థియరీ కంటే ప్రాక్టికల్‌ శిక్షణకు పెద్దపీట.. స్కిల్‌ యూనివర్సిటీలతో ప్రయోజనాలివే

ప్రస్తుత ఉద్యోగ మార్కెట్‌లో కేవలం విద్యార్హత ఉంటే సరిపోదు. డిగ్రీతో పాటు పరిశ్రమలకు అవసరమైన ప్రాక్టికల్‌ నైపుణ్యాలు ఉంటేనే మెరుగైన అవకాశాలను అందిపుచ్చుకోవచ్చు. ఈ అవసరాన్ని దృష్టిలో పెట్టుకుని దేశంలో స్కిల్‌ యూనివర్సిటీలు ఏర్పాటవుతున్నాయి. సాధారణ విశ్వవిద్యాలయాలతో పోలిస్తే వీటిలో ప్రయోగాత్మక శిక్షణ, పరిశ్రమల అనుసంధానం, ఇంటర్న్‌షిప్‌, అప్రెంటిస్‌షిప్‌, ప్రత్యక్ష పని అనుభవానికి ఎక్కువ ప్రాధాన్యం ఉంటుంది.

పదో తరగతి తర్వాత డిప్లొమా, డివోక్‌ వంటి కోర్సులతో పాటు ఇంటర్మీడియట్‌ తర్వాత బీవోక్‌, బీఎస్సీ, బీబీఏ, బీటెక్‌ వంటి డిగ్రీ కోర్సులు అందుబాటులో ఉంటాయి. డిగ్రీ తర్వాత కొన్ని విశ్వవిద్యాలయాల్లో ఎంవోక్‌, ఎంబీఏ, ఎంటెక్‌ వంటి పీజీ కోర్సులు కూడా నిర్వహిస్తున్నారు. మూడు నెలలు, ఆరు నెలలు, ఏడాది వ్యవధితో స్వల్పకాలిక సర్టిఫికెట్‌ కోర్సులు కూడా ఉంటాయి.

రోబోటిక్స్‌, ఆటోమేషన్‌, కృత్రిమ మేధ, సైబర్‌ సెక్యూరిటీ, మెకట్రానిక్స్‌, సౌర సాంకేతికత, డేటా సెంటర్‌ నిర్వహణ, బ్యాంకింగ్‌, ఆర్థిక సేవలు, లాజిస్టిక్స్‌, ఆరోగ్య సంరక్షణ, ఆతిథ్య రంగం, ఫార్మా, బయోటెక్నాలజీ వంటి విభాగాల్లో ప్రత్యేక కోర్సులు అందిస్తున్నారు.

తెలంగాణ ప్రభుత్వం ఏర్పాటు చేసిన యంగ్‌ ఇండియా స్కిల్‌ యూనివర్సిటీ ఈ తరహా విద్యకు ఒక ఉదాహరణ. ఫార్మా, లైఫ్‌ సైన్సెస్‌, హెల్త్‌కేర్‌, లాజిస్టిక్స్‌, ఏవియేషన్‌, ఐటీ, వ్యవసాయం, ఆంత్రప్రెన్యూర్‌షిప్‌ వంటి రంగాల్లో పరిశ్రమల భాగస్వామ్యంతో కోర్సులను నిర్వహిస్తోంది. బీటెక్‌ అప్లైడ్‌ లైఫ్‌ సైన్సెస్‌, బీఎస్సీ కార్డియోవాస్క్యులర్‌ టెక్నాలజీతో పాటు డేటా సెంటర్‌ ఆపరేషన్స్‌, హాస్పిటల్‌ అడ్మినిస్ట్రేషన్‌, ఎయిర్‌పోర్ట్‌ అండ్‌ కార్గో ఆపరేషన్స్‌, ఫార్మా టెక్నీషియన్‌ వంటి స్వల్పకాలిక కోర్సులు కూడా ఉన్నాయి.

కోర్సును బట్టి అర్హతలు మారుతాయి. సాధారణంగా డిప్లొమా కోర్సులకు పదో తరగతి, డిగ్రీ కోర్సులకు ఇంటర్మీడియట్‌, పీజీ కోర్సులకు సంబంధిత డిగ్రీ అవసరం. సాంకేతిక కోర్సులకు ఎంపీసీ, ఆరోగ్యం, వైద్యం, లైఫ్‌ సైన్సెస్‌ కోర్సులకు బైపీసీ వంటి ప్రత్యేక అర్హతలు అవసరం కావచ్చు. కొన్ని చోట్ల మార్కుల ఆధారంగా, మరికొన్ని చోట్ల ప్రవేశ పరీక్ష, ఆప్టిట్యూడ్‌ టెస్టు, స్కిల్‌ టెస్టు లేదా ఇంటర్వ్యూ ద్వారా ప్రవేశాలు కల్పిస్తారు.

స్కిల్‌ యూనివర్సిటీల్లో చదువుతున్న సమయంలోనే పరిశ్రమల్లో ఇంటర్న్‌షిప్‌, అప్రెంటిస్‌షిప్‌ చేసే అవకాశం ఉండటం ప్రధాన ప్రయోజనం. దీనివల్ల విద్యార్థులకు వాస్తవ పని వాతావరణం, పరికరాల వినియోగం, సాంకేతిక ప్రక్రియలు, కమ్యూనికేషన్‌, టీమ్‌వర్క్‌ వంటి నైపుణ్యాలు అలవడతాయి. కోర్సును బట్టి ఫార్మా, బయోటెక్నాలజీ, హాస్పిటల్స్‌, ఐటీ, డేటా సెంటర్లు, లాజిస్టిక్స్‌, ఏవియేషన్‌, బ్యాంకింగ్‌, రిటైల్‌, తయారీ, ఆటోమేషన్‌ వంటి రంగాల్లో ఉద్యోగ అవకాశాలు లభించవచ్చు.

కేవలం కోర్సు పేరు లేదా ప్లేస్‌మెంట్‌ హామీలను చూసి స్కిల్‌ యూనివర్సిటీని ఎంపిక చేసుకోకూడదు. యూజీసీ గుర్తింపు, కోర్సుకు అవసరమైన అనుమతులు, ఉన్నత విద్యకు డిగ్రీ చెల్లుబాటు, పరిశ్రమలతో వాస్తవ భాగస్వామ్యాలు, ఇంటర్న్‌షిప్‌ వివరాలు, గత విద్యార్థుల ఉద్యోగాలు, ప్రారంభ వేతనాలు వంటి అంశాలను ముందుగానే పరిశీలించాలి. విద్యార్థి ఆసక్తి, సామర్థ్యం, భవిష్యత్తు కెరీర్‌ లక్ష్యాలకు సరిపోయే కోర్సును ఎంచుకుంటే స్కిల్‌ యూనివర్సిటీ విద్య మంచి కెరీర్‌కు బలమైన పునాదిగా మారుతుంది.