ఆస్తి కోసం కన్నతండ్రిని కాల్చిచంపిన కుమారుడు.. గాజియాబాద్‌లో దారుణం

ఉత్తర్‌ప్రదేశ్‌లోని గాజియాబాద్‌ జిల్లా మోదీనగర్‌లో ఆస్తి వివాదం విషాదానికి దారితీసింది. రూ.150 కోట్ల విలువైన ఆస్తి కోసం ఓ కుమారుడు తన కన్నతండ్రిని పిస్టల్‌తో కాల్చి చంపిన ఘటన స్థానికంగా కలకలం రేపింది.

మోదీనగర్‌ పోలీస్‌ స్టేషన్‌ పరిధిలోని బుడానా గ్రామానికి చెందిన హరి ఓం ఛౌదరి (52) సంపన్న రైతుగా గుర్తింపు పొందారు. ఆయనకు గ్రామంలో 47 ఎకరాల వ్యవసాయ భూమితో పాటు దిల్లీ-మేరఠ్‌ మార్గంలో ఓ షాపింగ్‌ కాంప్లెక్స్‌ ఉంది. వీటి మొత్తం విలువ సుమారు రూ.150 కోట్లు ఉంటుందని పోలీసులు తెలిపారు.

హరి ఓంకు భార్య అనితతో పాటు ఇద్దరు కుమారులు నిఖిల్‌, నీషూ ఉన్నారు. పెద్ద కుమారుడు నిఖిల్‌ కొంతకాలంగా మద్యానికి బానిసయ్యాడని, ఈ విషయమై తండ్రి తరచూ అతడిని మందలించేవారని కుటుంబ సభ్యులు తెలిపారు.

గతంలోనే హరి ఓం తన కుమారుడు నిఖిల్‌కు షాపింగ్‌ కాంప్లెక్స్‌లోని కొన్ని దుకాణాలు, 15 ఎకరాల భూమిని ఇచ్చారు. అయితే మిగిలిన ఆస్తిని కూడా తన పేరుపై బదిలీ చేయాలని నిఖిల్‌ కొంతకాలంగా తండ్రిపై ఒత్తిడి తెస్తున్నట్లు సమాచారం. దీనికి హరి ఓం అంగీకరించకపోవడంతో ఇద్దరి మధ్య విభేదాలు కొనసాగుతున్నాయి.

బుధవారం రాత్రి మద్యం మత్తులో ఇంటికి వచ్చిన నిఖిల్‌ను హరి ఓం మందలించారు. ఈ సమయంలో ఆస్తి విషయంపై ఇద్దరి మధ్య తీవ్ర వాగ్వాదం చోటుచేసుకుంది. కోపంతో ఊగిపోయిన నిఖిల్‌ తన వద్ద ఉన్న పిస్టల్‌తో తండ్రిపై కాల్పులు జరిపాడు.

తీవ్ర గాయాలపాలైన హరి ఓంను కుటుంబ సభ్యులు వెంటనే ఆసుపత్రికి తరలించే ప్రయత్నం చేసినప్పటికీ అప్పటికే ఆయన మృతి చెందినట్లు పోలీసులు తెలిపారు. ఘటన అనంతరం నిందితుడు నిఖిల్‌ పరారైనట్లు సమాచారం.

సమాచారం అందుకున్న పోలీసులు ఘటనాస్థలానికి చేరుకుని ఆధారాలు సేకరించారు. నిందితుడి కోసం ప్రత్యేక బృందాలను ఏర్పాటు చేసి గాలింపు చేపట్టారు. కుటుంబ సభ్యులు, స్థానికుల నుంచి వివరాలు సేకరిస్తూ కేసు దర్యాప్తు చేస్తున్నారు.

ఆస్తి కోసం తండ్రిని హత్య చేసిన ఘటనతో బుడానా గ్రామంలో విషాదం నెలకొంది. పెద్ద మొత్తంలో ఆస్తి ఉన్న కుటుంబంలో వారసత్వ వివాదం చివరకు ప్రాణాలు తీసే స్థాయికి చేరుకోవడంపై స్థానికులు ఆవేదన వ్యక్తం చేశారు.