అన్ని భాషల్లో నటించే అవకాశాలు ‘పుష్ప’ ద్వారా వచ్చాయని సునీల్‌ పేర్కొన్నారు

కమెడియన్‌గా తెలుగు ప్రేక్షకులను కడుపుబ్బా నవ్వించిన సునీల్‌ (Sunil) ప్రయాణం తరువాత పూర్తిగా కొత్త మలుపు తిరిగింది. ఒకప్పుడు కామెడీ రోల్స్‌తో గుర్తింపు పొందిన ఆయన, ఇప్పుడు హీరోగానూ, విలన్‌గానూ తన నటనతో ప్రేక్షకులను మెప్పిస్తున్నారు. తెలుగు మాత్రమే కాకుండా ఇతర భాషా చిత్ర పరిశ్రమల్లో కూడా అవకాశాలు అందుకుంటూ బిజీగా మారారు.

తాజాగా ఆయన మలయాళ సినిమా ‘కాటాలన్‌’ (Kattalan)లో కీలక పాత్రలో నటించారు. ఈ చిత్రం తెలుగులోనూ గురువారం (మే 28) విడుదల కానుంది. ఈ సందర్భంగా హైదరాబాద్‌లో జరిగిన సాంగ్‌ లాంచ్‌ ఈవెంట్‌లో సునీల్‌తో పాటు కబీర్‌ దుహాన్‌ సింగ్‌ తదితరులు పాల్గొన్నారు.

ఈ కార్యక్రమంలో దర్శకుడు సుకుమార్‌తో తన అనుభవాన్ని సునీల్‌ ఆసక్తికరంగా పంచుకున్నారు. “మీలో మంగళం శ్రీనును ఎలా చూశారు?” అనే ప్రశ్నకు స్పందిస్తూ, అది తనకూ షాకింగ్‌గా అనిపించిందని నవ్వుతూ చెప్పారు. లాక్‌డౌన్ సమయంలో సుకుమార్‌కు తాను కామెడీ కాకుండా వేరే పాత్రలు చేయాలని చెప్పానని, ఆ తర్వాత రెండు రోజుల్లోనే ఆయన నుంచి కాల్ వచ్చిందని తెలిపారు.

“పుష్పలో పూర్తిస్థాయి విలన్‌ పాత్రకు నిన్ను అనుకుంటున్నా. అందులో నువ్వు కామెడీ చేయకూడదు. శరీరం కూడా కదలకుండా హావభావాలతోనే నటించాలి” అని సుకుమార్ చెప్పినట్టు సునీల్‌ గుర్తుచేశారు. లుక్‌ టెస్ట్ కోసం ప్రత్యేక కాస్ట్యూమ్స్ పంపించారని, వాటితో భిన్నమైన స్టైల్స్‌లో ఫోటోలు తీసి పంపగా టీమ్‌కు బాగా నచ్చిందని చెప్పారు. షూటింగ్ రోజులంతా నుదుటి భాగం షేవ్ చేసుకోవాల్సి వచ్చిందని కూడా వెల్లడించారు.

‘పుష్ప’ సినిమా తన కెరీర్‌ను పూర్తిగా మార్చేసిందని సునీల్‌ తెలిపారు. ఈ సినిమా తర్వాతే అన్ని భాషల్లో నటించే అవకాశాలు పెరిగాయని ఆయన పేర్కొన్నారు. అల్లు అర్జున్‌ హీరోగా, సుకుమార్‌ దర్శకత్వంలో వచ్చిన ‘పుష్ప 1’ మరియు ‘పుష్ప 2’ చిత్రాలు భారీ విజయాలు సాధించిన సంగతి తెలిసిందే.

ఇక ‘కాటాలన్‌’ సినిమాలో సునీల్‌ “మారి” అనే పాత్రలో కనిపించనున్నారు. ఆంటోనీ వర్గీస్‌, కబీర్‌ దుహాన్‌ సింగ్‌, దుషారా విజయన్‌ తదితరులు కీలక పాత్రల్లో నటించారు. పాల్‌ జార్జ్‌ దర్శకత్వం వహించిన ఈ చిత్రం ఏనుగు దంతాల అక్రమ రవాణా నేపథ్యంతో రూపొందింది.