పెట్రోల్‌ బిల్లుపై ఇథనాల్‌ శాతం ముద్రించాలి.. సుప్రీంకోర్టులో పిటిషన్‌

పెట్రోల్‌ బంకుల్లో విక్రయించే ఇంధనంలో ఎంత శాతం ఇథనాల్‌ కలిపారో తప్పనిసరిగా వెల్లడించాలని కోరుతూ దాఖలైన ప్రజా ప్రయోజన వ్యాజ్యాన్ని సుప్రీంకోర్టు స్వీకరించలేదు. అయితే ఈ అంశంపై పిటిషనర్‌ సంబంధిత హైకోర్టును లేదా సమర్థ అధికారిని ఆశ్రయించవచ్చని సూచించింది. అడ్వొకేట్‌ నరేంద్ర కుమార్‌ గోస్వామి ఈ పిటిషన్‌ను దాఖలు చేశారు. పెట్రోల్‌ బంకుల్లోని డిస్పెన్సింగ్‌ నాజిల్స్‌పై పెట్రోల్‌లో కలిపిన ఇథనాల్‌ శాతాన్ని స్పష్టంగా ప్రదర్శించేలా ఆదేశాలు ఇవ్వాలని ఆయన కోరారు. అంతేకాకుండా వినియోగదారులకు ఇచ్చే బిల్లులు, రసీదులపైనా ఇథనాల్‌ శాతాన్ని ముద్రించాలని పిటిషన్‌లో పేర్కొన్నారు. ‘వినియోగదారులకు తెలుసుకునే హక్కు ఉంది’ తాము కొనుగోలు చేస్తున్న ఇంధనంలో ఏయే పదార్థాలు ఎంత మోతాదులో ఉన్నాయో తెలుసుకునే హక్కు వినియోగదారులకు ఉందని పిటిషనర్‌ వాదించారు. పెట్రోల్‌లో కలిపే ఇథనాల్‌ శాతంపై స్పష్టత ఉంటే వినియోగదారులకు ఇంధన ఎంపికలో అవగాహన పెరుగుతుందని పేర్కొన్నారు. ఈ పిటిషన్‌ కేంద్ర ప్రభుత్వ E20 విధానాన్ని వ్యతిరేకించేందుకు కాదని.. కేవలం ఇంధన విక్రయాల్లో పారదర్శకత, వినియోగదారుల అవగాహన కోసం మాత్రమేనని పిటిషనర్‌ స్పష్టం చేశారు. E20 పెట్రోల్‌ అంటే? E20 పెట్రోల్‌లో 20 శాతం ఇథనాల్‌, 80 శాతం పెట్రోల్‌ ఉంటుంది. ముడి చమురు దిగుమతులపై దేశం ఆధారపడటాన్ని తగ్గించడం, వాహనాల ఉద్గారాలను తగ్గించడం, దేశీయంగా ఉత్పత్తి చేసే జీవ ఇంధనాల వినియోగాన్ని పెంచడం ఇథనాల్‌ కలపడం కార్యక్రమం ప్రధాన ఉద్దేశాలు. అయితే E20 ఇంధన వినియోగం విస్తరిస్తున్న నేపథ్యంలో పాత వాహనాలపై దాని ప్రభావం గురించి చర్చ జరుగుతోంది. ముఖ్యంగా అధిక ఇథనాల్‌ మిశ్రమాల కోసం రూపొందించని పాత వాహనాల్లో ఇంధన సామర్థ్యం, ఇంజిన్‌ పనితీరు, ఇతర అంశాలపై వినియోగదారుల్లో సందేహాలు వ్యక్తమవుతున్నాయి. ఈ నేపథ్యంలో పెట్రోల్‌లో ఇథనాల్‌ శాతాన్ని బంకుల్లోనే స్పష్టంగా ప్రదర్శించాలన్న డిమాండ్‌ ప్రాధాన్యం సంతరించుకుంది.