ఒడుదొడుకుల మధ్య సూచీలకు స్వల్ప నష్టాలు

దేశీయ స్టాక్‌ మార్కెట్లు బుధవారం తీవ్ర ఒడుదొడుకుల మధ్య స్వల్ప నష్టాలతో ముగిశాయి. అధిక ముడిచమురు ధరలు, అమెరికా-ఇరాన్‌ మధ్య పెరుగుతున్న ఉద్రిక్తతలు మార్కెట్ల సెంటిమెంట్‌పై ప్రభావం చూపాయి. మరోవైపు అమెరికా ఫెడరల్‌ రిజర్వ్‌ వడ్డీ రేట్లను పెంచే అవకాశాలపై నెలకొన్న అంచనాలు కూడా మదుపర్లను అప్రమత్తంగా వ్యవహరించేలా చేశాయి.

సెన్సెక్స్‌ ఉదయం 37 పాయింట్ల లాభంతో 76,994.11 వద్ద ప్రారంభమైంది. తొలుత లాభాల్లో కదిలిన సూచీ అనంతరం ఒడుదొడుకులకు లోనైంది. ఇంట్రాడేలో 77,231.87 పాయింట్ల గరిష్ఠాన్ని, 76,656.12 పాయింట్ల కనిష్ఠాన్ని నమోదు చేసింది. చివరకు 12.99 పాయింట్లు తగ్గి 76,944.28 వద్ద స్థిరపడింది.

నిఫ్టీ కూడా స్వల్ప నష్టాన్ని నమోదు చేసింది. 24.60 పాయింట్లు తగ్గి 24,055.80 వద్ద ముగిసింది. రోజులో 23,952.55 నుంచి 24,143.15 పాయింట్ల మధ్య కదలాడింది.

పశ్చిమాసియాలో ఉద్రిక్తతలు మళ్లీ తీవ్రరూపం దాల్చడంతో ముడిచమురు ధరలు పెరిగాయి. బ్యారెల్‌ ముడిచమురు దాదాపు 2 శాతం లాభంతో 92 డాలర్ల వద్ద ట్రేడవుతోంది. చమురు ధరల పెరుగుదలతో దిగుమతులపై ఆధారపడే దేశాల ఆర్థిక వ్యవస్థలపై ఒత్తిడి పెరుగుతుందన్న ఆందోళనలు మార్కెట్లను ప్రభావితం చేశాయి.

అయితే డాలర్‌తో పోలిస్తే రూపాయి 28 పైసలు బలపడి 94.94 వద్ద ముగియడం కొంత ఊరటనిచ్చింది.

బీఎస్‌ఈలో నమోదైన కంపెనీల మొత్తం మార్కెట్‌ విలువ రూ.2.12 లక్షల కోట్లు తగ్గింది. దీంతో మొత్తం మార్కెట్‌ విలువ రూ.488.11 లక్షల కోట్లకు చేరింది. ఇది సుమారు 5.15 లక్షల కోట్ల డాలర్లకు సమానం.

మార్కెట్‌లో అమ్మకాల ఒత్తిడి కనిపించినప్పటికీ విదేశీ, దేశీయ సంస్థాగత మదుపర్లు కొనుగోళ్లను కొనసాగించారు. ఎఫ్‌ఐఐలు రూ.1,143 కోట్ల విలువైన షేర్లను కొనుగోలు చేయగా, డీఐఐలు రూ.1,847 కోట్ల పెట్టుబడులు పెట్టారు.

ఐటీసీ ఇన్ఫోటెక్‌తో విలీనం కానున్నట్లు ప్రకటన వెలువడటంతో హ్యాపియెస్ట్‌ మైండ్స్‌ షేరు భారీగా నష్టపోయింది. ఈ షేరు 10.92 శాతం క్షీణించి రూ.362.70 వద్ద ముగిసింది. మరోవైపు ఐటీసీ షేరు 3.98 శాతం లాభపడి రూ.266.45 వద్ద స్థిరపడింది.

సెన్సెక్స్‌లోని 30 షేర్లలో 19 నష్టాల్లో ముగిశాయి. మారుతీ 4.16 శాతం, ఎస్‌బీఐ 2.51 శాతం, ఇండిగో 2.51 శాతం, బజాజ్‌ ఫిన్‌సర్వ్‌ 2.40 శాతం, ఎం అండ్‌ ఎం 2.36 శాతం, యాక్సిస్‌ బ్యాంక్‌ 1.80 శాతం, టైటన్‌ 1.58 శాతం, సన్‌ఫార్మా 1.31 శాతం చొప్పున క్షీణించాయి.

