రివ్యూ: ‘విష్ణు విన్యాసం’ – శ్రీ విష్ణు కామెడీ ఎంటర్‌టైనర్ ప్రేక్షకులను అలరించిందా?

జూనియర్ లెక్చరర్‌గా పనిచేసే విష్ణు (శ్రీ విష్ణు)కి జాతకాలు, వాస్తు, న్యూమరాలజీపై అమితమైన నమ్మకం. మంచి ముహూర్తం చూసుకోకుండా ఇంటి బయట అడుగుపెట్టడు. ఈ మూఢనమ్మకాలే అతని పెళ్లిని ఆలస్యం చేస్తుంటాయి. అదే కాలేజీలో మనీషా (నయన్ సారిక) కూడా లెక్చరర్‌. ఆమె జీవితంలోనూ ఓ విచిత్రమైన సమస్య ఉంటుంది. మొదటి చూపులోనే విష్ణుపై ప్రేమలో పడే ఆమె, జాతకాలు కుదిరాయని తెలిసాక అతనితో ప్రేమను ముందుకు తీసుకెళ్తుంది. అయితే పెళ్లి దశకు చేరుకున్న సమయంలో ఆమె అసలు సమస్య బయటపడడంతో కథ మలుపు తిరుగుతుంది.

ఎలా సాగింది?

జాతకాలు, న్యూమరాలజీ నేపథ్యంలో సాగే ఈ కథ కొత్తదేమీ కాకపోయినా, కథానాయిక పాత్రలోని ట్విస్ట్ కథకు ప్రధాన బలం. మొదటి భాగంలో పరిచయాలు, ప్రేమ ఎపిసోడ్లు సాధారణంగానే అనిపిస్తాయి. కానీ కథానాయిక సమస్య బయటపడిన తర్వాత వినోదం ఊపందుకుంటుంది.శ్రీ విష్ణు స్టైల్ ట్రెండీ డైలాగులు, మీమ్ మెటీరియల్‌గా మారే సన్నివేశాలు యువతను ఆకట్టుకుంటాయి. ‘జయం’ సినిమాను గుర్తు చేసే ఓ ముద్దు ఎపిసోడ్ హైలైట్‌గా నిలుస్తుంది. విరామం వరకు కథ సరదాగా నడుస్తూ, ద్వితీయార్థంపై ఆసక్తి పెంచుతుంది.

విరామం తర్వాత కథ అసలు ట్రాక్‌లోకి వస్తుంది. కథానాయిక జీవితంలో ఉన్న సమస్య చుట్టూ సంఘటనలు తిరుగుతాయి. హీరో తన మూఢనమ్మకాల మధ్య, ప్రేమ మధ్య పడే సంఘర్షణను దర్శకుడు సరదాగా చూపించే ప్రయత్నం చేశారు. కొన్ని సన్నివేశాలు పూర్తిగా కామెడీపై ఆధారపడగా, మరికొన్ని ఎమోషనల్ టచ్‌తో సాగుతాయి.శ్రీ విష్ణు తనకు సొంతమైన స్టైల్లో డైలాగ్ డెలివరీ, బాడీ లాంగ్వేజ్‌తో నవ్వులు పండించారు. ముఖ్యంగా సత్య, బ్రహ్మాజీ వంటి నటులతో వచ్చే కాంబినేషన్ సీన్స్ మంచి వినోదాన్ని అందిస్తాయి. క్లైమాక్స్‌లో వచ్చే మలుపు కథను కొంత సీరియస్ మోడ్‌లోకి తీసుకెళ్తుంది.

నటీనటుల ప్రదర్శన

శ్రీ విష్ణు తన ఇమేజ్‌కు తగ్గ పాత్రలో అలవోకగా నటించారు. కామెడీ టైమింగ్‌తో పాటు ఎమోషనల్ సన్నివేశాల్లో కూడా మెప్పించారు.
నయన్ సారిక పాత్రకు కొత్తదనం ఉంది. ఆమె పాత్రలోని ట్విస్ట్ కథకు ప్రధాన బలం.
సత్య, మురళీ శర్మ, బ్రహ్మాజీ వంటి వారు తమ పాత్రల మేరకు నటించారు.