున్నాయి.

అంత్యక్రియలకు లష్కరే తయ్యిబా డిప్యూటీ చీఫ్ సైఫుల్లా కసూరీతో పాటు, సంస్థ రాజకీయ విభాగం పీఎంఎంఎల్ అధ్యక్షుడు ఇనామ్ ఉర్ రెహ్మాన్ హాజరైనట్లు తెలుస్తోంది. హఫీజ్ సయీద్ ఏర్పాటు చేసిన పీఎంఎంఎల్ సంస్థ 2024 పాకిస్థాన్ ఎన్నికల్లో కూడా పాల్గొన్నట్లు సమాచారం.

ఈ ఘటనతో పాకిస్థాన్‌లో ఉగ్రవాద సంస్థల ప్రభావం, వారి బహిరంగ కార్యకలాపాలపై మరోసారి చర్చ మొదలైంది. అంతర్జాతీయంగా ప్రకటిత ఉగ్రవాదులు ఎలాంటి ఆంక్షలు లేకుండా బహిరంగ కార్యక్రమాల్లో కనిపించడం తీవ్ర విమర్శలకు దారి తీస్తోంది.

పహల్గాం ఉగ్రదాడి కేసులో కూడా సైఫుల్లా కసూరీ (ఖలీద్) పేరు ప్రధాన సూత్రధారిగా వెలుగులోకి వచ్చిన విషయం తెలిసిందే. 2025 ఏప్రిల్ 22న జరిగిన ఆ దాడిలో 26 మంది అమాయకులు ప్రాణాలు కోల్పోయారు.