మరోవైపు ఐటీసీ 3.98 శాతం, హెచ్‌సీఎల్‌ టెక్‌ 3.21 శాతం, ఇన్ఫోసిస్‌ 2.44 శాతం, భారతీ ఎయిర్‌టెల్‌ 2.30 శాతం, రిలయన్స్‌ 1.74 శాతం చొప్పున లాభపడ్డాయి.

రంగాల వారీగా చూస్తే వాహన సూచీ 1.41 శాతం, మన్నికైన వినిమయ వస్తువుల సూచీ 1.25 శాతం, టెలికాం 1.06 శాతం, యంత్ర పరికరాల సూచీ 0.95 శాతం చొప్పున నష్టపోయాయి. ఐటీ, ఫోకస్డ్‌ ఐటీ, ఇంధన, ఎఫ్‌ఎమ్‌సీజీ రంగాలు మాత్రం మెరుగ్గా రాణించాయి.

బీఎస్‌ఈలో మొత్తం 2,645 షేర్లు నష్టాల్లో ముగియగా, 1,700 షేర్లు లాభపడ్డాయి. మరో 221 షేర్లలో ఎలాంటి మార్పు కనిపించలేదు.

2025-26 ఆర్థిక సంవత్సరానికి ప్రభుత్వానికి రూ.283.56 కోట్ల తుది డివిడెండ్‌ను చెల్లించినట్లు భెల్‌ వెల్లడించింది.

అంతర్జాతీయ బహుళజాతి సంస్థ నుంచి 244 మిలియన్‌ డాలర్ల విలువైన ఆప్టికల్‌ ఫైబర్‌ కేబుల్‌ ఎగుమతి ఆర్డర్‌ను హెచ్‌ఎఫ్‌సీఎల్‌ దక్కించుకుంది. ఈ ఆర్డర్‌ విలువ భారత కరెన్సీలో సుమారు రూ.2,329 కోట్లు.

కొత్తగా మార్కెట్లోకి వచ్చిన షేర్లలో మిశ్రమ స్పందన కనిపించింది. హై-టెక్‌ ఇంజినీర్స్‌ షేరు ఇష్యూ ధర రూ.53తో పోలిస్తే 35.84 శాతం లాభంతో రూ.72 వద్ద ప్రారంభమై, చివరకు 42.62 శాతం పెరిగి రూ.75.59 వద్ద ముగిసింది. కంపెనీ మార్కెట్‌ విలువ రూ.716.99 కోట్లుగా నమోదైంది.

స్కైవేస్‌ ఎయిర్‌ సర్వీసెస్‌ షేరు మాత్రం ఇష్యూ ధర రూ.138తో పోలిస్తే 9.78 శాతం నష్టంతో రూ.124.50 వద్ద ప్రారంభమైంది. ఇంట్రాడేలో రూ.119కి పడిపోయిన ఈ షేరు చివరకు 8.94 శాతం తగ్గి రూ.125.65 వద్ద స్థిరపడింది.

సింబయోటెక్‌ ఫార్మాల్యాబ్‌ షేరు ఇష్యూ ధర రూ.988తో పోలిస్తే 0.99 శాతం నష్టంతో రూ.978.20 వద్ద ప్రారంభమైనప్పటికీ, ఇంట్రాడేలో రూ.1,173.80 వరకు ఎగిసింది. చివరకు 10.92 శాతం లాభంతో రూ.1,095.95 వద్ద ముగిసింది. కంపెనీ మార్కెట్‌ విలువ రూ.7,042.15 కోట్లుగా ఉంది.

వీగాల్యాండ్‌ డెవలపర్స్‌ రూ.210 కోట్ల విలువైన ఐపీఓను సెప్టెంబరు 10న ప్రారంభించి, సెప్టెంబరు 15న ముగించనుంది. ఒక్కో షేరుకు రూ.130-140 ధరల శ్రేణిని నిర్ణయించింది.

ఈఎస్‌డీఎస్‌ సాఫ్ట్‌వేర్‌ సొల్యూషన్‌ ఐపీఓకు చివరి రోజు భారీ స్పందన లభించింది. మొత్తం 135.88 రెట్ల మేర దరఖాస్తులు వచ్చాయి. క్యూఐబీ విభాగంలో 261.51 రెట్లు, ఎన్‌ఐఐ విభాగంలో 192.94 రెట్లు, రిటెయిల్‌ మదుపర్ల నుంచి 39.64 రెట్ల స్పందన నమోదైంది.

ప్రయారిటీ జువెల్స్‌ ఐపీఓ కూడా చివరి రోజు 100.45 రెట్ల మేర సబ్‌స్క్రిప్షన్‌ పొందింది. ఎన్‌ఐఐల నుంచి 166.49 రెట్లు, రిటెయిల్‌ మదుపర్ల నుంచి 106.76 రెట్లు, క్యూఐబీ విభాగంలో 39.87 రెట్ల స్పందన లభించింది.